ორგანიზაცია „ახალგაზრდა ადვოკატები“ საქართველოს მთავრობის საჯარო სამართლის იურიდიული პირის – რელიგიის საკითხთა სახელმწიფო სააგენტოს საქმიანობასთან დაკავშირებით, მოკვლევის შედეგებს აქვეყნებს და სააგენტოს მიზნების და ამოცანების გათვალისწინებით, საჯარო დაწესებულების ხარჯთეფექტურობის საკითხს სვამს.
„ახალგაზრდა ადვოკატების“ იურისტის, ია გოგნაძის განცხადებით, ორგანიზაციის ინტერესს წარმოადგენდა შესწავლილიყო ინფორმაცია, 2014, 2015 და 2016 წლებში სააგენტოში დასაქმებული პირების მიმართ გაცემული ხელფასების, პრემიებისა და დანამატების შესახებ და მათი მიზნობრიობა, ასევე, სააგენტოს მხრიდან გაცემული რეკომენდაციებისა და წინადადებების შესრულების საკითხი, სააგენტოს კვლევითი საქმიანობა, ურთიერთობების ხარისხი სხვადასხვა რელიგიური კონფესიის წარმომადგენლებთან და მათი მოთხოვნების დაკმაყოფილების მაჩვენებლები.
„რელიგიის საკითხთა სახელმწიფო სააგენტო, რომელიც საქართველოს მთავრობის 2014 წლის 19 თებერვლის დადგენილების საფუძველზე შეიქმნა, საქართველოს მთავრობისა და საქართველოს პრემიერ-მინისტრისათვის ახორციელებს საინფორმაციო, კვლევით, სამეცნიერო-საგანმანათლებლო და სარეკომენდაციო საქმიანობას რელიგიის სფეროში. ჰყავს 24 თანამშრომელი, რომელის აღმასრულებელ რგოლში გვხდება თავმჯდომარე, თავმჯდომარის მოადგილე, სამსახურის უფროსები, მთავარი მრჩევლები, წამყვანი სპეციალისტები. სააგენტო 2017 წელს სახელმწიფო ბიუჯეტიდან დაფინანსდა 5 330 000 ლარით, 2016 წელს – 5 600 000 ლარით, 2015 წელს – 4 200 000 ლარით, ხოლო 2014 წელს – 2 322 200 ლარით“, _ აცხადებს გოგნაძე.
„ახალგაზრდა ადვოკატების“ მიერ შესწავლილი მასალის თანახმად, რელიგიის საკითხთა სახელმწიფო სააგენტოს ხარჯვითმა ნაწილმა 2014-2016 წლებში, 12 122 000 ლარი შეადგინა, აქედან სხვადასხვა რელიგიური თემების მიმართ გაიცა 9 450 000 ლარი, ხოლო დარჩენილი 2 672 000 ლარი მოხმარდა სააგენტოში დასაქმებული თანამშრომლის შრომით ანაზღაურებას. კერძოდ, სააგენტოს თავმჯდომარის 2014 წლის თანამდებობრივმა სარგომ შეადგენა 23 747 ლარი, პრემიამ 2 950 ლარი, დანამატმა კი – 15 000 ლარი, 2015 წლის თანამდებობრივმა სარგომ – 35 400 ლარს, პრემიამ – 2 360 ლარი, ხოლო დანამატმა – 27 300 ლარს. რაც შეეხება 2016 წელს, თანამდებობრივი სარგომ შეადგენა – 35 400 ლარი, პრემიამ 2 950, ხოლო დანამატმა 34 100 ლარი. ორგანიზაციამ შეისწავლა თავმჯდომარის მოადგილის შრომითი ანაზღაურების ხარჯები. მოადგილის 2014 წელს თანამდებობრივმა სარგომ შეადგენა 18 900 ლარი, პრემიამ – 2 700 ლარი, ხოლო დანამატმა – 10 000 ლარი, 2015 წელს თანამდებობრმა სარგომ შეადგენა – 30 272 ლარი, პრემიამ – 2 160, ხოლო დანამატმა – 13 100 ლარი, 2016 წელს კი თანამდებობრივი სარგო წარმოადგენდა 3 214 ლარს, ხოლო დანამატი 1 100 ლარს.
