მას შემდეგ , რაც “არასამეწარმეო (არაკომერციული) იურიდიული პირი “ოზურგეთის მუნიციპალიტეტის საფეხბურთო კლუბი მერცხალი” შპს-დ გადაკეთდა ოზურგეთის მუნიციპალიტეტის მერიის ძალისხმევით, სტადიონზე, მესამე თვეა, რეორგანიზაცია ჯერ კიდევ არ დამთავრებულა.
რაც მთავარია, ხელფასები დღემდე არ მიუღიათ თანამშრომლებს და დაპირების იმედად არიან.
არა ერთი მათგანი “გურია ნიუსთან” ამბობს, რომ მათი ოჯახი ამ ორასიოდე ლარის შემყურეა, აქვთ ბანკების ვალები და შესატანი პროცენტებისთვის ყოველდღიურად აწუხებენ.
_ გვპირდებიან, რომ იქნება ხელფასი. იძახიან, ან დღეს ან ხვალო და საშველი არაა. ყველა ერთ დღეში ვართ. ამდენ ხანს როგორ ვერ დამთავრდა ეს რეორგანიზაცია?! სამ თვეს რომ ხელფასი არ მიიტანოს ოჯახში კოტე შარაშენიძემ ან ნებისმიერმა სხვამ, როგორ შეხედავენ ოჯახის წევრებს ან შვილები?! არ ეტყვიან, “მშიაო”?! ასე უსისხლოები არიან? ოზურგეთში რომ განუკითხაობაა, სად იქნება ასეთი?! არ გვაინტერესებს ჩვენ, ვინ ვისი მომხრეა და ვის რომელ სკამზე ჯდომა სურს. სამი თვე უხელფასოდ ვიაროთ? _ ეს წუხილი არაერთხელ გამოთქვა “გურია ნიუსთან” “მერცხალის” რამდენიმე თანამშრომელმა, რომლებიც ვინაობის დასახელებისგან ამჯერად თავს იკავებენ. ამბობენ, რომ ყველა ამ აზრზეა, თუმცა, ეშინიათ ვინაობის ხმამაღლა დაფიქსირება და დახმარებას გვთხოვენ, გავიგოთ, მაინც სანამდე გაგრძელდება ეს უვადო დაპირება.
როგორც ჩვენმა მკითხველებმა უკვე იციან, ა(ა)იპ ოზურგეთის მუნიციპალიტეტის საფეხბურთო კლუბი “მერცხალში” “ორხელისუფლებიანობის” და დაუსრულებელი დაპირისპირების ჟამი იდგა და თითქოს, ა(ა)იპ-ის გაუქმებით, რომლის სანაცვლოდაც, 17 მაისს, შპს საფეხბურთო კლუბი “მერცხალი” შეიქმნა, წესით, ყველაფერი უნდა გამოსწორებულიყო, თუმცა, საქმე უკან და უარესობისკენ წავიდა.
ცალკე საუბრის თემაა შპს ასპროცენტიანი დაფინანსებით ისევ მერიის ბალანსზე რატომ დარჩა. ახლა, როცა მესამე თვეა, სტადიონის თანამშრომლები ხელფასს ვერ იღებენ, არც ისე შორეული წარსული უნდა გავიხსენოთ გუნდ “მერცხალის” ცხოვრებიდან _ “დაუანგარიშებელმა ანგარიშებმა” და არასწორად გაანგარიშებულმა ბიუჯეტმა გამოიწვია ის, რომ ფეხბურთელებს თუ სხვა თანამშრომლებს ვერ მისცეს ხელფასი და გუნდის მდგომარეობა კატასტროფულად გაუარესდა.
“გურია ნიუსი” წლის დასაწყისში წერდა, თუ როგორ მოთხოვეს საკრებულოს სხდომაზე, სადაც სამსახურების მოსმენები ხდებოდა, სტადიონის დირექტორს მამუკა გოგუაძეს ერთი თვის შემდეგ ანგარიშის თავიდან წარმოდგენა, რაც ლოგიკას არ ექვემდებარებოდა.
