21 სექტემბერს, საქართველოს კათალიკოს-პატრიარქმა ილია მეორემ მოახლოებული საპრეზიდენტო არჩევნების წინ, სამღვდელოებას პოლიტიკური განცხადებების გაკეთებისგან თავის შეკავება ურჩია. პატრიარქის ამ მიმართვას წინ საეკლესიო პირების მხრიდან მმართველი პარტიის მიერ მხარდაჭერილი საპრეზიდენტო კანდიდატის, სალომე ზურაბიშვილის წინააღმდეგ გაკეთებული მკაცრი პოლიტიკური განცხადებები უძღოდა.
მათ შორის იყო შემოქმედელი მიტროპოლიტი მეუფე იოსებიც, რომელმაც სოციალურ ქსელში განცხადება გაავრცელა და აღნიშნა, რომ ზურაბიშვილის გაპრეზიდენტება არ შეიძლება.
“კონკორდატში, ქალბატონო სალომე, არ წერია უზნეობაზე ხმა არ ამოიღოო. პირიქით _ თუ ვინმე საზოგადოებას, ჩვენს მრევლს გადაცდომისკენ მოუწოდებს, მოვალე ვართ ჩვენ იგი ვამხილოთ.
ეს მუქარა, რომელსაც თქვენ გამოთქვამთ წმინდა სინოდის მიმართ, კიდევ ერთი დასტურია, თქვენი გაპრეზიდენტების შემთხვევაში, თუ როგორი საშიში გახდებით ქართველი ერისა და ეკლესიის მიმართ.
თქვენ ბრძანეთ ერთ–ერთ გამოსვლაში, რომ, თურმე, ეპისკოპოსები და სამღვდელოება უსახურ ტაძრებს ვაშენებთ და იქვე დასძენთ, რად გინდათ ამდენი ტაძრების აშენება როცა უამრავი გაჭირვებულია საქართველოში და ხომ არ აჯობებდა ეს ფული მათთვის გამოვიყენოთო.
მინდა შეგახსენოთ, რომ იუდამაც ზუსტად ასეთი სიტყვები უთხრა მაცხოვარს, როცა მარიამ მაგდალინელმა ნელსაცხებელი ცხო უფალს ფეხებზე.
ეს და სხვა თქვენი გამოსვლებიდან გამომდინარე, ჩვენ და ქართველ საზოგადოებას გამოგვაქვს დასკვნა, რომ თქვენი პრეზიდენტობა არ შეიძლება.
ეს არ არის პოლიტიკა _ ეკლესია არც ერთი პოლიტიკური პარტიისკენ არ იშვერს ხელს და ხალხს არ მოუწოდებს, ხმა მას მიეცითო. მაგრამ რაც შეეხება იმ მოვლენებს, მოწოდებებს, ფუჭ დაპირებებს, ქართველი ერის დეგრადაციას, მათი მოთხოვნების უგულებელყოფას, ამაზე ჩვენ ვერ გავჩუმდებით, თვალს ვერ დავხუჭავთ.
გამხილებთ სიყვარულით და მოგიწოდებთ სინანულისკენ. იმიტომ გვაკურთხა ჩვენ ღმერთმა უფალმა იესო ქრისტემ, რათა სიმართლე და ჭეშმარიტება ვიქადაგოთ“, _ აღნიშნული იყო მეუფის მიერ სოციალურ ქსელში გავრცელებულ განცხადებაში.
ამის შემდეგ მეუფეს პოლიტიკური განცხადებები საჯაროდ არ გაუკეთებია, თუმცა, როგორც გვითხრეს, ფეისბუქით დაწყებულმა პოლიტიკამ ამბიონებზე გადაინაცვლა.
„გურია ნიუსს“ არა ერთმა წყარომ უთხრა, რომ მღვდლების ნაწილი პირდაპირ ქადაგებდნენ, რომ სალომე ზურაბიშვილისთვის მხარი არ დაეჭირათ.
თუმცა, იყო სხვა შემთხვევებიც _ რამდენიმე ტაძარში მღვდლებმა მრევლს სალომე ზურაბიშვილის მხარდაჭერისკენაც მოუწოდეს.
