ორი დღის წინ, NBA-ში რეგულარული სეზონი დასრულდა. სანდრო მამუკელაშვილის „სან ანტონიო“ სტუმრად „დალასს“ დაუპირისპირდა და დამაჯერებლად იმარჯვა – 138:117.
ქართველმა ჩემპიონატის ბოლო მატჩი შესანიშნავად ჩაატარა. დაგროვილი 23 ქულის გარდა სანდრომ 11 მოხსნა (აქედან 3 – შეტევაში), 4 პასი და 1 დაფარება მიითვალა. ეს მისი მეორე ორმაგი დუბლია სეზონში.
მამუკელაშვილმა, რომელიც სასტარტოში იყო, მოედანზე 31:27 წუთი გაატარა, 10-დან ოთხი 2-ქულიანი, 7-დან ოთხი 3-ქულიანი და 6-დან 3 საჯარიმო გამოიყენა.
რამდენიმე დღის წინ, გამოცემა „სან ანტონიო ექსპრესში“ სანდრო მამუკელაშვილზე წერილი გამოქვეყნდა.
„მაშინ პატარა ვიყავი, თან ამერიკაში ვცხოვრობდი და ვერ ვაცნობიერებდი, როგორ იმოქმედა 2008 წლის ომმა საქართველოზე. ჩემი მეგობრები მიყვებოდნენ, მათმა ძმებმა როგორ აიღეს იარაღი სამშობლოს დასაცავად“, – განაცხადა ინტერვიუში მამუკელაშვილმა, რომელიც ნიუ იორკში დაიბადა, თუმცა ოჯახი მალევე საქართველოში დაბრუნდა და სანდროც თბილისში გაიზარდა.
საქართველოს შემდეგ რუსეთი უკრაინაში შეიჭრა.
„უკრაინის გვერდით ვდგავარ. მივესალმები ყველას, ვინც სამშობლოს დასაცავად იბრძვის. ძალიან მძიმე სიტუაციაა. იმედი მაქვს, ყველაფერი მალე დასრულდება და ცხოვრება ნორმალურ რიტმს დაუბრუნდება“,– თქვა სანდრომ.
ამის შემდეგ სიტყვა ამერიკელმა ჟურნალისტმა აიღო:
„მამუკელაშვილის სამშობლო საქართველოა, სადაც მოსახლეობა 3,7 მილიონია – იმაზე ნაკლები, ვიდრე სამხრეთ კაროლინაში.
ამ „პატარა ქვეყანას“ NBA-ში ღირსეული წარმომადგენელი ჰყავს: მამუკელაშვილმა „სან ანტონიოს“ გულშემატკივრებს თავი დაამახსოვრა სროლის მაღალი სიზუსტითა და გამთამაშებლისთვის დამახასიათებელი ტექნიკით.
მას მარტში „მილუოკიმ“ კონტრაქტი გაუწყვიტა, თუმცა უგუნდოდ დიდხანს არ დარჩენილა – „სან ანტონიო სფურზმა“ აიყვანა. ჩემპიონობის მაძიებელი „მილუოკიდან“ „მშენებარე” „სან ანტონიოს“ გადასვლის შემდეგ 23 წლის ქართველმა საკმარისი სათამაშო დრო მიიღო“.
„ძალიან მადლიერი ვარ შანსისთვის, რომელიც ახალ კლუბში მომცეს. „მილუოკი ბაქსში“ იმდენად დიდია კონკურენცია, მცირე სათამაშო დრო მქონდა. „სან ანტონიოში“ მოხვედრა ჩემთვის ძალიან ბევრს ნიშნავს. სადაც არ უნდა ვითამაშო, “სფურზის” ყოველთვის მადლობელი ვიქნები“, – განაცხადა წერილის დასასრულს სანდრო მამუკელაშვილმა.
ხვალ, ჩემპიონთა ლიგის მეოთხედფინალური სტადიის პირველ შეხვედრაში „მილანი“ ხვიცა კვარაცხელიას „ნაპოლის“ უმასპინძლებს. ნეაპოლურ კლუბში ამჟამად არაერთი საკადრო პრობლემაა, რომელთაგანაც უპირველესი მაინც ნიგერიელი ვიქტორ ოსიმენის ჯანმრთლობის მდგომარეობაა.