„ახალგაზრდა ადვოკატები“ აღნიშნავს, რომ რელიგიის საკითხთა სახელმწიფო სააგენტოში, შრომით ანაზღაურებებზე, 2016 წელს სულ გაიცა 562 217 ლარი, 2015 წელს – 524 395.00 ლარი, 2014 წელს – 310 027.49 ლარი. რაც შეეხება პრემია-დანამატების ოდენობას, 2016 წელს პრემიის სახით გაიცა 59,050 ლარი, ხოლო სახელფასო დანამატის სახით – 191,700 ლარი. 2015 წელს პრემიის სახით გაიცა – 26,240 ლარი, ხოლო სახელფასო დანამატის სახით – 122,450, ხოლო 2014 წელს, პრემია-დანამატმა შეადგინა 89,030 ლარი. ორგანიზაცია, ყოველივე ზემოაღნიშნულდიან გამომდინარე მიიჩნევს, რომ რელიგიის საკითხთა სახელმწიფო სააგენტოს ხარჯთეფექტურობის და მიზნობრიობის საკითხი შესაბამის ანალიზსს მოითხოვს. წარმოდგენილი მონაცემების მიხედვით, სააგენტოში ყოველთვიური ხასიათი აქვს დანამატების გაცემის პროცესს.
“აღნიშნული საკითხი მით უფრო აქტუალურია, როდესაც სააგენტოს საქმიანობა, მისი მაღალი დანიშნულების მიუხედავად, არ მოითხოვს შრომითი ძალების განსაკუთრებულ მობილიზებას და ჩართვას”, _ აცხადებენ „ახალგაზრდა ადვოკარები“.
„ახალგაზრდა ადვოკატები“ ცალსახად მიესალმება რელიგიის საკითხთა სახელმწიფო სააგენტოს საქმიანობას, რომელიც მიმართულია სხვადასხვა რელიგიური კონფენსიების წინაშე მდგარი საკითხების გადაჭრისა და მათზე რეკომენდაციების, შუამდგომლობების მომზადების მიმართულებით. ამასთან, მნიშვნელოვნად მიიჩნევს, სააგენტოს რეკომენდაციები და შუამდგომლობები სრულად იქნეს ხელმისწავდომი საზოგადოებისთვის სააგენტოს ოფიციალური ვებ-გვერდის მეშვეობით.
„სააგენტოს მეტი გამჭვირვალობისთვის, საჭიროდ მივიჩნევთ ხელმისაწვდომი იყოს კომისიის სხდომის ოქმებიც, ვინაიდან საზოგადოება ფლობდეს ინფორმაციას, თუ რა ტიპის საკითხებზე ხდება სახელმწიფოს რეაგირება და რამდენად სამართლიან გარემოში. ამასთან, ორგანიზაცია მიესალმება სააგენტოს საგანმანათლებლო საქმიანობას, რელიგიის თავისუფლების შესახებ ევროსასამართლოს, გაეროს, ევროსაბჭოს, ეუთოს, ვენეციის კომისიისა და ოსლოს კოალიციის მიერ მიღებული გადაწყვეტილებების ხელმისაწვდომობის დამკვიდრებას, ასევე რელიგიისა და რწმენის თავისუფლების შესახებ საერთაშორისო ქვეყნების კანონმდებლობის გავრცელების ხელშეწყობას. ამასთან, ორგანიზაცია საჭიროდ და აუცილებლად მიიჩნევს, სააგენტომ თავისი საქმიანობა გააფართოვოს იურიდიულ პროფესიაში მოქმედ ორგანიზაციებთან თანამშრომლობის კუთხით. მოხდეს ეროვნული დონის საერთო სასამართლოების მხრიდან რელიგიის თავისუფლების და რელიგიური დისკრიმინაციის დავების შესწავლა და განზოგადება, რომლის პარქტიკული გამოცდილებაც, ქართულ არასამთავრობო ორგანიზაციებში არსებობს“, _ აღნიშნავენ ორგანიზაციაში.
“გურია ნიუსი” რელიგიის საკითხთა სახელმწიფო სააგენტოს პოზიციას მოგვიანებით შემოგთავაზებთ.
