28 მაისს, ოზურგეთის მუნიციპალიტეტის საკრებულოს მორიგი სხდომა შედგა, სადაც საკრებულოს თავმჯდომარემ დავით დარჩიამ საკრებულოს წევრებს და ყველა დამსწრეს დღის წესრიგით გათვალისწინებული 7 საკითხი გააცნო.
პირველ საკითხზე, “ოზურგეთის იმ დასახლებათა ნუსხის დამტკიცების შესახებ, სადაც ავტოსადგური არ არის და საიდანაც ხორციელდება საქალაქთაშორისო რეგულარული სამგზავრო გადაყვანა და სავალდებულო არ არის ავტოსადგურიდან რეისის გასვლა”, _ დადგენილებაში ცვლილების შესახებ, მუნიციპალიტეტის მერიის ტრანსპორტის განყოფილების გამგემ, თემურ მურვანიძემ ისაუბრა.
მან თქვა, რომ ამ ცვლილების საფუძველია საქართველოს მთავრობის მიერ მომზადებული რეფორმა. ხოლო დადგენილება მიღებულია ოზურგეთის საკრებულოს მიერ 2025 წლის 14 მარტს, რომელშიც აღნიშნული ცვლილება შედის და მასში ამოღებულია სიტყვა “საქალაქთაშორისო”.
ახალი დადგენილებით, დანართი ჩამოყალიბდა ახალი რედაქციით და მასში მითითებულია მუნიციპალიტეტის 28 დასახელების ნუსხა, სადაც ავტოსადგური არ არის და სავალდებულო არ არის ავტოსადგურიდან რეისის გასვლა.
ოზურგეთის მუნიციპალიტეტის 2025 წლის ბიუჯეტის პირველი კვარტლის შესრულების ანგარიშის მიმოხილვა წარმოადგინა საფინანსო სამსახურის უფროსმა პავლე ჭყონიამ.
მან დააკონკრეტა, რა მიმართულებით რამდენი პროცენტით შესრულდა ბიუჯეტი, ხაზი გაუსვა , რომ ბიუჯეტის მიხედვით 13 სამედიცინო პროგრამა ხორციელდება:
_ შემოსავლებში კაპიტალური ტრანსფერები გაიზარდა 10. 926 761 ლარით. შესაბამისად გადასახდელები გაიზარდა: ა) გზების მშენებლობა და რეაბილიტაცია, არაფინანსური აქტივების ზრდა, გზები 10.863026 ლარით, 2) საზოგადოებრივი დანიშნულების შენობების რეაბილიტაცია, არაფინანსური აქტივების ზრდა მოხდა 63 735 ლარით.
ბიუჯეტის დაზუსტების გათვალისწინებით ოზურგეთის მუნიციპალიტეტის 2025 წლის ბიუჯეტი, პირველი აპრილისთვის განისაზღვრა 54326,8 ათასი ლარით, _ თქვა ჭყონიამ
პავლე ჭყონიამ საკრებულოს წევრებს გააცნო 2025 წლის პირველი კვარტლის შემოსავლები თუ რამდენი პროცენტით შესრულდა:
ქონების გადასახადის გეგმა 1,89%-ით (ანუ წლიური გეგმა 8600,0 ათასი ლარის, შესრულება კი კვარტლის მიხედვით არის 100,9 ათასი ლარი); დღგ-ს გადასახადის გეგმა შესრულდა 22,37 %-ით, ბუნებრივი რესურსებით სარგებლობის მოსაკრებლის გეგმა შესრულდა 45,48%-ით.
მან, ასევე, წარმატებით შესრულებულად დაასახელა მიწის იჯარის შემოსავალი, მოსახლეობის ტერიტორიის დასუფთავებისთვის მოსაკრებლის შერეული და სხვა არაკლასიფიცირებული შემოსავლების შესრულება.
რაც შეეხება უმნიშვნელოვანეს საკითხს, ფინანსურ დახმარებას სტიქიის კუთხით, რაც ასე მასშტაბური იყო 2025 წელს გურიაში, ეს არის 1205,4 ათასი ლარი. კვარტალში საერთაშორისო ორგანიზაციებიდან და სხვა ქვეყნის მთავრობიდან მიღებული გრანტები (UNDP _ გაერო) არის 66,8 ათასი ლარი.
