ჩოხატაურის მუნიციპალიტეტში სკოლამდელი საგანმანათლებლო-სააღმზრდელო დაწესებულებებში სასწავლო-სააღმზრდელო პროცესი 15 სექტემბრიდან უნდა განახლდეს _ ამის შესახებ “გურია ნიუსს” ა(ა)იპ ჩოხატაურის მუნიციპალიტეტის სკოლამდელი საგანმანათლებლო-სააღმზრდელო დაწესებულება “მომავალის” დირექტორმა, ნინო ბარამიძემ განუცხადა.
რაც შეეხება აღსაზრდელების რეგისტრაციის პროცესს, ნინო ბარამიძის ინფორმაციით, რეგისტრაცია ჯერ დასრულებული არ არის და მიმდინარე კვირის ბოლოს შეწყდება.
ჩვენს კითხვაზე, არის თუ არა მუნიციპალიტეტის მასშტაბით ბაღი (ბაღები) სადაც სააღმზრდელო პროცესი, შესაძლოა, ვერ განახლდეს, ნინო ბარამიძე გვპასუხობს, რომ არა. თუმცა, როგორც უკვე ვწერდით და საზოგადოებისთვისაც ცნობილია, ამ ზამთარში დიდთოვლობამ სოფელ იანეულის საბავშვო ბაღი დააზიანა, რის გამოც, ბაღი დახურეს და აღსაზრდელები ბუკისციხის საბავშვო ბაღში გადაიყვანეს.
ნინო ბარამიძე ჩვენთან საუბარში ადასტურებს, რომ იანეულის საბავშვო ბაღის აღსაზრდელები სიარულს მეზობელი სოფლის საბავშვო ბაღში გააგრძელებენ.
“ჯერ ვერ განახლდება იანეულის საბავშვო ბაღში სააღმზრდელო პროცესი _ ახალი ბაღის აშენებაზეა საუბარი. ბაღის დახურვის შემდეგ ტრანსპორტი იყო დანიშნული და მასწავლებელთან ერთად დაყავდა ბავშვები. ასე იქნება წელსაც”, _ გვითხრა ნინო ბარამიძემ.
ჩოხატაურის მუნიციპალიტეტში საბავშვო ბაღების აშენების შესახებ იყო საუბარი 2023 წელსაც.
“რა იგეგმება სოფელ იანეულის საბავშვო ბაღთან დაკავშირებით, რომელიც დიდთოვლობის შედეგად დაზიანდა და დროებით დახურულია, რეაბილიტირდება?
(როგორც ცნობილია, 2023 წელს პრემიერ-მინისტრის მიერ ინიცირებული პროგრამით იყო ამ სოფელში განსაზღვრული ბაღის აშენება, თუმცა ამ დროისთვის მუნიციპალური განვითარების ფონდს ტენდერი გამოცხადებული არ აქვს)”, _ ვწერდით 2025 წლის 28 აპრილს გაგზავნილ წერილში ჩოხატაურის მუნიციპალიტეტის მერიას.
ჩვენს კითხვაზე პასუხი მერიის პრესსამსახურმა 4 სექტემბერს დაგვიბრუნა:
“თქვენი წერილის პასუხად, რომელიც შეეხება დიდთოვლობის შედეგად სოფ. იანეულში დაზიანებული ბაღის ტერიტორიაზე ახალი ბაღის მშენებლობას, გაცნობებთ, რომ 2023 წელს პრემიერ-მინისტრის მიერ ინიცირებული პროგრამის შესაბამისად, ჩოხატაურის მუნიციპალიტეტში დაიგეგმა ახალი საბავშვო ბაღების მშენებლობა. მერიის მიერ მიწოდებულ იქნა რეკომენდაცია შესაბამისი სტრუქტურებისთვის I ეტაპზე ასაშენებელი ბაღების შესახებ, მათ შორისაა იანეულის საბავშვო ბაღი”, _ წერია “გურია ნიუსისთვის” 2025 წლის 4 სექტემბერს მოწოდებულ პასუხში, რომელსაც ხელს მერი დავით შარაშიძე აწერს.
საუბარი სოფელ იანეულში ახალი საბავშვო ბაღის აშენების შესახებ საქართველოს მთავრობამ ჯერ კიდევ 2019 წელს დაიწყო.
კერძოდ, 2019 წლის 18 მარტს გურიის მხარის ოფიციალურ გვერდზე გავრცელებული ინფორმაციის თანახმად, საქართველოს მთავრობის გადაწყვეტილებით, გურიაში, კერძოდ საჭამიასერში, იანეულში, სუფსაში, ხაჯალიაში და აცანაში ახალი საბავშვო ბაღები უნდა აშენებულიყო.
