ცნობილი ისტორიკოსის მარიკა ლორთქიფანიძის შვილიშვილის, დავით ოთხმეზურის მკვლელობის საქმეზე თბილისის სააპელაციო სასამართლოში ბრალდების მხარემ დღეს დასკვნითი სიტყვა წაიკითხა.
პროკურორმა ამირან გულუაშვილმა თავის დასკვნით სიტყვაში აღნიშნა, რომ პირველი ინსტანციის სასამართლოს მიერ გამოტანილი განაჩენი „აბსოლუტურად უსაფუძვლო“, „დაუსაბუთებელი“ და „უკანონოა“.
გარდა ამისა, პროკურორმა აღნიშნა, რომ „მოსამართლე გიორგი დარახველიძემ სხდომის ოქმები არ მოისმინა და ადვოკატის დასკვნითი სიტყვიდან დააკოპირა ტექნიკური შეცდომებით სავსე მოწმეთა ჩვენებების შეპირისპირებები“.
სასამართლო პროცესის დაწყებამდე, როგორც გულუაშვილმა ჟურნალისტებთან საუბრისას განაცხადა, ასლან ბეჟანიძის მიმართ გამოტანილი გამამართლებელი განაჩენი სააპელაციო სასამართლომ გამამტყუნებლით უნდა შეცვალოს.
„ჩვენ ჯერ კიდევ პირველი ინსტანციის სასამართლოში, მტკიცებულებების წარდგენისას ვამტკიცებდით, რომ ბრალდების მხარის მიერ წარდგენილი მტკიცებულებები სრულად ადასტურებს ამ პირის მიერ დანაშაულის ჩადენას. მიუხედავად ამისა, მოსამართლის მიერ არ იქნა გაზიარებული მტკიცებულებები და ის არგუმენტები და მის მიმართ გამოიტანა გამამართლებელი განაჩენი.
სააპელაციო სასამართლოში საქმის განხილვისას ჩვენ წარმოვადგინეთ სააპელაციო საჩივარი, სადაც დეტალურად არის საუბარი იმ არგუმენტებზე და მტკიცებულებებზე, რაც ბრალდების მხარეს გაგვაჩნია და მიგვაჩნია, რომ ასლან ბეჟანიძის მიმართ უნდა დადგეს გამამტყუნებელი განაჩენი.
ამასთან, როგორც მოგეხსენებათ, სააპელაციო ეტაპზე, დაკმაყოფილდა ბრალდების მხარის შუამდგომლობა და ერთი მოწმის ჩვენება გამოქვეყნდა. ეს არის კონფლიქტის უშუალოდ შემსწრე პირი, რომელიც აღწერს ვითარებას, თუ რა პირობებში წარიმართა დაპირისპირება ასლან ბეჟანიძესა და დავით ოთხმეზურს შორის. დასკვნით სიტყვაში ასევე შევეცდებით ვუპასუხოთ დაცვის მხარის არგუმენტებს, რომელიც მათ გააჩნიათ. უმეტესი მათგანი გაზიარებულია და ასახულია სასამართლოს მიერ განაჩენში. მათი ნაწილი მიგვაჩნია, რომ არ იმსახურებს დიდ ყურადღებას, რადგან არ შეესაბამება არც საქმეში არსებულ მტკიცებულებებს, არც იმ მტკიცებულებათა შინაარსს, რაც მოცემული საქმის განხილვისას წარმოდგენილ იქნა საქალაქო სასამართლოში“, _ აღნიშნა გულუაშვილმა.