მღვდლების დიდი ნაწილი საჯარო კომენტარზე არ დაგვთანხმდა, თუმცა, მათი ნაწილი პირად საუბრებში ამბობს, რომ ისინი ჩვეულებრივი ადამიანები არიან და მათ აქვთ საკუთარი შეხედულებების თავისუფლად გამოხატვის უფლება.
„გურია ნიუსის“ წყარო ამბობს, რომ ერთ-ერთი სასულიერო პირი, რომელიც გრიგოლ ვაშაძის მხარდაჭერისკენ მოუწოდებს საზოგადოებას, ქალაქ ლანჩხუთში მოღვაწე მამა გიორგია (მარშანიშვილი). თავად მამაო ამ ინფორმაციას უარყოფს და ამბობს, რომ ის ქრისტეს მხარესაა.
_ არავის არ ვუჭერ მხარს. საერთოდ არ მივდივარ არჩევნებზე, _ აღნიშნა ჩვენთან საუბრისას მამაომ.
კითხვაზე _ იზიარებს თუ არა მეუფე იოსების განცხადებას, რომლის თანახმადაც სალომე ზურაბიშვილის გაპრეზიდენტება არ შეიძლება, გვიპასუხა, რომ შემოქმედის ეპარქიის წინამძღვრის განცხადება არ უნახავს და კომენტარსაც ვერ გააკეთებს.
წყაროს თქმით, მკვეთრად გამოხატავს სახელისუფლებო კანდიდატის მხარდაჭერას შუხუთის ტაძრის წინამძღვარი მამა საბა (ჟღენტი), რომლის წირვებს ხელისუფლების პირველი პირებიც კი ესწრებიან:
_ აგერ, ამ წუთში, ხელისუფლების წარმომადგენლებთან ერთად ვზივარ (საუბარი ჩაწერილია 13 ნოემბერს) და არ ვიცი, რა გითხრათ. მსგავსი არაფერი არ ყოფილა. ჩვენ ამის უფლება არ გაქვს. აგვიკრძალეს, რომ რომელიმე კანდიდატს მხარი დავუჭიროთ.
ჩვენ ეკლესია ვართ და ორივე კანდიდატს თანაბრად ვექცევით. სადაც ახლა ვარ, ბევრი მღვდელი და მრევლიც იმყოფება და ხმამაღლა ვამბობ, რომ დღეს მსგავსი პოლიტიკური განცხადება არ გამიკეთებია, _ გვითხრა მამა საბამ.
_ მამაო, დღევანდელ დღეზე არ არის მხოლოდ საუბარი. როგორც გვითხრეს, წინასაარჩევნო კამპანიის დროს აქტიურად მოუწოდებთ მრევლს სალომე ზურაბიშვილის მხარდაჭერისკენ..
_ არა. მე ვუჭერ მხარს ყველას, ვინც საქართველოს საკეთილდღეოდ მოვა.
_ მეუფის ცნობილ განცხადებაზე რას გვეტყვით _ იზიარებთ მის მოწოდებას, რომ ზურაბიშვილის გაპრეზიდენტება არ შეიძლება?
_ ვერაფერს ვერ გეტყვით. მეუფის მაგივრად კომენტარს ვერ გავაკეთებ. ამაზე მას უნდა ესაუბროთ.
_ თქვენთვის მითითება იყო მისი საჯარო განცხადება?
_ ძალიან გთხოვთ! არ ვერევი და ვერ გავაკეთებ კომენტარს, _ გვითხრა მამა საბამ.
