ჩოხატაურის მუნიციპალიტეტში მრავლადაა ავარიული, დემონტაჟს დაქვემდებარებული შენობები, რომლებიც 2022 წელს ტენდერებზეც კი იყო გატანილი, მაგრამ მისი გაყიდვა ვერ მოხერხდა.
“გურია ნიუსის” ინფორმაციით, ჩოხატაურში, ყოფილ სამშობიარო სახლში ორი ოჯახი ცხოვრობს. შენობა ავარიულ მდგომარეობაშია და საცხოვრებლად საშიშია.
როგორც იქ მცხოვრები ერთ-ერთი ოჯახის წევრი გვიყვება, აღნიშნულ შენობაში ცხოვრების უფლება მათ ჩოხატაურის მუნიციპალიტეტის მერმა, დავით შარაშიძემ მისცა:
_ აქ ცხოვრების უფლება მერმა მოგვცა. მე მარტო ვცხოვრობ, ჩემ გვერდით კიდევ ერთი ოჯახია _ ახლა აქ არ არიან, სოციალური პროგრამის მეშვეობით დასუფთავებაში დასაქმდნენ. რა ვქნათ? მართალია ეს შენობა ნახევრად დანგრეულია, მაგრამ ღია ცის ქვეშ ცხოვრებას აქ ყოფნა გვირჩევნია, აქ არ გვაწვიმს და არ გვათოვს.
“გურია ნიუსი” დაინტერესდა, თუ რატომ მისცა ჩოხატაურის მუნიციპალიტეტის მერმა ამ ოჯახებს ავარიულ შენობაში ცხოვრების უფლება. ჩვენს კითხვებს მუნიციპალიტეტის მერის მეორე მოადგილემ, მინდია ჟღერიამ უპასუხა:
_ რატომ გაიცა ამ ადამიანების ავარიულ, სიცოცხლისთვის საშიშ შენობაში ცხოვრების უფლება?
_ ამ საკითხთან დაკავშირებით ინფორმაციას არ ვფლობ და შესაბამისად, ვერ ვიქნები კომპეტენტური.
_ ჩვენმა რესპონდენტმა გვითხრა, რომ დაპირებაც გასცა მერმა, მათი უკეთეს პირობებში გადაყვანასთან დაკავშირებით, მაგრამ დღემდე პრობლემა მოუგვარებელია.
_ როგორც უკვე გითხარით, არ მაქვს ინფორმაცია ამ ყველაფერზე, მაგრამ არ მგონია, რომ ეს ადამიანები იქ მერის მიერ იყვნენ შესახლებულები. ვფიქრობ, ისინი ამ შენობაში თვითნებურად შესახლდნენ.
