ჩვენი წყაროს ინფორმაციით, პრემიერის პოსტზე პარტია “ქართული ოცნების” თავმჯდომარე სამ კანდიდატურას განიხილავს _ ფინანსთა მინისტრს მამუკა ბახტაძეს; რეგიონული განვითარებისა და ინფრასტრუქტური მინისტრს მაია ცქიტიშვილს და შინაგან საქმეთა მინისტრს გიორგი გახარიას.
დღეს კი საქართველოს პრეზიდენტმა, გიორგი კვირიკაშვილმა მმართველ გუნდს მოუწოდა, რომ პრემიერ-მინისტრის თანამდებობაზე ბიძინა ივანიშვილი აირჩიონ.
„პრემიერმინისტრების შერჩევის ეს მასკარადი უნდა დასრულდეს და მოვუწოდებ მმართველ პარტიას პრემიერად პარტიის ლიდერი ბიძინა ივანიშვილი დაასახელოს“_აღნიშნული განცხადება პრეზიდენტმა ბათუმში მე-15 საერთაშორისო კონფერენციაზე – “საქართველოს ევროპულ გზა” გააკეთა.
რამდენად არის შესაძლებელი პრემიერ-მინისტრის პოსტზე მოსახლეობამ ისევ ბიძინა ივანიშვილი იხილოს_ამ საკითხზე „გურია ნიუსი“ პოლიტოლოგ სოსო ცინცაძეს ესაუბრა.
როგორც ის აღნიშნავს, ყოფილმა პრემიერ-მინისტრმა მაქსიმალური მსხვერპლი პოლიტიკაში დაბრუნებით გაიღო და სასარგებლო არგუმენტი იმისა, რომ ძველ თანამდებობაზე დაბრუნდეს არ არსებობს.
„მმართველ გუნდს არავინ არაფერს ეკითხება, თვითონ ბიძინა ივანიშვილზეა დამოკიდებული. ვერ ვხედავ არგუმენტს იმის სასარგებლოდ, რომ ბიძინა ივანიშვილი დაბრუნდეს. მაშინ გამოვა რომ ყველაფერზე პირდაპირ პასუხი უნდა აგოს და როგორც კვირიკაშვილი გუშინ 10-15 წუთი გვბერავდა წარმატებებით, მაგრამ ხალხი შიმშილობს, მაშინ ივანიშვილიც ასე უნდა მოიქცეს და არ აწყობს. მაქსიმუმი რა მსხვერპლიც გაიღო ივანიშვილმა არის ის, რომ დაბრუნდა პოლიტიკაში როგორც პარტიის ლიდერი. ეს არის მაქსიმუმი, რადგან ასეთ სიტუაციაში, ნებისმიერი ვინც არ უნდა დანიშნონ პრემიერად 6 თვეში მისდამი ასეთივე უკმაყოფილება იქნება,რადგან არაფერი შეიცვლება“,_ამბობს სოსო ცინცაძე.