2023 წელს გაკეთებული დაპირებიდან, რომლის მიხედვითაც ჩოხატაურის მუნიციპალიტეტში რამდენიმე საბავშვო ბაღი უნდა აშენებულიყო, ჯერ აშენებული არც ერთი არ არის.
როგორც ცნობილია, პრემიერის მიერ ინიცირებული პროგრამა ჩოხატაურის მუნიციპალიტეტში 2 ეტაპად უნდა გახორციელებულიყო.
ჯერ იგეგმებოდა სოფლების: გუთურის, გოგოლესუბნის, ზომლეთის და შუა ამაღლების საბავშვო ბაღების მშენებლობა, ხოლო პირველი ეტაპის დასრულების შემდეგ კი როგორც ჩოხატაურის მუნიციპალიტეტის მერიაში გვეუბნებოდნენ, ბაღები აშენდებოდა იანეულში, ქვენობანში, დაბლაციხესა და გორაბერეჟოულში.
კომპანიას, რომელთანაც ხელშეკრულება მუნიციპალური განვითარების ფონდმა 2023 წლის 10 მაისს გააფორმა და სოფელ გუთურში, გოგოლესუბანში, ზომლეთსა და შუა ამაღლებაში 50 ბავშვზე გათვლილი საბავშვო ბაღის პროექტირება/მშენებლობა უნდა გაეხორციელებინა, ხელშეკრულება მიმდინარე წლის თებერვალში ცალმხრივად შეუწყვიტეს.
როგორც მუნიციპალური განვითარების ფონდის გვერდზე კომპანიისადმი 17 თებერვლით დათარიღებულ მიწერილ წერილში ვკითხულობთ, სამშენებლო ობიექტები თვეებია გაჩერებულია, ხოლო შპს “ლაგი კაპიტალს” ხელშეკრულების შეწყვეტამდეც არაერთი გაფრთხილება აქვს მიღებული.
ხელშეკრულების შეწყვეტის შემდეგ, მუნიციპალური განვითარების ფონდმა ბაღების მშენებლობასთან დაკავშირებით ახალი ელექტრონული ტენდერი აუქციონის გარეშე 31 მარტს გამოაცხადა.
შესყიდვის სავარაუდო ღირებულება 5 129 492 ლარს შეადგენდა და განაცხადები 8 აპრილიდან 11 აპრილის ჩათვლით მიიღებოდა. ტენდერში გამარჯვებული “შპს მოდერნ ბილდინგ კომპანი” გახდა, თუმცა, ერთი ხელშეკრულების ფარგლებში, Design-Build მეთოდით, 50 ბავშვზე გათვლილი ოთხი საბავშვო ბაღის მშენებლობისთვის არსებული საპროექტო დოკუმენტაციის კორექტირების (საჭიროებისამებრ)საფუძველზე სამშენებლო სამუშაოების შესრულების სახელმწიფო შესყიდვის შესახებ გამოცხადებული ტენდერი შეწყდა.
რატომ შეწყდა ელექტრონული ტენდერი, “გურია ნიუსმა” ამ კითხვით მუნიციპალური განვითარების ფონდს წერილობით 19 მაისს მიმართა.
მუნიციპალური განვითარების ფონდიდან მიღებულ პასუხში ეწერა:
“საქართველოს ზოგადი ადმინისტრაციული კოდექსი”-ს შესაბამისად, გიგზავნით მიმდინარე წლის 19 მაისის #2143 თქვენი განცხადებით მოთხოვნილ, სსიპ საქართველოს მუნიციპალური განვითარების ფონდში (შემდგომში – “ფონდი”) არსებულ საჯარო ინფორმაციას:
გაცნობებთ, რომ ფონდის მიერ 2025 წლის 31 მარტს გამოცხადებული ელექტრონული ტენდერი (NAT250006487) შეწყდა ქვეყანაში სამშენებლო სამუშაოების საპროექტო მოთხოვნებისა და პრინციპებისადმი მიდგომების ცვლილების საფუძველზე. ტენდერის შეწყვეტა გახორციელდა სახელმწიფო შესყიდვების სააგენტოს თავმჯდომარის 2017 წლის 14 ივნისის #12 ბრძანებით დამტკიცებული “ელექტრონული ტენდერის ჩატარების წესის” მე-12 მუხლის მე-2 პუნქტის შესაბამისად.
