იტალიური მედიის მტკიცებით, „ნაპოლის“ მთავარმა მწვრთნელმა რუდი გარსიამ გუნდში ე.წ. ბრძენკაცთა საბჭო შექმნა.
ფრანგმა სპეციალისტმა განაცხადა, რომ ამ მეთოდს ყველა გუნდში მიმართავდა, სადაც უმუშავია. გარსიას ჩამოყალიბებულ საბჭოში პიოტრ ჟიელინსკი, ალექს მერეტი, მარიო რუი, ამირ რაჰმანი, ჟუან ჟეზუში, ანდრე-ფრანკ ზამბო ანგისა და ჯოვანი დი ლორენცო შედიან.
სიაში არ არიან ხვიჩა კვარაცხელია და ვიქტორ ოსიმენი. ნეაპოლური გამოცემები წერენ, რომ ამის მიზეზი მარტივია – ფეხბურთელების ასაკი და „ნაპოლიში“ თამაშის გამოცდილების ნაკლებობა.
ვეტერანმა იტალიელმა ფეხბურთელმა ფრანჩესკო ბაიანომ კი ხვიჩა კვარაცხელიაზე ისაუბრა.
„რაც მან აჩვენა, გამოჩნდა, რომ ძალიან კარგი ფეხბურთელია. თვისებები აქვს და შეუძლია „სერია A“-ს ყველაზე დიდი სიურპრიზი იყოს, ამას ვისურვებდი მისთვის და პირველ რიგში „ნაპოლის“ გამო. თუმცა, აბსურდულ და მკრეხელურ შედარებებს არ გავაკეთებდი, ვიცი, რომ მას კვარადონას ეძახიან, მაგრამ მოდი, დიეგოს შევეშვათ და პირველ რიგში იმიტომ, რომ ქართველს ზედმეტი წნეხის გარეშე განვითარების საშუალება მივცეთ“, – განაცხადა ფრანჩესკა ბაიანომ.
„პარმას“ ყოფილი სპორტული დირექტორი ენრიკო ფედელე მიიჩნევს, რომ ხვიჩა კვარაცხელია დიდი ტალანტია, მაგრამ „ნაპოლი“ არ არის დამოკიდებული ერთი ფეხბურთელის გოლებზე, როგორც მაგალითად „ინტერი“ ან „მილანი“.
„კვარაცხელია ტალანტია. თუმცა, „ნაპოლის“ ჰყავს ფეხბურთელები, რომლებსაც გოლის გატანა შეუძლიათ. “ნაპოლი” კვარაზე არ არის დამოკიდებული ისე, როგორც „ინტერი“ ლაუტაროს გოლებზე ან „მილანის“ ჟირუს გოლებზე“, – თქვა ფედელემ.
„ნაპოლი“ სერია A-ს მერვე ტურში დღეს ფლორენციის „ფიორენტინას“ უმასპინძლებს.
გუშინ, ესპანურმა გამოცემამ „Relove” სკანდალური ინფორმაცია გაავრცელა. ცნობილი გახდა რომ უეფა საქართველოს და სომხეთის ფუტსალის ნაკრებების დასჯას აპირებს.
მიზეზად საქართველოს და სომხეთის ნაკრებებში, შესაბამისად, პორტუგალიასა და ფინეთთან მატჩებში, სხვა ქვეყნების წარმომადგენელი მოთამაშეების გამოყენებაა – საქართველოს შემთხვევაში რვა ბრაზილიელის, ხოლო სომხეთის შემთხვევაში – შვიდი ბრაზილიელისა და ორი რუსის. საუბარია ნატურალიზაციის წესის დარღვევაზე, რამდენადაც, აღნიშნულ ფეხბურთელებს არასდროს უთამაშიათ ადგილობრივ ლიგებსა თუ კლუბებში.
20 სექტემბერს, საქართველოს ფუტსალის ნაკრებმა მსოფლიოს ჩემპიონატის ელიტ რაუნდის E ჯგუფის მეორე შეხვედრა სტუმრად პორტუგალიასთან ანგარიშით 2:4 დათმო, სომხეთმა კი შინ ფინეთთან 2:3 დამარცხდა.
ამ დროისთვის ავთანდილ ასათიანს ნაკრებში 8 ნატურალიზებული მოთამაშე ჰყავს
უეფას კონტროლის, ეთიკისა და დისციპლინის კომიტეტი, პორტუგალიისა და ფინეთის საჩივრის საფუძველზე, ევროპულ ფუტსალში ისტორიული გადაწყვეტილების გამოცხადებისთვის ემზადება, რომელიც ნატურალიზაციის წესის გამკაცრებას გულისხმობს. ამავდროულად, ზემოთ მოყვანილ ორივე თამაშში საქართველოს და სომხეთს 0:5 წაგება ჩაეთვლებათ.
ცნობილი გახდა, რომ „რომას“ მთავარ მწვრთნელ ჟოზე მოურინიოს სამსახურიდან დათხოვნა ემუქრება.
„კალიარისთან“ მატჩი პორტუგალიელის ბედს განსაზღვრავს – მარცხის შემთხვევაში რომ აული კლუბის ხელმძღვანელობა „განსაკუთრებულს“ კარისკენ მიუთითებს.
„რომამ“ ეს სეზონი ცუდად დაიწყო და 7 ტურში მხოლოდ 8 ქულა მოიპოვა (2 მოგება, 2 ფრე, 3 წაგება). ჯერჯერობით, უცნობია, ვინ განიხილება მოურინიოს პოტენციურ მემკვიდრედ რომაულ კლუბში
ისრაელში კი სამხედრო კონფლიქტის დაწყების შემდეგ ყველა სპორტული ღონისძიების გაუქმება, გადადება ან სხვა ქვეყანაში გადატანა იგეგმება. ჯერჯერობით გაურკვეველია, სად და როდის ჩატარდება ევრო 2024-ის საკვალიფიკაციო ციკლის მე-7 ტურის მატჩი ისრაელი-შვეიცარია.
7 ოქტომბერს ისრაელის თავდაცვის ძალებმა სამხედრო ოპერაცია ღაზას სექტორში დაიწყო, რასაც წინ პალესტინური მხრიდან მასირებული სარაკეტო იერიში უძღოდა.
შექმნილი ვითარების გამო, ისრაელის კულტურისა და სპორტის სამინისტრომ ქვეყანაში უახლოეს დღეებში დაგეგმილი ყველა სპორტული ღონისძიების გაუქმება გადაწყვიტა. ამ შაბათ-კვირას ისრაელის საფეხურთო პრემიერლიგის 7 მატჩი უნდა ჩატარებულიყო.
ჯერჯერობით გაურკვეველია ისრაელის კლუბებისა და ნაკრებების საერთაშორისო მატჩების ბედი. 12 ოქტომბერს ისრაელის ეროვნულ გუნდს ევრო 2024-ის შესარჩევ ციკლში, შვეიცარიისთვის უნდა ემასპინძლა. ეს შეხვედრა ან გადაიდება, ან კვიპროსში გაიმართება. საბოლოო გადაწყვეტილებას უეფა დღეს მიიღებს.
ავტორი
