ა(ა)იპ ოზურგეთის საფეხბურთო კლუბ “მერცხალი“, შესაძლოა, გაიყიდოს. ამის შესახებ, ოზურგეთის მუნიციპალიტეტის საკრებულოს ბიუროს მორიგ სხდომაზე გახდა ცნობილი.
ა(ა)იპ ოზურგეთის საფეხბურთო კლუბი “მერცხალის“ წესდებაში ცვლილებები გახორციელდება და ის ცალკე შეზღუდული პასუხისმგებლობის საზოგადოებად დაფუძნდება. რის შემდეგაც, მისი პრივატიზება ან თანაინვესტირება მოხდება.
აღნიშნულ საკითზე მერის თანაშემწემ ალეკო ბერიძემ ისაუბრა. მან ბიუროს წევრებს განუმარტა მიზეზი, რის საფუძველზეც მიიღო მერიამ გადაწყვეტილება “მერცხალის“ კლუბი ცალკე შპს-დ ჩამოყალიბებულიყო:
ალეკო ბერიძე:”დღეის მდგომარეობით, “მერცხალზე“ სამი მიმართულებით ვმუშაობთ _ სტადიონი, საფეხბურთო კლუბი და ბავშვთა ფეხბურთი.
ჩვენ ჩვენი უფლებამოსილებით შეგვიძლია ჩვენს ქონებას მივხედოთ, ჩვენი ვალდებულებაა, მივხედოთ სტადიონს, ასევე, ბავშვთა ფეხბურთს, მაგრამ გვერდზე დაგვრჩა თავად ფეხბურთის გუნდი. ჩვენ კლუბს ვერაფრით ვეხმარებით. ასე გამოდის, რომ ჰაერში დარჩა. საფეხბურთო გუნდს სახელმწიფო პროგრამიდან აფინანსებს ფეხბურთის ფედერაცია, რაც არ არის საკმარისი ამ გუნდისთვის. დადგა საკითხი, რომ გუნდი დააფინანსოს კერძო პირმა. ამიტომ, ჩვენ ვფიქრობთ, დავიწყოთ დაფინანსების წყაროს მოძიება. ეს შეიძლება იყოს თანაინვესტიცია, პრივატიზაცია, დაფინანსება აუცილებელია, ამიტომ საჭიროა გაყოფა მოხდეს და გახდეს სამეწარმეო სუბიექტი, ამ შემთხვევაში ამით ჩვენ ხელს შევუწყობთ ინვესტიციების მოძიებას.
დღევანდელი ა(ა)იპ ჩამოყალიბდება სტადიონად, მეორე _ შპს “მერცხალად“. მას უშუალოდ ფეხბურთის გუნდი გადაეცემა, შემდეგ უნდა მოვახდინოთ ამ გუნდის პრივატიზება”,_ თქვა ბერიძემ.
საკითხის ირგვლივ თავიანთი აზრი გამოთქვეს დეპუტატებმა.
ენმ-ს ოზურგეთის ლიდერმა შალვა თავდიშვილი: “ოზურგეთში მოქმედებს ბევრი ორგანიზაცია, მაგალითად, გააქვთ ბალასტი, თიხა, ეს ხომ ქონებაა მუნიციპალიტეტის, გაიღონ თანხები. გაუწიოს სპონსორობა რომელიმე ორგანიზაციამ”.
ბესო ქათამაძემ საშტატო ნუსხის გადახედვა მოითხოვა, რაზეც “ოცნების“ დეპუტატმა ფრაქცია “მწვანეების“ თავმჯდომარემ გენო ჩავლეშვილმა მიმართა: _ რა საჭიროა სტადიონს ჰყავდეს ორი დირექტორი? რაზეც ქათამაძემ უპასუხა, რომ ორ დირექტორს წინა ხელისუფლება წლების განმავლობაში უხდიდა ხელფასს.
ლელა საჯაიამ აღნიშნა, რომ კლუბის სპონსორის მოძიებას მიესალმება.
მარი ჩხიკვიშვილმა ალეკო ბერიძეს ჰკითხა, რომ მას ჰქონდა ინფორმაცია კლუბი რამდენიმე ფეხბურთელმა დატოვა, თუმცა ბერიძემ მას უთხრა, რომ ეს მისი კომპეტენცია არ არის და აღნიშნული კითხვით „მერცხალის“ ადმინისტრაციისთვის მიემართა.
ბოლოს, მერის თანაშემწემ ალეკო ბერიძემ აღნიშნა, რომ სექტემბრიდან მერია ძალიან კარგი პროექტის გახორციელებას შეუდგება, რაც ფრაქცია “ოცნების“ თავმჯდომარემ გელა აროშიძემ მოუწონა:
_ გადასარევია, გადასარევია, _აღნიშნა აროშიძემ.
აღნიშნულ საკითხი საკრებულოს სხდომის დღის წესრიგში მას შემდეგ შევა, რაც საკრებულოს კომისიები და ფრაქციები შესაბამისს დასკვნებს დადებენ.
