პარლამენტის დროებითმა საგამოძიებო კომისიამ, რომელიც ხორავას ქუჩაზე მომხდარი მკვლელობის საქმეს იკვლევდა, მუშაობა დაასრულა და საპარლამენტო უმცირესობის მიერ მომზადებული დასკვნაც დაამტკიცა.
დასკვნის შინაარსს არ იზიარებენ კომისიიდან მმართველი პარტიის წარმომადგენლები. ,,ქართული ოცნების” წევრები აცხადებენ, რომ ოპოზიციის მიერ მომზადებული დასკვნა სამართლებრივ ჩარჩოებს არის გასცდენილი.
,,ქართული ოცნების“ დეპუტატებისთვის მიუღებელია პოლიტიკური თუ სამართლებრივი პასუხისმგებლობა დადგეს იმ მაღალჩინოსნებზე, რომლებსაც გამოძიებასთან რაიმე შემხებლობა ჰქონდათ.
,,საერთაშორისო გამჭვირვალობა-საქართველოდან“ ლიკა საჯაია ,,გურია ნიუსთან“ აღნიშნავს, რომ პროცესი, რომლებიც კომისიის მუშაობის დასრულების შემდგომ დეპუტატებს შორის ვითარდება, აზარალებს იმ იდეას, რომლის გამოც შეიქმნა დროებითი საგამოძიებო კომისია. საჯაია მოუწოდებს მმართველ პარტიას, გაითვალისწინოს საპარლამენტო უმცირესობის მიერ შედგენილი რეკომენდაციები, რათა საზოგადოებაში სამართლიანობის განცდა აღდგეს.
,,თავისთავად, კომისიის შექმნა იყო ძალიან კარგი პრეცენდენტი. მითუმეტეს, როცა მის შექმნას 95-მა დეპუტატმა დაუჭირა მხარი, რაც ნიშნავს, რომ თემა იყო ძალიან აქტუალური და პრობლემური. თუკი პროცესები გადაიზრდება პოლიტიკურ დებატებში, პირველ რიგში, დააზარალებს იმ კარგ საქმესა და იდეას, რისთვისაც შეიქმნა კომისია.
თუ ოპოზიციის მიერ შემუშავებული რეკომენდაციების გათვალისწინება არ მოხდება, საზოგადოებას გაუჩნდება განცდა, რომ კომისია საქმის შესასწავლად კი არ შეიქმნა, არამედ საზოგადოებაში არსებული საკმაოდ ხისტი და მძლავრი მუხტის ჩასახშობად.
ვისაც ყურადღებით აქვს წაკითხულიუმცირესობის მიერ მომზადებული დასკვნა, ეცოდინება, რომ დასკვნაში არ არის საუბარი მხოლოდ პოლიტიკურ პასუხისმგებლობაზე, საუბარია საკმაოდ ვრცელ სამართლებრივ შეფასებაზეც.
თუკი პარლამენტის დადგენილების შინაარსში მოხვდება ის, რომ საგამოძიებო კომისიის რეკომენდაციები არ უნდა იყოს გათვალისწინებული, ამით მხოლოდ და მხოლოდ, ხაზი გაესმევა იმას, რომ კომისია შეიქმნა არა საქმისთვის, არამედ საზოგადოებაში იმ დროს არსებული მუხტის ჩასახშობად“, _ გვითხრა საჯაიამ.
მმართველ პარტიას უნდობლობას უცხადებს ხორავას ქუჩაზე მომხდარი მკვლელობის შედეგად გარდაცვლილი ერთ-ერთი მოზარდის მამა, ზაზა სარალიძე. მისი თქმით, ხელისუფლება შვილის მკვლელებს ხელს აფარებს.
სარალიძე აქციებს 10 სექტემბრიდან აანონსებს.