მაშინ, უხელფასობის გამო, საკუთარ ფეისბუქგვერდზე განცხადება გაავრცელა სტადიონის მაშინდელმა დირექტორმა მურთაზ აბაშიძემ, რომელიც საკუთარ მოსაზრებას გამოხატავდა, “მერცხალის” გასაჭირზე წერდა და ფონდის დაარსებასაც კი ითხოვდა გუნდის გადასარჩენად:
“უკვე ერთი წელია. ოზურგეთის საფეხბურთო კლუბ “მერცხალის” და ოზურგეთის ცენტრალური სტადიონის გენერალური დირექტორი ვარ. ოზურგეთელების საყვარელი საფეხბურთო კლუბი უკიდურესად მძიმე მდგომარეობაშია. იგი ამჟამად ასპარეზობს ყველაზე დაბალ ლიგაში და დაშლის პირასაა. მოვუწოდებ ოზურგეთელებს, შევქმნათ საფეხბურთო კლუბი “მერცხალის” ფონდი, რომელშიც, მე, ხარაგაულში დაბადებული კაცი, პირობას ვდებ, რომ პირადად მთელ ჩემ ხელფასს ჩავრიცხავ და ასევე, “მერცხალის” გულშემატკივრებსაც იმავეს მოვუწოდებ.
მივმართავ მუნიციპალიტეტის ხელმძღვანელობას, შეიმუშაოს დებულება, რომლითაც გულშემატკივარს შეეძლება, კლუბის მართვაში ჩაბმა. მიმაჩნია, რომ უნდა შეიქმნას გულშემატკივრებისგან დაკომპლექტებული კლუბის სამეთვალყურეო საბჭო.
ყველა ოზურგეთელს ვთავაზობ, “მერცხალში” მოვაწყოთ საჯარო შეხვედრა, ვიმსჯელოთ კლუბის სამარცხვინო მდგომარეობაზე და ამ მდგომარეობიდან გამოსავლის ძიებაზე”, _ წერდა აბაშიძე.
თუმცა, მისმა ამ, როგორც მაშინ ზოგმა აღიქვა, იდეალისტურმა მოწოდებამ, “ჩაილურის წყალი დალია” და რაკი სტადიონს დაპირისპირების ობიექტად მოიაზრებდნენ, მერიის ინიციატივით, გაუქმდა ა(ა)იპ, უფრო სწორად, შპს-დ გადაკეთდა და დანიშნეს ახალი დირექტორი, ძველი კი სახლში გაუშვეს (ცალკე საუბრის თემაა სტადიონზე საქმის გარჩევები და “იარაღის ტრიალი”, რაც, ჩვენი წყაროს თქმით, მურთაზ აბაშიძესა და ახალ დირექტორს, ჯუღელს შორის მოხდა”. ავტ.).
რა ხდება დღეს? მივედით კვლავ იმ მდგომარეობამდე, რომ იქ მომუშავეები მესამე თვეა ხელფასს ელოდებიან.
_ ერთი დღე რომ დაგვიანებულიყო ხელფასი, მამუკა გოგუაძეს თავზე დაამხობდნენ ყველაფერს. ახლა მესამე თვეა, ასე ვართ. ვიმეორებთ _ ჩვენ არ ვართ “იმისტები” და “ამისტები”, ხელფასი გვინდა. დაპირებას საზღვრები აქვს. თუ არადა, აშიმშილონ თავიანთი ცოლ-შვილი, _ ამბობენ ისინი “გურია ნიუსთან”.