პროკურორი ამირან გულუაშვილი თავის დასკვნით სიტყვას 44:07 წუთის განმავლობაში კითხულობდა. მთელი ამ ხნის მანძილზე, მან რამდენჯერმე გაამახვილა ყურადღება, რომ პირველი ინსტანციის სასამართლოს მოსამართლე გიორგი დარახველიძე „არასწორ, დამახინჯებულ და არაზუსტ ინფორმაციას იყენებს განჩენის დასაბუთებისას“. ადვოკატის მხრიდან კი, პირველი ინსტანციის სასამართლოში სპეციალურად დამახინჯდა რამდენიმე ძირითადი მოწმის ჩვენება. კერძოდ, გულუაშვილმა ყურადღება გაამახვილა მოწმეების: გიორგი მორჩილაძის, შოთა შანიძისა და ლევან ბოჭორიშვილის მიერ მიცემულ ჩვენებებზე და აღნიშნა, რომ მათ მიერ სასამართლოში მიცემული ჩვენებები აბსოლუტურად ემთხვევა გამოძიებისას მიცემულ ჩვენებებს.
აქვე უნდა აღინიშნოს, რომ პროკურორს დღეს დაწვრილებით არ უსაუბრია მოწმე დავით კაპანაძის ჩვენებაზე, რომელიც წინა სასამართლო სხდომაზე გამოქვეყნდა და პროკურატურის მტკიცებით, მნიშვნელოვანი მტკიცებულებაა. რასაც არ ეთანხმება გამართლებული ასლან ბეჟანიძის დაცვის მხარე.
პროკურორის დასკვნით სიტყვას „უკიდურესად არადამაჯერებელს“ უწოდებს ასლან ბეჟანიძის დაცვის მხარე, როგორც პროცესის დასრულების შემდეგ ადვოკატმა ტარიელ კაკაბაძემ „გურია ნიუსთან“ საუბრისას აღნიშნა, ის დარწმუნებულია, რომ პირველი ინსტანციის განაჩენი ძალაში დარჩება.
„დღეს მოვისმინეთ პროკურატურის დასკვნითი სიტყვა, რომელიც იყო უკიდურესად არადამაჯერებელი. ბრალდების მხარემ ვერაფერი ახალი ვერ შემოგვთავაზა და აბსოლუტურად დარწმუნებული ვარ, რომ პირველი ინსტანციის სასამართლოს მიერ გამოტანილი გამამართლებელი განაჩენი აუცილებლად დარჩება ძალაში“, _ აღნიშნა კაკაბაძემ და დასძინა, რომ დაცვის მხარე თავის დასკვნით სიტყვაში აბსოლუტურად გააბათილებს ბრალდების მხარის ყველა მსჯელობას და არგუმენტს.
„საქმეში არსებობს ერთადერთი ახალი მტკიცებულება, რომელიც სააპელაციო სასამართლოში იქნა გამოკვლეული. ეს გახლავთ მოწმე დავით კაპანაძის ჩვენება და საინტერესო ის არის, რომ სწორედ დავით კაპანაძის ჩვენება ეწინააღმდეგება ბრალდების მხარის ყველა მოწმის სასამართლოში მიცემულ ჩვენებას. შესაბამისად, ამ მოწმის ჩვენება კიდევ უფრო ასუსტებს ბრალდების მხარის პოზიციას. მე შევუპირისპირებ ჩვენებებს ერთმანეთს, რაც ბრალდების მხარემ დღეს არ გააკეთა, რადგან მან კარგად იცის მოწმის ჩვენება კიდევ უფრო მეტად ანგრევს მათ ისედაც დანგრეულ პოზიციას. მე, როგორც გამართლებული ასლან ბეჟანიძის ინტერესების დამცველ ადვოკატს, ერთი პროცენტითაც კი არ მეპარება ეჭვი, რომ გამამართლებელი განაჩენი, რომელიც გამოიტანა თბილისის საქალაქო სასამართლომ აუცილებლად დარჩება ძალაში. შეუძლებელია ამ დასაბუთებული, კანონიერი განაჩენის გამამტყუნებელი განაჩენით შეცვლა.
