„მაშინ, როცა საპარლამენტო არჩევნების ჩატარებამდე 2 წელიწადზე ნაკლები რჩება, რიგგარეშე არჩევნების ჩატარება, ვფიქრობ, აბსოლუტურად არალოგიკურია. ჩვენ ვთქვით, რომ ერთ წელიწადში ქვეყნისთვის მაქსიმალურად სასიკეთო ცვლილებები უნდა განვახორციელოთ, რისთვისაც ამომრჩეველმა დრო უნდა მოგვცეს“, _ აღნიშნა „გურია ნიუსთან“ მმართველი პარტიის დეპუტატმა ალექსანდრე ქანთარიამ.
მისივე თქმით, საარჩევნო კოდექსში არსებობს ხარვეზები, რომლებიც სამოქალაქო სექტორის ჩართულობით, აუცილებლად უნდა გამოსწორდეს.
“რაც შეეხება საარჩევნო კოდექსს, მასში ხარვეზები ნამდვილად არის, რასაც სამოქალაქო სექტორის ჩართულობით აუცილებლად გამოვასწორებთ“,_ აღნიშნავს ქანთარია.
_ ბატონო ალექსანდრე, კონსტიტუციის მიხედვით, მაჟორიტარულ სისტემის გაუქმება და მთლიანად პროპორციულ სისტემაზე გადასვლა 2024 წლამდე არ იგეგმება. აღნიშნული კანონმდებლობის მიღებით, რატომ ცდილობს „ქართული ოცნება“ კომფორტი შეუქმნას საკუთარ პარტიას და პარლამენტში მრავალპარტიული სისტემის ზრდა შეაფერხოს?
_ გუნდში საკმაოდ დიდი სჯა-ბაასის შემდეგ მივიღეთ გადაწყვეტილება, რომ მაჟორიტარული სისტემა 2024 წელს გაუქმდეს, თუმცა არ გამოვრიცხავ, რომ განხილვა განახლდეს იმის შესახებ, რომ მთლიანად პროპორციულ სისტემაზე 2020 წლისთვის გადავიდეთ. თუ მაჟორიტარულ სისტემას ვაუქმებთ 2024 წელს, რატომ არ უნდა გავაუქმოთ 2020 წელს?! ეს უფრო გაჯიუტებას ჰგავს. აღნიშნულ საკითხთან დაკავშირებით გუნდში უნდა შევთანხმდეთ.
_ხელისუფლებისთვის ულტიმატუმების წაყენების შემდეგ, ჩანს, რომ ოპოზიცია უკან დახევას არ აპირებს. როგორ ფიქრობთ, მოთხოვნების დაუკმაყოფილებლობის შემთხვევაში, გაერთიანება „ძალა ერთობაშია“ ქვეყანაში დესტაბილიზაციის მოწყობისთვის მზადებას დაიწყებს?
_ ოპოზიციას არეულობის სურვილი შეიძლება ჰქონდეს, მაგრამ მათ დესტაბილიზაციის მოწყობის რესურსი არ გააჩნიათ. ოპოზიცია იბერება, რომ 800 ათასმა ადამიანმა მისცა ხმა, რაც არ ნიშნავს იმას, რომ ეს ადამიანები ქვეყანაში არეულობის მოწყობას ემხრობიან.
ქვეყანაში დესტაბილიზაცია განსაკუთრებით მიხეილ სააკაშვილს სურს, რომელიც დღე და ღამე ოცნებობს არეულობაზე, თუმცა ვხედავთ, რომ მისი სურვილები და მოწოდებები მისივე თანაგუნდელებისთვის არის მიუღებელი.
_ საპრეზიდენტო არჩევნების მეორე ტურის შემდეგ, ქვეყნის მესამე პრეზიდენტის მიერ გაკეთებული განცხადებით, რომელშიც მიხეილ სააკაშვილი მასობრივ დაუმორჩილებლობაზე საუბრობს, სამართალდამცავი უწყებები დაინტერესდებიან?
_ მოვუწოდებთ შესაბამის სტრუქტურებს, რომ სააკაშვილის ამ განცხადებით დაინტერესდნენ, რადგან მასში ნამდვილად იკვეთება დანაშაულის ნიშნები.