ამჟამად მიმდინარეობს აღნიშნული ბაღების მშენებლობის ტექნიკური დავალების განახლება, რის შემდეგაც გამოცხადდება ახალი ტენდერი”.
“გურიის რეგიონში დავათვალიერეთ ინფრასტრუქტურული პროექტები. განსაკუთრებით მნიშვნელოვანია საბავშვო ბაღებისა და სკოლების მშენებლობა, რომელთა ნაწილი აქტიურ ფაზაშია. თუმცა, რამდენიმე პროექტში დაფიქსირდა შეფერხება და პრობლემები, რის გამოც მუნიციპალური განვითარების ფონდმა შეწყვიტა კონტრაქტები, უახლოეს მომავალში გამოცხადდება ახალი ტენდერები და სამუშაოები განახლდება”, _ აცხადებდა 26 ივლისს ინფრასტრუქტურის მინისტრი, რევაზ სოხაძე გურიაში ინფრასტრუქტურული პროექტების მიმდინარეობისა და გამოწვევების ადგილზე გაცნობის შემდეგ.
26 აგვისტოს კი მუნიციპალური განვითარების ფონდის გვერდზე გავრცელებული ინფორმაციით:
“ინფრასტრუქტურის სამინისტროს მუნიციპალური განვითარების ფონდმა, ბაღების მშენებლობა-რეაბილიტაციის სახელმწიფო პროგრამის ფარგლებში, გურიის რეგიონში დაგეგმილი 28 საბავშვო ბაღიდან 4 ბაღის მშენებლობისა და რეაბილიტაციის სამუშაოები დაასრულა და 14 ბაღის სამუშაოებს ასრულებს. დაგეგმილია კიდევ 10 ბაღის სრულად განახლება.
ინფრასტრუქტურის მინისტრის მოადგილე ილია ბეგიაშვილი სამუშაოების მიმდინარეობას ადგილზე გაეცნო.
გურიის რეგიონში ბაღების მშენებლობა-რეაბილიტაცია სახელმწიფო ბიუჯეტიდან, ჯამურად, 54.6 მილიონი ლარით ფინანსდება.
საბავშვო ბაღები სრულად შეესაბამება საერთაშორისო სტანდარტებს და უზრუნველყოფს სკოლამდელი ასაკის ბავშვებისთვის უსაფრთხო და განვითარებაზე ორიენტირებულ გარემოს.
თანამედროვე შენობებში მოწყობილია სათამაშო და საძინებელი ოთახები, კეთილმოწყობილია ეზოები და ყველა საჭირო სივრცე.
ყველა საბავშვო ბაღი სრულად არის ადაპტირებული შეზღუდული შესაძლებლობის მქონე პირებისთვის”.
რომელი ბაღების განახლებაა დაგეგმილი გურიაში,_ ამ კითხვით მუნიციპალური განვითარების ფონდს მივმართეთ.
როგორც პრესსამსახურში გვითხრეს, ნატანებში მიმდინარეობს ბაღის რეაბილიტაცია, ასევე ოზურგეთში მიმდინარეობს ბაღის რეაბილიტაცია, ლანჩხუთში მიმდინარეობს 4 ბაღის რეაბილიტაცია, ხოლო ჩოხატაურში 2 ბაღის რეაბილიტაციისთვის მოსამზადებელი სამუშაოები მიმდინარეობს.
კითხვაზე კი თუ რომელი საბავშვო ბაღების რეაბილიტაციისთვის მოსამზადებელი სამუშაოები მიმდინარეობს ჩოხატაურის მუნიციპალიტეტში, მუნიციპალური განვითარების ფონდმა წერილობით მიმართვა გვთხოვა.
“გურია ნიუსმა” განაცხადი უკვე გადააგზავნა ინფორმაციის მოთხოვნის მიზნით და პასუხს მიღებისთანავე შემოგთავაზებთ.
თუმცა, როგორც ინფრასტრუქტურის სამინისტროს ფეისბუქგვერდზე 26 ივლისს გავრცელებულ ინფორმაციაში ვკითხულობთ:
“მიმდინარეობს ჩოხატაურში #1 საბავშვო ბაღისა და #1 ბაგა-ბაღის სრული რეაბილიტაციის პროექტირების სამუშაოები. თითოეული ბაღი 150 აღსაზრდელზეა გათვლილი და თანამედროვე სტანდარტების შესაბამისად განახლდება. სამუშაოები 6.4 მილიონ ლარით სახელმწიფო ბიუჯეტიდან დაფინანსდება”.
“გურია ნიუსი” თემაზე მუშაობას აგრძელებს.
ავტორი