მომდევნო სასამართლო სხდომისთვის, როდესაც მე დასკვნით სიტყვას წავიკითხავ, მოვითხოვე მონიტორი, რათა უკეთ ვაჩვენო, რომ მოწმეები, რომლებიც პროკურატურის მტკიცებით ადგილზე ვითომ იმყოფებოდნენ, ვერ დაინახავდნენ მკვლელობის ფაქტს. ერთ-ერთი მოწმის, ლევან ბოჭორიშვილის ჩვენებიდან ირკვევა, რომ მას მკვლელობის ადგილის დანახვა არ შეეძლო, რადგან კორპუსის ორი კუთხე ეფარებოდა. ასევე საქმეში დევს მოწმეთა ჩვენებები, რომლებიც არ ადასატურებენ იმ პირთა ადგილზე ყოფნას, ვინც სასამართლოშია დაკითხული. შესაბამისად, სასამართლო კიდევ უფრო კარგად დაინახავს, რომ ბრალდების მხარის მოწმეები ტიპიური ცრუ მოწმეები არიან, მატყუარა მოწმეები და მათ ჩვენებებს არაფერი აქვთ სიმართლესთან საერთო“, _ აღნიშნა ადვოკატმა ტარიელ კაკაბაძემ.
რა შეეხება ოთხმეზურისა და ბეჟანიძის მხარეებს, როგორც მათ დღეს სასამართლოში ჟურნალისტებთან საუბრისას განაცხადეს სამართლიანი გადაწყვეტილების მიღების იმედი აქვთ.
„მემგონი, გამოჩნდა პროკურორის სიტყვიდან, რომ ადვოკატი დასდევს წამებში და წუთებში მოწმეების ჩვენებებს შორის რომ არის განსხვავება. ამიტომ არ არიან სანდონი? დარწმუნებული ვარ, რომ ბეჟანიძეა ჩემი შვილის მკვლელი. რომ არ ვიყო ამაში დარწმუნებული არც პრეტენზია მექნებოდა ნამდვილად. ვის რაში სჭირდება უდანაშაულო ადამიანის დასჯა?! ვის რა მორალური კმაყოფილება შეიძლება მოუტანოს ამან? შეიძლება ეს დააბრალო დაინტერესებულ მხარეს, მაგრამ როგორ შეიძლება ჩვენ ამან რაიმე მორალური კმაყოფილება მოგვიტანოს“, _ აღნიშნა გარდაცვლილი დავით ოთხმეზურის მამამ, გოგი ოთხმეზურმა.
ოთხმეზურის ამ არგუმენტს, რომ უდანაშაულო ადამიანის დასჯის ინტერესი არ აქვს, საპირისპიროს პასუხობს ასლან ბეჟანიძის მხარე. როგორც ბეჟანიძის დედამ, თამარ მუქერიამ ჟურნალისტებთან საუბრისას პროცესის დასრულების შემდეგ განაცხადა, მის შვილს თავდაცვის უნარი არ აქვს, რადგან გონებასუსტია. ამიტომ პროკურატურისთვის ადვილი იქნებოდა მისთვის დანაშაულის დაბრალება.
„ჩემი შვილი გამოიყენეს რადგან თავდაცვის უნარი არ აქვს. მას დამოუკიდებლად გადაადგილებაც კი არ შეუძლია. მშობლების გარეშე არც უცხოვრია. თუ თბილისში იყო ჩემთან იყო, თუ არადა, მამამისთან ცხოვრობდა აჭარაში“, _ აღნიშნა მუქერიამ.
გარდა მისა, მუქერიამ ჟურნალისტებტან საუბრისას ბრალდების მხარის დასკვნითი სიტყვა შეაფასა და თქვა, რომ „პროკურატურის დასკვნითი სიტყვა დაუჯერებელი იყო“.
„არ არსებობს არანაირი მტკიცებულება, რომ ჩემი შვილი მკვლელია. ამ სერიული მკვლელების, ცრუ მოწმეების მიერ მიცემული ჩვენებებით რომ ჩემს შვილს გამამტყუნებელი განაჩენი გამოუტანონ, წარმოუდგენელია. დარწმუნებული ვარ, საქალაქო სასამართლოს მიერ გამოტანილი კანონიერი განაჩენი ძალაში დარჩება. მე არ ვიცი რატომ არის ოთხმეზურის მხარე დარწმუნებული, რომ მათი შვილი ასლანმა მოკლა. ჩემი ჩვილი აქ არ ცხოვრობდა, მას არცკი იცნობდა. ეს ამბავი 13 წლის შემდეგ წამოიწყეს. ჩემი შვილის არც დნმ-ის ანალიზია საქმეში, არც არანაირი სხვა მტკიცებულება, რომლითაც ასლანის ბრალეულობა დადასტურდება.
