გასულ კვირაში, თბილისში, საქართველოში უახლოს პერიოდში დაგეგმილი სკოლების მშენებლობასთან დაკავშირებით დიდი შეხვედრა გაიმართა.
შეხვედრაში მონაწილეობა მიიღეს საქართველოს განათლების, მეცნიერებისა და ახალგაზრდობის მინისტრმა გივი მიქანაძემ, ინფრასტრუქტურის მინისტრმა რევაზ სოხაძემ, რეგიონული განვითარების მინისტრმა კახაბერ გულედანმა და მუნიციპალური განვითარების ფონდის დირექტორმა გიორგი შონიამ.
შეხვედრის შესახებ გავრცელებული ინფორმაცია საზოგადოებას „გურია ნიუსმა“ მიაწოდა (https://gurianews.com/mkholod-tsiphrebi-da-arapheri-konkretuli-_-ra-inphormatsias-avrtselebs-ganathlebis-saministro/).
ამ შეხვედრიდან რამდენიმე საათში ჩოხატაურის #1 საჯარო სკოლის დირექტორმა, ეთერ წილოსანმა გაავრცელა ინფორმაცია, რომ სკოლის მშენებლობა წლის ბოლომდე დაიწყება.
შემდეგ კი ჩოხატაურის საგანმანათლებლო რესურსცენტრის უფროსმა შორენა სიხარულიძემ ფეისბუქზე შემდეგი სახლის ინფორმაცია გაავრცელა.
„ძვირფასო მოსწავლეებო, მშობლებო და პედაგოგებო, მოხარული ვარ, გაცნობოთ, რომ სსიპ ნიკო მარის სახელობის დაბა ჩოხატაურის პირველი საჯარო სკოლის მშენებლობა მიმდინარე წელსვე დაიწყება.
აღნიშნული გადაწყვეტილება 2026 წლის 18 ივნისს გამართულ შეხვედრაზე ეცნობა სასკოლო საზოგადოების წარმომადგენლებს, რომელშიც მონაწილეობდნენ საქართველოს განათლების, მეცნიერებისა და ახალგაზრდობის მინისტრი გივი მიქანაძე, ინფრასტრუქტურის მინისტრი რევაზ სოხაძე, რეგიონული განვითარების მინისტრი კახაბერ გულედანი და მუნიციპალური განვითარების ფონდის დირექტორი გიორგი შონია.
ახალი სკოლის მშენებლობა წარმოადგენს მნიშვნელოვან ნაბიჯს ჩვენი მუნიციპალიტეტისა და თითოეული მოსწავლის უკეთესი მომავლისთვის. გვჯერა, რომ ერთობლივი თანამშრომლობითა და ურთიერთნდობით შევძლებთ ამ მნიშვნელოვანი პროცესის წარმატებით განხორციელებას.
მადლობას გიხდით მხარდაჭერისთვის, მოთმინებისა და ნდობისთვის.
ჩოხატაურის საგანმანათლებლო რესურსცენტრი მომავალშიც უზრუნველყოფს საზოგადოების სრულ და დროულ ინფორმირებას პროექტის მიმდინარეობის ყველა ეტაპზე.“
როგორც „გურია ნიუსისთვის“ გახდა ცნობილი, ამ ეტაპზე ორი სამინისტროს მიერ დაორგანიზებულ შეხვედრაზე მიწვეული ლანჩხუთის მუნიციპალიტეტიდან არ იყვნენ. აქედან გამომდინარე, ისევ გაურკვეველია იქ არსებული სკოლის მშენებლობის საკითხი.
რაც შეეხება ოზურგეთს აღნიშნულ შეხვედრაზე იმყოფებოდა ოზურგეთის საგანმანათლებლო რესურსცენტრის დირექტორი, ლალი სიჭინავა, ასევე სოფელ ნაგომრის საჯარო სკოლის დირექტორი ნოდარ წიტაიშვილი.
„შეხვედრაზე ნამდვილად იყო საუბარი სოფელ ნაგომრის საჯარო სკოლის მშენებლობის დაწყების თაობაზე. ეს მშენებლობა საგანმანათლებლო და სამეცნიერო ინფრასტრუქტურის განვითარების სააგენტოს უნდა განეხორციელებინა (როგორც ცნობილია, აღნიშნული სააგენტო გაუქმდა. ავტ.). შეხვედრაზე, ასევე, საუბარი იყო ჯუმათის საჯარო სკოლის მშენებლობის დაწყების პროცესზე“, _ გვითხრა ლალი სიჭინავამ.
„ამ თვეში უნდა დასრულდეს შენობის დემონტაჟი და ამასობაში დასრულდება პროექტირებაც, რასაც მოჰყვება სკოლის შენობის მშენებლობა. ჩემი ინფორმაციით, ამ წელში უნდა დაიწყოს მშენებლობა“, _ აღნიშნა ჩვენთან სატელეფონო საუბრის დროს ნოდარ წიტაიშვილმა.
„გურია ნიუსი“ მუნიციპალური განვითარების ფონდს დაუკავშირდა.
„ამ დროისთვის მიმდინარეობს სოფელ ნაგომრის საჯარო სკოლის საპროექტო დოკუმენტაციების მომზადება“, _ გვითხრეს მუნიციპალური განვითარების ფონდის პრესსამსახურში.
(ფოტო: ოზურგეთის მუნიციპალიტეტის, სოფელ ნაგომრის სკოლის დემონტაჟი. გადაღებულია 2026 წლის 28 მარტს)
ავტორი
