მოცვის კულტურის გაშენება გურიაში, ჩაის შემდეგ, პრიორიტეტულ მიმართულებად იქცა. მართალია, ადგილობრივები უპირატესობას ჩაის კვლავ რეაბილიტაციას ანიჭებდნენ და ითხოვდნენ მოცვის მსგავსი პროექტი , მხოლოდ ჩაის აღორძინების კუთხით აემოქმედებინათ, მაგრამ ეკონომიკური პოლიტიკის გავლენით, უპირატესობა მაინც მოცვს მიენიჭა.
გურიაში უკვე დარგულ-გაშენებული მოცვის პირველი მოსავალი მწიფობას იწყებს, თუმცა სწორედ იმ პრობლემამ იჩინა თავი, რაზეც გურიაში ჩამოსული მთავრობის წარმომადგენლებს, გურული ფერმერები პირდაპირ ეუბნებოდნენ:
„გავაშენო მოცვი და შევაჭამო ჩიტებს? ჩვენ გეუბნებით, რომ ასი პროცენტით დაფინანსება თუ გაქვთ გადაწყვეტილი, ჩაის კულტურა დაგვიფინანსეთ“, _ უთხრეს სოფელ მაკვანეთში (და სხვა სოფლებშიც) ორი წლის, წინ გია ვოლსკის და სხვებს, რომლებიც საარჩევნო პერიოდში აქტიურად ურჩევდნენ ადგილობრივებს, გაეშენებინათ მოცვის კულტურა…
დღეისთვის, როცა მოცვმა მწიფობა დაიწყო, გააქტიურდნენ ჩიტებიც.
_ რამდენი მარცვალიც გაწითლდა , იმდენი ჩაანისკარტეს. ან ჭამენ, ან ძირს იყრება ნაყოფი. დავდგით საფრთხობელა, ზედ შეჯდა ჩიტი და იქედან დაასკუპდა მოცვის ბუჩქს. მთელი დღე ვისვრით „ხლაპუშკებს“, მაგრამ ხმაურსაც მიერჩვივნენ უკვე. ვინც ადრე გააშენა, იმათ ვეკითხებით, როგორ დაიცვეს თავი ჩიტებისგან. ასევე რჩევებს ვეძებთ ინტერნეტში…გვეუბნებიან, რომ მწიფობაში აქტიურად როცა შევა მოცვი და მერე კრეფა დაიწყება, აღარ მოვლენო. კრეფისას კი , ბატონო, ადამიანის შეეშინდებათ, დაფრთხებიან, მაგრამ დამწიფებამდე თუ სათითაოდ შეჭამეს? ზღვა კოვზით დაილიაო, _ გვეუბნებიან ჭანიეთის ფართობში მომუშავე ადგილობრივები.
ასეა თუ ისე, მოცვის დამწიფების ეტაპზე, სწორედ ახლა, გურიაში ძალიან გააქტიურებული არიან ჩიტები. მთავრობის წარმომადგენლებისთვის ადგილობრივების მიერ, ირონიულ კონტექსტში ნათქვამი სიმართლე „დაგიჯეროთ, გავაშენოთ მოცვი და შევაჭამოთ ჩიტებს?“ _ ნაწილობრივ მართლდება.
ვნახოთ, ხვავრიელად დასრულდება თუ არა მოცვის კრეფის სეზონი _ ჩვენ ამ პროცესს აქტიურად გავაშუქებთ, რადგან ძალიან საინტერესოა, როგორ აიწონ-დაიწონება ამ კულტურის გაშენებასთან დაკავშირებით წარმოშობილი ადგილობრივების რიტორიკა _ „ჩაი თუ მოცვი? მოცვი თუ ჩაი?“
მარინა ჩიხლაძე
