როგორ უნდა გავარჩიოთ ყალბი გვერდები რეალურისგან – ოზურგეთში მედიაწიგნიერებაზე სამუშაო შეხვედრა გაიმართა

მედიაწიგნიერება არის პასუხი ციფრული საუკუნის გამოწვევებზე. მედიაწიგნიერება გულისხმობს ინფორმაციაზე კონტროლის დამყარებას. რაც უფრო მაღალია ადამიანის მედიაწიგნიერების ხარისხი, მით უფრო დიდია რეალურ სამყაროსა და მედიის მიერ შექმნილ სამყაროს შორის არსებული საზღვრის დანახვის უნარი. როდესაც ადამიანიმედიაწიგნიერია, ეს მას ეხმარება, სწორად გაიკვალოს გზა ინფორმაციის სამყაროში

თეონა ფურცხვანიძე, პროექტის მენეჯერი ჩვენთან საუბრის დროს აღნიშნა, რომ „21-ე საუკუნეში, როცა ციფრულ ტექნოლოგიებს ჩვენს ყოველდღიურ ცხოვრებაში დიდი ადგილი უჭირავს, მნიშვნელოვანია ვიცოდეთ როგორ გავფილტროთ ინფორმაცია.

„ რა არის ყალბი, რა არის ნამდვილი, როგორ უნდა ამოვიცნოთ პროპაგანდა, მანიპულაცია, დეზინფორმაცია. თითოეული ახალი ამბავი, რომელსაც ყოველდღიურად ვაწყდებით, ჩვენგან დამოუკიდებლად დიდ გავლენას ახდენს ჩვენზე და ხშირად, მსგავსი ინფორმაციის გამავრცელებელი თავადვე ვხდებით. ამრიგად, მეტად საყურადღებოა მოპოვებული ინფორმაციის სწორად დამუშავება და მხოლოდ ამის შემდეგ გაზიარება ფართო აუდიტორიისთვის. ჩვენი სამუშაო შეხვედრების მიზანიც სწორედ ესაა, რომ აამაღლოს ადგილობრივი მოსახლეობის ცნობიერება და ახალი ცოდნითა და უნარებით აღჭურვოს, რათა მათი თითოეული ნაბიჯი ინტერნეტ სივრცეში იყოს გადამოწმებული, ინფორმირებული და გააზრებული,“ – გვითხრა თეონა ფურცხვანაძემ.

ოზურგეთში სამუშაო შეხვედრების ტრენერი, ჟურნალისტი მარიკა ვაჭარაძე იყო.

„მედიაწიგნიერი საზოგადოება დღეს, როცა დეზინფორმაციის ნაკადი უწყვეტად მოედინება, განსაკუთრებით მნიშვნელოვანია. დეზინფორმაციის სამიზნეა ყველა ვინც სოციალურ ქსელს მოიახმარს. შესაბამისად მნიშვნელოვანია ვიყოთ შეიარაღებული ცოდნით რას ნიშნავს მედიაწიგნიერება, როგორ უნდა გავარჩიოთ ყალბი გვერდები რეალურისგან, მანიპულაციის რა მეთოდებს იყენებენ დეზინფორმაციის გასავრცელებლად. ტრენინგის სამიზნე აუდუტორია სწორად იყო შერჩეული – პედაგოგები. რადგან ეს ის ადამიანები არიან რომლებიც ავტორიტეტები არიან ახალგაზრდებში, მოსწავლეებში. მათი ინფორმირებულობა მნიშვნელოვანია მეტიც მათ ჩვენ მოვიაზრებთ ინფორმაციის გამტარებლად. შესაბამისად ვფიქრობ რომ ეს სამუშაო შეხვედრები სასარგებლო იყო მათთვის, რომელსაც სასკოლო ცხოვრებაში დამატებით რესურსად გამოიყენებენ”, _ აღნიშნა საუბრის დროს მარიკა ვაჭარაძემ.

ოზურგეთში მედიაწიგნიერების სამუშაო შეხვედრაზე ლანჩხუთის და ოზურგეთის საჯარო სკოლის ერთმა ნაწილმა პედაგოგებმა და მოსწავლეებმა მიიღეს მონაწილეობა.

ერთ-ერთი ჯგუფის მონაწილე, დაბა ნასაკირალის საჯარო სკოლის მასწავლებელი, ანა ბერაძე ამბობს, რომ ნებისმიერი პროფესიის ადამიანისთვის საინტერესო საკითხი იყო ტრენინგზე.

 ანა ბერაძე: თითოეულმა ჩვენგანმა  უნდა ავიღოთ მეტი პასუხისმგებლობა და ყველა ინფორმაციას არ უნდა ვენდოთ. რაც მთავარია უნდა ამოვიცნოთ დეზინფორმაცია და არ უნდა შევუწყოთ ხელი მის გავრცელებას. აუცილებლად გამოვიყენებ დღევანდელ ტრენინგზე ნასწავლ საკითხებს ჩემს მოსწავლეებთან. კიდევ ერთი მასწავლებელი, სოფელი ჩიბათიდან, ლადო აფხაზავა ჩვენთან საუბრის დროს აღნიშნავს, რომ დღევანდელ რეალობაში ყოველდღიურად ხდება სოციალურ ქსელებში ყალბი ან დეზინფორმაციის გავრცელება.

ლადო აფხაზავა: „დღეს ის პერიოდი, რომ სოციალურ მედიას ყველაზე მეტად იყენებენ ყალბი ინფორმაციის გასავრცელებლად გარკვეული ჯგუფები. ვფიქრობ, რომ მედიაწიგნიერების კუთხით განათლების ამაღლება ძალიან მნიშვნელოვანი და საპასუხისმგებლო საქმეა. ისეთი ადამიანები აღმოჩენილა დეზინფორმაციის და ყალბი ამბების მსხვერპლი… მრავლად არის სოციალური ქსელებში გაურკვეველი საინფორმაციო სააგენტოები, რომელიც დეზინფორმაციის გავრცელებით არიან დაკავებულები. აქედან გამომდინარე მსგავსი შინაარსის საგანმანათლებლო ღონისძიებები დღევანდელ დროს აუცილებელია.“

პროექტი „მედიაწიგნიერება დემოკრატიული და მდგრადი საზოგადოებისთვის საქართველოში“ ხორციელდება ჩეხური ორგანიზაცია „ფიფლ ინ ნიდ“-ის მიერ ჩეხეთის საგარეო საქმეთა სამინისტროს ფინანსური მხარდაჭერით, რადიო მარნეულთან თანამშრომლობით.