რასაკვირველია „მილანი“ – „ნაპოლის“ დაპირისპირების წინ ფეხბურთის სპეციალისტებისაგან არაერთ ვარაუდს ვისმენთ.
ლეგენდარულმა იტალიელმა მწვრთნელმა ფაბიო კაპელომ განაცხადა, რომ ვიქტორ ოსიმენთან ერთად „ნაპოლი“ „მილანთან“ ფავორიტი იქნება.
„ოსიმენზე ბევრი რამ იქნება დამოკიდებული. თუ ის არ იქნება, შანსი 50-50%-ზეა, თუ ის ითამაშებს, „ნაპოლის“ 5%-თ მეტი შანსი დაემატება. პიოლიმ უნდა იმუშაოს იმაზე, როგორ დატოვოს ოსიმენი უბურთოდ, ხოლო სპალეტიმ საკუთარ თავზე უნდა იფიქროს, რათა დააჯეროს გუნდი, რომ კარგ ფორმაში არიან. ლეჩეში „ნაპოლის“ ასეთი შთაბეჭდილება არ დაუტოვებია. დი ლორენცოს ლეაუსთან ერთი-ერთზე თამაში უჭირს, პიოლიმ ამასაც უნდა მიაქციოს ყურადღება“, – განაცხადა ფაბიო კაპელომ.
„მილანის“ ტექნიკური დირექტორი პაოლო მალდინი თვლის რომ მის გუნდს ჩემპიონთა ლიგის მოგება შეუძლია.
„წილისყრის შემდეგ კარლო ანჩელოტიმ დამირეკა და მკითხა: „პაოლო, სტამბოლში გნახავ, ხომ? (ჩემპიონთა ლიგის ფინალი სტამბოლშია). ფინალში დიდი ალბათობით ერთმანეთს „რეალი“ და „მილანი“ დაუპირისპირდებიან. ეს ადვილი არ იქნება, მაგრამ ვფიქრობ, კლუბის ისტორია გვაძლევს ამის დაჯერების უფლებას. ეს ადრეც მომხდარა: როდესაც მარტ-აპრილში შეგიძლია სეზონი რაღაც წარმოუდგენლად აქციო. ჩვენ გვაქვს ეს შანსი და გვინდა გამოვიყენოთ. იოლი არ იქნება, მაგრამ ოცნება გვიყვარს. ოცნების გარეშე ჩვენ ალბათ ნაკლებ ჩემპიონთა ლიგას მოვიგებდით.
დღევანდელ შემადგენლობაშიც ბევრი მეოცნებე გვყავს და კარგია, რომ ისინი არსებობენ, ისევე, როგორც არსებობენ უფრო რეალისტი ადამიანებიც. მეც მეოცნებე ვიყავი, როცა ვთამაშობდი, მიყვარდა ოცნება, განსაკუთრებით „მილანში“, ამის გარეშე ალბათ, მეც ნაკლებ ჩემპიონთა ლიგას მოვიგებდი“, – ასეთია პაოლო მალდინის მოსაზრება.
გუშინ, საინტერესო ინფორმაცია გაავრცელა გამოცემამ „La Gazzetta dello Sport“. აღმოჩნდა რომ ვიქტორ ოსიმენი დღეს სამედიცინო შემოწმებას გაივლის და საბოლოო გადაწყვეტილებაც ამის შემდეგ გახდება ცნობილი.
„ნაპოლის“ ოსიმენი მხოლოდ გოლების გასატანად არ სჭირდება, ნიგერიელი გუნდის ლიდერია, თანაგუნდელებსაც იყოლიებს, ყოველთვის აგრესიულად თამაშობს და თავისუფალ ზონებს კარგად ითვისებს. ვიქტორი სამედიცინო შემოწმებას სამშაბათს გაივლის და საბოლოო გადაწყვეტილებაც ამის შემდეგ გახდება ცნობილი“,- დაწერა იტალიურმა გამოცემამ.
ავტორი