ჩვენ, ბოლო ორი კვირის განმავლობაში, ამაოდ ვცდილობდით, შპს-ს ხელმძღვანელი ზურაბ ჯუღელი გვენახა _ ის არასდროს არ პასუხობს სატელეფონო ზარს (რადგან ოზურგეთის მერიაში ეს იშვიათი მიდგომა არ არის “გურია ნიუსის” მიმართ, ეტყობა, ჯუღელსაც “ასწავლეს”, ასევე მოქცეულიყო. ავტ.); არაერთხელ მივედით სტადიონზე, სადაც ყოველთვის გვხვდება, როგორც თვითონ გაგვეცნო, საზოგადოებასთან ურთიერთობის სამსახურის ხელმძღვანელი თენგიზ ჩხატარაშვილი:
_ არ დაადგა საშველი ქონების გადაბარებას. ინვენტარიზაციაა. ჩვენ არ გვინდა ხელფასი? მეც უხელფასოდ ვარ. დასრულდება და ყველას მიეცემა. უფროსი მერიაში, ქონების მართვის სამსახურშია წასული. იქნებ, იქ ნახოთ. რომ ნახოთ, ჯუღელიც იმავეს გეტყვით, მე რასაც გეუბნებით. ან ტელეფონზე რატომ არ გიპასუხებთ? ხომ იცით მისი ტელეფონის ნომერი?
_ ვიცით და არასდროს გვპასუხობს, ახლა დავურეკავ, თქვენ თვალწინ.
ჯუღელმა არც ამჯერად გვიპასუხა.
_ რა ვიცი, რა გითხრათ?! ეტყობა, უცხო ნომერს არ პასუხობს, _ გვითხრა ჩხატარაშვილმა, რომელიც ადამიანურად შეწუხდა.
_ ქვეყანაში ხელმძღვანელი პირი, ქვეყნისავე მოქალაქეს, ჟურნალისტს არ პასუხობს?
_ რა გითხრათ. ქონების მართვის სამსახურში რომ მიხვიდეთ?
“გურია ნიუსი” ოზურგეთის მუნიციპალიტეტის მერიის ქონების მართვის სამსახურს ეწვია.
_ ჯობს, იურიდიული სამსახურის უფროსს ჰკითხოთ, _ გვითხრეს იქ.
ოზურგეთის მუნიციპალიტეტის მერიის იურიდიული სამსახურის უფროსი ლაშა თავაძე ჯუღელის ცოლისძმაა და რედაქციაში არა ერთი ზარი შემოდის, რომ მათ შორის გარიგებაა.
მიუხედავად უამრავი სატელეფონო ზარისა, ასევე, გასულ დღეებში თავაძისთვის პირადი თხოვნისა, რომ სიძისთვის ეთხოვა, პასუხი გაეცა ჩვენთვის, არც მან და არც ზურაბ ჯუღელმა ჩვენს ზარს არც ერთხელ არ უპასუხეს.
იურიდიული სამსახურის უფროსი, რომელიც ადგილზე არ დაგვხვდა, თანამშრომლების თქმით, სადღაც სამსახურებრივ საქმეზე იყო გასული. მათ ვთხოვეთ, გადაერეკათ, რომ იქნებ, თანამშრომლების ზარისთვის მაინც ეპასუხა ბატონ ლაშას, თუმცა არც ერთმა არ დაურეკა.
მოკლედ, პასუხს კითხვაზე _ ვისი ბრალია, რომ ოზურგეთის სტადიონის თანამშრომლებს, მესამე თვეა, ხელფასი არ მიუღიათ, რატომ დუმან სიძე-ცოლისძმა და ამ განუკითხაობას როდის დაადგება საშველი, ჩვენც ისევე ამაოდ ველოდებით, როგორც სტადიონის უხელფასოდ დარჩენილი თანამშრომლები.
P.S. “გურია ნიუსი” საღამო ხანს ზურაბ ჯუღელის სახლშიც მივიდა, იქნებ, შინ მაინც აღმოგვეჩინა “უჩინმაჩინად” ქცეული ახალი ხელმძღვანელი, თუმცა, ცდა ბედის მონახევრე არ აღმოჩნდა _ სტუმრობა გაწბილებული გამოდგა.