მრევლის ინფორმაციით, პოლიტიკურ ორთაბრძოლაში ოპოზიციის მხარე უჭირავს ჩოხატაურის მუნიციპალიტეტის სოფელ იანეულში მდებარე ტაძრის წინამძღვარს მამა ილარიონს (ურუშაძე), რასაც მამაო კატეგორიულად უარყოფს. მისივე თქმით, არ იცნობს მეუფის განცხადებას და მოწოდებას, რომლის თანახმადაც, ზურაბიშვილის გაპრეზიდენტება მიუღებელია:
_ მე არ ვერევი პოლიტიკაში და რატომ ამბობენ, არ მესმის. მეც მითხრეს, რომ თითქოს ვაშაძეს ვუჭერ მხარს. ალბათ, იმიტომ, რომ იანეულში, გურამ ჩალაგაშვილის სახლში ვცხოვრობ (გურამ ჩალაგაშვილი „ნაციონალური მოძრაობის ერთ-ერთი ლიდერია). აქ მოდის ის კაცი და ხალხს გონია, რადგან პირველ ტურში იანეული მოიგო, მე ვიმუშავე. გურამს ბევრი სიკეთე აქვს ამ სოფლისთვის გაკეთებული. ეს სხვებმაც მკითხეს და იგივე ვუთხარი, _ აღნიშნა მამა ილარიონმა.
_ მამაო, თქვით, რომ ამ თემაზე უკვე დაგისვეს შეკითხვა. ვინ დაინტერესდა თქვენი პოლიტიკური შეხედულებით _ ხელისუფლება?
_ არა, სოფელში მკითხეს ბიჭებმა, რატომ მოიგო ჩალაგაშვილმა იანეულიო. მე რა ვიცი, რატომ მოიგო _ კაცი ყველას ეხმარება და უამრავი სიკეთე აქვს გაკეთებული. ყველა ამიტომ დაუდგა მხარში.
_ მამაო, ჩვენ გვახსოვს 2012 წლის წინასაარჩევნო პერიოდი და ორად გაყოფილი ეკლესია. ჩვენ არქივშიც შემონახულია ფაქტები, რომ გურიაში, სამღვდელოების დიდი ნაწილი „ნაციონალური მოძრაობის“ მხარდამჭერი იყო… მათ შორის, თქვენც იყავით იმ ადამიანთა რიგში, რომელიც იმდროინდელ ხელისუფლებას უჭერდა მხარს. თუმცა, შემდეგ ხელისუფლებაც შეიცვალა და პოზიციებიც… დღეს რა ხდება? იგივე პერიოდში დავბრუნდით?
_ ჩვენ არც მაშინ ვერეოდით საარჩევნო კამპანიაში და არც ახლა. ხალხს აქვს მისი არჩევანი და რასაც გააკეთებს, ხალხი დაინახავს, _აღნიშნა მამა ილარიონმა.
წყაროს თქმით, ხელისუფლების აქტიური მხარდამჭერია მაკვანეთის ტაძრის წინამძღვარი მამა ვახტანგი (თოხაძე). როგორც გვითხრეს, მამა ვახტანგი მრევლს სალომე ზურაბიშვილის მხარდაჭერისკენ მოუწოდებს.
მამაოს თქმით, ეს ინფორმაცია სიმართლეს არ შეესაბამება:
_ არც ზურაბიშვილს ვუჭერ მხარს და არც გიორგი ვაშაძეს. მიმაჩნია, რომ ორივე ერთმანეთზე უარესია, _ გვითხრა მამა ვახტანგმა.
მისივე თქმით, მისთვის მეუფეს არც ერთი კანდიდატის მხარდაჭერა არ უთხოვია;
_ მე მეუფის განცხადებასაც არ ვიცნობ. ალბათ, მან მისი პირადი მოსაზრება გამოხატა. ჩემთვის არაფერი უთქვამს და სხვა მღვდლებს რა უთხრა, არ ვიცი, _ აღნიშნა მამაომ.
წყაროს თქმით, გრიგოლ ვაშაძის მხარდაჭერისკენ მოუწოდებს მრევლს მამა თეიმურაზიც (ბურჭულაძე), რომელიც ოზურგეთსა და ჩოხატაურში წირავს. მისი თქმით, ეს ინფორმაცია სიმართლეს არ შეესაბამება და პოლიტიკაში არ ერევა:
_ როდის იყო ეს, სად ნახეს?! საერთოდ არ ვერევი პოლიტიკაში და ვერანაირ კომენტარს ვერ გავაკეთებ ვერც ამ თემაზე და ვერც მეუფის განცხადებაზე. არანაირი სურვილი არ მაქვს კომენტარის გაკეთების, _ გვითხრა მამა თეიმურაზმა.