პავლე ჭყონიამ, ასევე, ისაუბრა, რა მდგომარეობაა ოზურგეთის მუნიციპალიტეტის 2025 წლის ბიუჯეტის დამტკიცებული სარეზერვო ფონდის ხარჯვის მხრივ, 2025 წლის 31 მარტის მდგომარეობით:
_ სააფთიაქო მედიკამენტების შესაძენად გაცემული დახმარებები, სამედიცინო მომსახურების მიზნით მოქალაქეთა პირად ანგარიშზე თანხის ჩარიცხვა, სხვადასხვა სამედიცინო დაწესებულებაში მკურნალობის ხარჯების თანადაფინანსებისთვის, სარიტუალო ხარჯებისთვის გაწეული დახმარების, განათლების ღონისძიებებისთვის, სულ კვარტალში გაწეული ხარჯი შეადგენს 36 631 ლარს.
კვარტლის მიხედვით, როგორც პავლე ჭყონიამ თქვა ყველაზე მეტი სამუშაო პრიორიტეტულ ინფრასტრუქტურულ მიმართულებაზე მოდის და პროცენტული შესრულებაც შესაბამისად მაღალია აქაც, _ ოზურგეთის მუნიციპალიტეტში საგზაო ინფრასტრუქტურის განვითარების მიზნით ხორციელდება უამრავი პროექტი. 2024 წელს დაიწყო და კვლავ მიმდინარეობს სოფელ ნატანებში, ჯაფარეული–ახალშენის გზის რეაბილიტაცია, რომლის ღირებულება 2467933,11 ლარია, სიგრძით 4870 გრძივი მეტრი. მიმდინარე წელს გახორციელებული სამუშაოების საკასო შესრულებამ შეადგინა 1 278 961,74 ლარი…
ეს და მრავალი სხვა პროექტი, სამუშაოების შესრულების კვარტალური შედეგებით, პავლე ჭყონიამ საუკეთესო მაჩვენებლით წარმოადგინა.
საკრებულოს წევრებს ამ საკითხის ირგვლივ შენიშვნები არ გამოუთქვამთ და 2025 წლის ბიუჯეტის კვარტალურ შესრულებას მხარი დაუჭირეს _ ანგარიშის ცნობად მიღება დაადასტურეს.
საკრებულომ, ასევე, მხარი დაუჭირა საკითხს: ქალაქ ოზურგეთში დავით აღმაშენებლის ქუჩაზე ავტოსადგურის განთავსების მიზანშეწონილობის შესახებ.
მიუხედავად იმისა, რომ არა ერთმა წევრმა აღნიშნა, რომ ამ ავტოსადგურში მისი ტერიტორიული სიმცირის გამო, რთული იქნება ახალი დიდი ავტობუსების ერთობლივად თუ მონაცვლეობით შესვლა და გასვლაც, განკარგულებას მაინც მხარი დაუჭირეს.
თუ როგორ განვითარდება ამ კუთხით მოვლენები, ამას უახლოესი მომავალი გვიჩვენებს.
საკრებულოს გადაწყვეტილებით, ასევე დამტკიცდა სამართლებრივი აქტების პროექტები, მათ შორის, ოზურგეთში დავით აღმაშენებლის, აპოლონ წულაძის ქუჩებსა და დაბა ურეკში ექვთიმე თაყაიშვილის ქუჩაზე ავტოსადგურის განთავსების მიზანშეწონილობაზე.
საკრებულოს წევრებმა მხარი დაუჭირეს განკარგულებას: “რეგიონებში გასახორციელებელი პროექტების ფონდიდან, ოზურგეთის მუნიციპალიტეტში გასახორციელებელი ინფრასტრუქტურული პროექტების” შესახებ.
სხდომაზე, ასევე, მუნიციპალიტეტის 2025 წლის ბიუჯეტის პირველი კვარტლის შესრულების ანგარიშთან ერთად, განიხილეს სახელმწიფო აუდიტის სამსახურის 2024 წლის 6 თვის საქმიანობის ანგარიში.
ავტორი
