საახალწლოდ, განსაკუთრებით პოპულარულია და რიტუალის რანგშიცაა აყვანილი საცივისა და ბაჟესთვის ნიგვზის ზეთის _ ურწყულის გამოხდა.
ნიგოზი თავად უნდა იყოს ზეთიანი, რის მიხვედრაც ძნელი არ არის _ გავჭყლეტთ და დავსრესთ ხელით.
მოვამზადოთ ასე:
თუ არ დაგეზარებათ და ფილთაქვით დანაყავთ, უკეთესი შედეგი გექნებათ. თუმცა, უმრავლესობა მაინც ნიგვზის საკეპ მანქანაში გატარებას ამჯობინებს.
ნიგოზი მანქანაში აუცილებლად ორჯერ გავატაროთ, თასზე დავყაროთ, დავუმატოთ ყვითელი ყვავილი უფრო მეტი, ვიდრე დანარჩენი საჭირო სანელებლები, კარგად დანაყილი ნიორი (ერთი მოზრდილი თავი ერთ კილოგრამზე) და დავიწყოთ ღონივრად მოზელა. ერთი საათი მაინც დაგჭირდებათ. როცა დარბილდება, თითქოს, ხელში დაიშლება, დავიწყოთ გამოწურვის პროცესი.
უფრო ადვილია კიდევ ერთი მეთოდი, რომელიც ბოლო დროს გავრცელდა და შედეგიანია:
კარგად გატარებული ნიგოზი ფენებად დავტკეპნოთ თასზე და ფენებს შორის მოუქციეთ ყველა საჭირო სანელებელი, რაც სჭირდება საცივს. კარგად გაანაწილეთ. შემდეგ კიდევ დატკეპნეთ და აქა-იქ თითებით ჩააღრმავეთ. აადუღეთ წყალი და ამ ნახვრეტებში ჩაასხით ისე, რომ ამოავსოთ _ არ აატივტივოთ მასა წყალში. დადგით ათი წუთით თავდახურული. მერე გაფუებულ ნიგოზს ფრთხილად გადაუწურეთ წყალი. დაიწყეთ მოზელა და თან გამოწურვა _ ზეთი მალე დადინდება.