ის პირები, რომლებიც დაიკითხნენ 2004 წელს, არავინ ადებდა ჩემს შვილს ხელს. გარდა ამისა, არცერთი მოწმე, რომელიც 2004 წელს დაკითხა პროკურატურამ, სასამართლოში აღარ დაუკითხავთ. აბსოლუტურად სხვა ჩვენებას იძლევიან ისინი. 13 წლის მერე მოიყვანეს ახალი მოწმეები, რომლებიც უდანაშაულო ადამიანს ბრალად სდებენ.
ამიხსენით, როგორ შეიძლება ერთიდაიგივე პროკურორს, ერთიდაიგივე მოწმეები სხვადასხვა სისხლის სამართლის საქმეში ჰყავდეს?! არა მარტო ამ საქმეში, არამედ, 13 წლის წინ მომხდარ სხვა მკლელობის საქმეშიც შოთა შანიძე და გიორგი მორჩილაძე (აღნიშნულთან დაკავშირებით „გურია ნიუსიც“ წერდა, ავტ.) მოწმეები არიან. ისიც ვიცი, რომ შოთა შანიძე მოწმეთა დაცვის პროგრამაში ჰყავს პროკურატურას ჩასმული. ჩვენი დასკვნითი სიტყვის წაკითხვისას ყველა დარწმუნდება, რომ მოწმეების ჩვენებები ერთმანეთთან შეუსაბამოა, ჩემი შვილის მიმართ გამოტანილი განაჩენი კი _ სამართლიანი“, _ აღნიშნა თამარ მუქერიამ.
ცნობისთვის, გამართლებული ასლან ბეჟანიძის დაცვის მხარე თბილისის სააპელაციო სასამართლოში დასკვნით სიტყვას 2017 წლის 26 სექტემბერს 11:00 საათზე წაიკითხავს. შესაძლოა, სასამართლოს განაჩენიც ამავე დღეს გახდეს ცნობილი.
ამავე თემაზე:
„თქვენი ინტერპრეტაციით დაწერილი” ჟურნალისტური გამოძიების უცნობი დეტალები
ექსკლუზივი – არაერთგზის ნასამართლევი „ოქროს მოწმეები“, რომლებიც ძველ დანაშაულებს ხსნიან
პროკურატურის „ოქროს მოწმეები“, რომლებიც ძველ დანაშაულებს ხსნიან – ნაწილი II
ექსკლუზივი – 12 წლის წინ მომხდარი გახმაურებული მკვლელობის გაუხმაურებელი დეტალები
რა არგუმენტებით დაასაბუთა მოსამართლემ მკვლელობაში ბრალდებულის უდანაშაულობა
მკვლელობაში ბრალდებული სასამართლო დარბაზიდან გაათავისუფლეს (ფოტორეპორტაჟი)
მკვლელობაში გამართლებულის დედის პასუხი ოთხმეზურების ოჯახს
„დამნაშავეს მფარველობდნენ“ – ვის ადანაშაულებს ოთხმეზურის მამა მკვლელობის გამოძიების გაჭიანურებაში
რას აცხადებს მოკლული დავით ოთხმეზურის მამა და ვის დასჯას ითხოვს ის
ექსკლუზივი – რატომ შეუცვალეს საპატიმრო დაწესებულება განსაკუთრებით მძიმე დანაშაულებში მსჯავრდებულს
“გურია ნიუსის” ჟურნალისტს სასამართლო პროცესზე ფოტოგადაღების უფლება არ მისცეს