რამდენიმე წყარომ დაგვიდასტურა გავრცელებული ინფორმაცია იმის შესახებ, რომ ოზურგეთში, სასულიერო პირების უმრავლესობა ვაშაძის მხარდაჭერისკენ მოუწოდებს მრევლს. ტაძრების წინამძღვრების დიდმა ნაწილმა სატელეფონო ზარებს არ უპასუხა, ზოგმა ტელეფონი გამოგვირთო, ზოგმა კი კომენტარზე უარი განაცხადა.
ჩვენ ბევრჯერ ვეცადეთ ამ საკითხზე მეუფე იოსებიც კომენტარიც მოგვეპოვებინა, თუმცა, ეპარქიის წინამძღვარმა „გურია ნიუსის“ სატელეფონო ზარებს არ უპასუხა. მოგვიანებით ტექსტური შეტყობინებაც გავუგზავნეთ და ვთხოვეთ, ეპასუხა, რამდენად სწორია წყაროების მიერ მოწოდებული ინფორმაცია, რომლის თანახმადაც, მან მღვდლებს გრიგოლ ვაშაძის მხარდაჭერა დაავალა და ამ დავალებაში ისიც შედის, რომ ქადაგების დროსაც კი, მრევლს უნდა მოუწოდონ, რომ სალომე ზურაბიშვილის გაპრეზიდენტება არ შეიძლება.
ამ გზავნილის და რამდენიმე საათის ლოდინის მიუხედავად, შემოქმედელი მიტროპოლიტი კონტაქტზე არ გამოვიდა.
უნდა ითქვას, რომ ეს გურიისთვის ახალი თემა არ არის. ასე იყო 2012 წელს _ მაშინ, ეპარქიის სასულიერო პირების დიდი ნაწილი „ნაციონალურ მოძრაობას“ მხარს ღიად უჭერდა. უფრო მეტიც, „გურია ნიუსმა“ იმ დროს რამდენიმე მტკიცებულება მოიპოვა, რომ სასულიერო პირები, რომლებიც „ქართულ ოცნებას“ უჭერდნენ მხარს, მეუფის მიერ დაისაჯნენ კიდეც. უფრო მეტიც _ ერთ-ერთი სასულიერო პირი, რომელმაც „ქართული ოცნების“ ოფისი აკურთხა, სასულიერო პირებისა და პოლიტიკოსების წინ საჯაროდ გაიკიცხა _ მას უთხრეს, რომ თუკი ამაზე ისაუბრებდა, ჯვარს ახსნიდნენ. ჩვენ მაშინ მეუფე იოსებსაც ვთხოვეთ კომენტარი, რაზეც გვიპასუხა, რომ თუ ამის შესახებ დაიწერებოდა, მამაოს ჯვრის ტარების უფლებას ჩამოართმევდა.
და კიდევ ერთი დეტალი _ ამ ყველაფერს წინ მეუფე იოსების პოლიტიკაში აქტიურად ჩართვაც უძღვოდა _ გურიის სასულიერო წინამძღვარი საარჩევნო კამპანიაშიც კი იყო ჩართული და „ნაციონალური მოძრაობის“ დეპუტატობის კანდიდატების მხარდაჭერისკენ სამწყოს, არათუ ამბიონიდან, სცენიდანაც კი მოუწოდებდა.
თუმცა, მას შემდეგ ბევრი დრო გავიდა და სასულიერო პირები საარჩევნო პროცესებში აქტიურად არ ჩართულან. იმ მღვდლებისა და დედაობის ნაწილმა, რომლებიც „ნაციონალური მოძრაობის“ აქტიური მხარდამჭერები იყვნენ, მოქმედ ხელისუფლებასთან დასაახლოებლად გზები გამონახეს და შედეგსაც მიაღწიეს.
თუმცა, ახლა სიტუაცია როგორც ჩანს, შეიცვალა და ფეისბუქით დაწყებული ქადაგება, რომელიც წყაროების თქმით, ამბიონებზე გაგრძელდა, აქტიურ ფაზაშია შესული.
