საქართველოს სახალხო დამცველი ნინო ლომჯარია საქართველოს ეროვნული ნაკრების ვიცე-კაპიტნის გურამ კაშიასთვის უეფას მიერ დაწესებული #EqualGame-ის ჯილდოს გადაცემის ფაქტს ეხმიანება და მას თანასწორობისთვის ბრძოლაში შეტანილი წვლილის საერთაშორისო აღიარებას ულოცავს.
საქართველოს სახალხო დამცველის, როგორც თანასწორობის ორგანოს პრაქტიკა ცხადყოფს, რომ დისკრიმინაციის განხორციელების ერთ-ერთი მთავარი მიზეზი სწორედ საზოგადოებაში დამკვიდრებული მცდარი სტერეოტიპები და წინასწარი განწყობებია. აღნიშნულს ადასტურებს გურამ კაშიას წინააღმდეგ მიმართული საზოგადოების ცალკეული ჯგუფების აგრესია, რომლის მიზეზი მის მიერ თანასწორობის იდეის ღიად მხარდაჭერა გახდა.
“გურამ კაშიას ქმედებამ ნათლად წარმოაჩინა, თუ რა მნიშვნელოვანი წვლილი შეიძლება შეიტანოს ერთმა სიმბოლურმა ჟესტმა ჩაგრული ადამიანების მხარდაჭერის და თანასწორობის იდეის პოპულარიზაციაში. სწორედ ამიტომ, ეროვნული ნაკრების წევრობა დიდ პატივთან ერთად, დიდი პასუხისმგებლობაცაა”, _ აღნიშნულია გავრცელებულ განცხადებაში.
საქართველოს სახალხო დამცველი მხარდაჭერას უცხადებს გურამ კაშიას და წარმატებებს უსურვებს საქართველოს ფეხბურთის ეროვნულ ნაკრებს.
შეგახსენებთ, რომ გურამ კაშიას წინააღდეგ კამპანია 22 აგვისტოს, მას შემდეგ წამოიწყეს, რაც ცნობილი გახდა, რომ უეფა . ქართველ ფეხბურთელს ერთი წლის წინ ლგბტ სამკლაურის გაკეთების გამო თანასწორობის ჯილდოს გადასცემს.
მრავალათასიანი საპროტესტო აქციით, კაშიას, თავდაპირველად “პატრიოტთა ალიანსის” წევრი გიორგი მორგოშია დაემუქრა. მოგვიანებით, მას თანამოაზრეებიც შეუერდნენ.
ამის პარალელურად კი საქართველოს ეროვნული ნაკრების ვიცე-კაპიტანს ქართველი ქომაგები სოლიდარობას უცხადებენ.
კაშიას მხარდაჭერა გამოუცხადეს საქართველოს ფეხბურთის ფედერაციის პრეზიდენტმა ლევან კობიაშვილმა, ფეხბურთის ფედერაციის ვიცე-პრეზიდენტმა ნიკა ჯღარკავამ; საქართველოს ნაკრების ფეხბურთელებმა, სპორტის ქომაგებმა; ქართველ მუსლიმთა კავშირმა.
#გურამშენთანვართ ამ ჰეშთეგით მიმდინარეობს კაშიას მხარდამჭერი კამპანია სოციალურ ქსელში, რომელსაც ათასობით ადამიანი შეუერთდა.
.jpg)
