მიუხედავად იმისა, რომ ჩაის კულტურამ დაკარგა ძველი დიდება, გაიჩეხა და ამოიძირკვა ასეულობით ჰექტარი პლანტაცია, შემორჩენილ გაველურებულ თუ ნაწილობრივ მოვლილ ჩაის ფართობებზე მაინც იკრიფება ჩაის მწვანე მასა. ხშირად ეს ხდება სტიქიურად _ რომელიმე სოფელში რომელიმე კერძო პირი, არც თუ ურიგო დღიური ანაზღაურებით, სთავაზობს ადგილობრივ მოსახლეობას, მოკრიფოს ჩაი, რაშიც ხელზე უხდის ფულს.
ჩაის კულტურის აღდგენა-რეაბილიტაციის პროგრამა შეიმუშავა მთავრობამაც, თუმცა რეალური შედეგის დადგომამდე საკმაო დროა. ხალხსაც გადაავიწყდა ჩაის პლანტაციის მოვლა, მისი გასხვლა-ფორმირება.
გვინდა შევახსენოთ ჩაის მოვლის წესები ჩვენს დაინტერესებულ ფერმერებს, ვისაც საკუთრებაში აქვს ან აპირებს გააშენოს ახალი ჩაის პლანტაციები, რაც უკვე რეალურად არის მოსალოდნელი _ ამას საფუძველი ეყრება ჩაის რეაბილიტაციის პროგრამით.
15 თებერვლიდან სამ აპრილამდე, კარგი ამინდის პირობებში, უკვე უნდა დაიწყოთ ჩაის ბუჩქის გასხვლა და ფორმირება. ამ ოპერაციების ძირითადი მიზანია ჩაის მცენარისთვის მკვრივი და ფართოვარჯიანი, დაბუჩქული ფორმის მიცემა, რაც უზრუნველყოფს ზრდის წერტილების მასობრივ და ხანგრძლივ წარმოშობას და ჩაის ფოთლის კრეფის პროცესის გაადვილებას.
გაუსხლავი ჩაის მცენარე ივითარებს ნათლად გამოსახულ ტანს და მეჩხერ ვარჯს. ასეთ მცენარეებს ახასიათებს გაძლიერებული ყვავილობა და ვეგეტატიური ორგანოების შენელებული ზრდა-განვითარება.
მას, ვინც ახლა ჩაის კულტურის აღდგენას ან სულაც პირველად აპირებს გაშენებას, უნდა ახსოვდეს, რომ ამ კულტურის არსებობის მთავარი მიზანია, რაც შეიძლება მეტი ვეგეტატიური ორგანოების (ფოთოლი) მასა მივიღოთ. ამისთვის ჩაის მცენარეს სამი წლის ასაკში პირველად სხლავენ ნიადაგის ზედაპირიდან 10-15 სანტიმეტრის სიმაღლეზე, რომ მცენარემ დაიწყოს დაბუჩქება.
ამ წელს ჩაის ფოთლის კრეფა არ უნდა აწარმოოთ, რათა მცენარეზე განვითარდეს 8-10 ძლიერი ტოტი, რომლებიც შეადგენენ მომავალ ფოთოლსაკრეფ ბუჩქის ჩონჩხს. მომდევნო წელს ასეთ ბუჩქებს ჩაის ძირითად რაიონებში უკვე გასხლავთ 40-50 სმ სიმაღლეზე. იმ შემთხვევაში თუ ბუჩქები აღნიშნულ სიმაღლეს ვერ მიაღწევენ, შემდეგ წელს უნდა გასხლათ. მესამე და შემდგომ წლებში ბუჩქების გასხვლას აწარმოებენ შპალერული წესით ისე, რომ ბუჩქის ზედაპირს ნახევრად ოვალური ფორმა მიეცეს.
ზოგადად, გასხვლა უნდა აწარმოოთ წინა წელს გასხლულ დონეზე 5-10 სანტიმეტრით მაღლა, იმ ანგარიშით, რომ ბუჩქებზე მაისში ნაზარდი 2-3-კვირტიანი ნეკი დარჩეს.
გასხვლის ოპერაცია 15 თებერვლიდან შეიძლება გააგრძელოთ სამ აპრილამდე. დაბლობ, ვაკე ადგილებში, სადაც ყინვის საშიშროებაა, გასხვლა უნდა დაიწყოთ პირველი მარტიდან.
რაც შეეხება სრულხნოვან ჩაის პლანტაციას, მისი გასხვლის მიზანია: 1. ბუჩქზე ყლორტის წარმოქმნის უნარიანობის გაძლიერება და ნაყოფის მსხმოიარობის შემცირება; 2. ბუჩქების ნახევრად ოვალური ზედაპირის შექმნით კრეფის გაადვილება.
ყველა გასხვლის დროს ბუჩქებში ავადმყოფი და დაზიანებული ტოტები და ფოთლები გულდასმით უნდა გაიწმინდოს. თუ ვრცელი პლანტაცია გაქვთ, ან შეძლებთ ფართოდ მოახერხოთ მისი გაშენება, რაც უფრო სამთავრობო პროგრამებითაა შესაძლებელი, ასეთ დროს, რა თქმა უნდა, ჩაის პლანტაციების გასხვლა მექანიზებულად უნდა მოხდეს.
