ცოტა ხნის წინ, საგანმანათლებლო კანონში ცვლილება შევიდა, რომლის მიხედვითაც, სასწავლო წლის დაწყების თარიღად 15 სექტემბერი განისაზღვრა.
აღნიშნული ცვლილება საზოგადოების ნაწილმა დისკრიმინაციულად მიიჩნია იმ ბავშვების მიმართ, ვისაც 6 წელი სასწავლო წლის დაწყების მომდევნო დღეს უსრულდება.
პეტიციას, რომელიც მარინა გულისაშვილმა Manifest.ge-ზე ცოტა ხნის წინ გამოაქვეყნა, 500 ხელმომწერი ჰყავს.
„მოგეხსენებათ, ახლანდელი კანონის თანახმად, პირველ კლასში იღებენ მხოლოდ იმ ბავშვებს რომლებსაც სასწავლო წლის დაწყებამდე (15, ზოგჯერ 17 სექტემბრამდე) შეუსრულდათ 6 წელი. ვფიქრობ, ეს კანონი არის დისკრიმინაციული და არღვევს იმ ბავშვების უფლებებს ვინც 15 სექტემბრიდან 31 დეკემბრის ჩათვლით დაიბადა. უფრო სამართლიანი იქნება, ყველა ბავშვს ჰქონდეს თანაბარი უფლება სკოლაში მისვლისა და რამოდენიმე დღისა თუ თვის გამო არ დააკარგვინონ მთელი წელი.
მოსაზრება, იმის შესახებ, რომ 5 წლის ბავშვი მზად არაა სკოლისთვის, ამ შემთხვევაში საფუძველს მოკლებულია, რადგან შეუძლებელია 15 სექტემბერს დაბადებული ბავშვი მზად იყოს სკოლისთვის, ხოლო 16 სექტემბერს დაბადებული ბავშვი, რომელიც ჯერ ისევ 5 წლისაა და სასწავლო წლის დაწყებამდე 1 დღე უკლია 6 წლამდე, უკვე აღარაა მზად სკოლისთვის. ეს არის დისკრიმინაცია! ბავშვის უფლების დარღვევა!
მოვითხოვ, პარლამენტმა შეიტანოს კანონში ცვლილება და კონკრეტული წლის 1 იანვრიდან 31 დეკემბრის ჩათვლით დაბადებულ ბავშვებს მისცენ თანაბარი უფლება პირველ კლასში მისასვლელად“, _წერია პეტიციაში.
არის თუ არა საგანმანათლებლო სისტემის ახალი კანონი დისკრიმინაციული_ ამ საკითხზე „გურია ნიუსს“ ორგანიზაცია „ახალგაზრდა ადვოკატების“ კონსტიტუციონალისტი გიორგი ლაბაძე ესაუბრა.
როგორც ის აღნიშნავს, კანონი ყოველთვის ყველას მოსაწონი ვერ იქნება.
„კანონი, რომელიც საქართველოში შემოიღეს, ახალი არ არის. სხვა ქვეყნებში დიდი ხანია მოქმედებს, იქაც, სკოლაში ბავშვის მიღება დამოკიდებულია იმაზე, არის თუ არა ის 6 წელს მიღწეული. შესაძლებელია, სახელმწიფომ მიიღოს გადაწყვეტილება და სკოლაში იმ ბავშვების დარეგისტრირებაც გახდეს შესაძლებელი, ვინც 6 წლის სასწავლო წლის დაწყებისთვის განსაზღვრული თვის ბოლომდე ხდება. როგორც ფსიქოლოგები ამბობენ, ის კონკრეტული ასაკი ბავშვის ფსიქოლოგიისთვის მნიშვნელოვანია. კანონი ყოველთვის ყველასთვის მოსაწონი ვერ იქნება. მივიჩნევ, როგორც არის რეგულაცია ისე დარჩეს“, _ამბობს ლაბაძე.
როგორც ცნობილია, წელს სკოლაში დარეგისტრირების შესაძლებლობა იმ ბავშვებსაც აქვთ, ვისაც 6 წელი 17 სექტემბრამდე უსრულდებათ.
როგორც განათლებისა და მეცნიერების სამინისტროში „გურია ნიუსს“ უთხრეს კანონი სამინისტროს ზეპირად არ მიუღია და შესაბამისად, ის დისკრიმინაციული ვერ იქნება.
„რამდენიმე წლის წინ არ იყო დაზუსტებული სწავლის დაწყების თარიღი. კანონით განისაზღვრა, რომ სწავლა დაიწყება 15 სექტემბერს. წელს 15 სექტემბერი გამოდის პარასკევი, ამიტომ სკოლაში მიიღებიან 17 სექტემბერს დაბადებული ბავშვებიც. კანონი დისკრიმინაციული ვერ იქნება. სწავლის დაწყებისას ბავშვი უნდა იყოს 6 წლის. სამინისტროს გადაწყვეტილება ზეპირად არ მიუღია და ჩატარდა შესაბამისი კვლევა ბავშვის სასკოლო მზაობის შესახებ. ევროპაში არსებობს ქვეყნები, სადაც სწავლას 7 წლის ასაკში იწყებენ“, _ამბობენ სამინისტროში.
