ჯანმრთელობის დაცვისა და სოციალური უზრუნველყოფის პრიორიტეტის დასაფინანსებლად ლანჩხუთის ბიუჯეტიდან, რომელიც 2021 წლისთვის 12 მილიონ 524,400 ათასი ლარითაა განსაზღვრული, ჯამში, 826 ათასი ლარი მიიმართება.
კერძოდ, სხვადასხვა სოციალური პაკეტის გასახორციელებლად, მუნიციპალიტეტის მასშტაბით, 679 ათასი ლარის გახარჯვაა დაგეგმილი და არსებული ეპიდვითარებიდან გამომდინარე, მიმდინარე სოციალურ პროგრამებს კიდევ ორი დაემატა. კერძოდ, ბიუჯეტი კოვიდ 19-ით ინფიცირებულთა და მასთან კონტაქტში მყოფ პირთა ტრანსპორტირებით დახმარების პროგრამა, 25 ათასი ლარის ოდენობით დაფინანსებას ითვალისწინებს. თანხა გაწერილია ვირუსით გარდაცვლილთა სარიტუალო პროგრამისთვისაც და ის სამი ათასი ლარითაა განსაზღვრული.
ცვლილება შევიდა ბავშვთა დახმარების პროგრამაში და ეპიდემიოლოგიური ვითარებიდან გამომდინარე, დაემატა კიდევ ფულადი დახმარების პროგრამა. კერძოდ, ცელიაკიით დაავადებულთა (18 წლამდე) კვებითი დანამატებით უზრუნველყოფისთვის ბიუჯეტში სამი ათასი ლარის დაფინანსებაა გაწერილი და პროგრამა გათვლილია ერთ ბენეფიციარზე, რომელიც დახმარებას მიიღებს ყოველთვიურად, თვეში არა უმეტეს 250 ლარისა. აუტისტური სპექტრის მქონე ბავშვთა სარეაბილიტაციო კურსის დაფინანსებისთვის კი 44 ათასი ლარია გათვალისწინებული და პროგრამა 10 ბენეფიციარზეა გათვლილი.
უკიდურესად შეჭირვებული ხანდაზმულებისა და შეზღუდული შესაძლებლობების მქონე პირთა უფასო კვებაში თუ გასულ წელს 90 ათასი ლარი გაიხარჯა, წელს 115 ათასი ლარია გათვალისწინებული პროგრამის დასაფინანსებლად. გასული წლის მსგავსად პროგრამით 105 ბენეფიციარი ისარგებლებს.
შედარებით გაზრდილია მრავალშვილიანი ოჯახების დახმარების პროგრამის დაფინანსება, რომელიც მიზნად ისახავს ასეთი ოჯახებისთვის ყოველთვიურად ფინანსური დახმარებას. თუ 2020 წელს პროგრამის დასაფინანსებლად ბიუჯეტში 36 ათასი ლარი იყო გათვალისწინებული, წელს თანხა 42 ათასს ლარს შეადგენს. პროგრამის მიხედვით, ლანჩხუთის მუნიციპალიტეტში რეგისტრირებული მრავალშვილიანი ოჯახები, რომელთაც ჰყავთ ოთხი და მეტი 18 წლამდე ასაკის შვილი, ყოველთვიურად თითოეულ ბავშვზე მიიღებენ 35 ლარს.
პროგრამით ისარგებლებენ ის ოჯახები, რომლებიც არ არიან სოციალური შემწეობის მიმღებნი, ხოლო პროგრამის მიზანია მრავალშვილიანი ოჯახების ფინანსური ხელშეწყობა. ირკვევა, რომ ლანჩხუთში წელს ამ პროგრამით 28 მრავალშვილიანი ოჯახი ისარგებლებს.
ბოლო წლებია უცვლელია მძიმე საცხოვრებელ პირობებში მყოფი ოჯახებისთვის დროებითი თავშესაფრით უზრუნველყოფის პროგრამის დაფინანსება. წელსაც, როგორც წინა წლებში საამისოდ 67 ათასი ლარია გათვალისწინებული და პროგრამა გათვლილია 60 ბენეფიციარზე.
წლევანდელ ბიუჯეტში მუნიციპალიტეტმა თანხები უპატრონო მიცვალებულთა სარიტუალო მომსახურებისთვისაც გაითვალისწინა და ის შარშანდელის მსგავსად 2500 ლარითაა განსაზღვრული.
ომის ვეტერანებისა და მათი ოჯახების დახმარების პროგრამისთვის დასაფინანსებლად წელს ბიუჯეტი გასული წლის მსგავსად 56.6 ათას ლარს გაიღებს, რომელიც 80 ბენეფიციარზეა გათვლილი.
სოფლებიდან მოსწავლეთა ტრანსპორტირების პროგრამის დაფინანსებისთვის, რომლითაც სასულიერო გიმნაზიის 44 მოსწავლე სარგებლობს, 14.6 ათასი ლარია ბიუჯეტში.
ცენტრ “იავნანას” თანადაფინანსებისთვის, რომლის მიზანია სოციალურად დაუცველი ბავშვების ფსიქო-სოციალური რეაბილიტაციის ხელშეწყობა, სოციალური პროგრამიდან წელსაც 13 ათასი ლარი გაიხარჯება.
ბიკარბონატული ჰემოდიალიზით ანუ თირკმლის ქრონიკული უკმარისობით დაავადებულთა სამედიცინო დაწესებულებაში ტრანსპორტირების პროგრამის დასაფინანსებელი თანხა წლევანდელ ბიუჯეტში 38 800 ლარია. პროგრამა 24 ბენეფიციარზეა გათვალისწინებული და თითოეულზე 144 ლარს შეადგენს.
იძულებით გადაადგილებულ პირთა დახმარების პროგრამის დასაფინანსებლად გასული წლის მსგავსად, წელსაც 15,3 ათასი ლარია გამოყოფილი. ეს თანხა მუნიციპალიტეტში რეგისტრირებულ დევნილ ოჯახებს საშეშე მერქნის შესაძენად გადაეცემათ ერთჯერადად 250 ლარის ოდენობით და მუნიციპალიტეტში ასეთი 59 ოჯახია რეგისტრირებული.
სამკურნალო და საოპერაციო ხარჯებით დახმარების პროგრამისთვის წელს 92 ათასი ლარის დახარჯვაა გათვალისწინებული. საგულისხმოა, რომ იმ ბენეფიციარებს, რომლებსაც ესაჭიროებათ ოპერაციული ჩარევა, ქიმიოთერაპია, კორონალური სტენტირება და ა. შ. (რაც სადაზღვევო კომპანიისგან არ უფინანსდებათ), ასეთ შემთხვევაში, მათ შესაბამის სამედიცინო დაწესებულებაში ჩაერიცხებათ საჭირო თანხის ნახევარი, არა უმეტეს, 1000 ლარისა.
პროგრამით კი ისარგებლებენ ის ადამიანები, რომელთა სარეიტინგო ქულა 0-დან 150 ათასია. ამავდროულად, შესაძლებელია მაგნიტო-რეზონანსული და კომპიუტერული ტომოგრაფიების თანადაფინანსება, ისევ 50 პროცენტით, ოღონდ 130 ათას ქულამდე მქონეებისთვის.
კვლავაც მზარდია “გამარჯვებულ ქალთა კლუბის” სარეაბილიტაციო პროგრამის დაფინანსება _ თუ გასულ წელს გეგმა 37 200 ლარი იყო, წლევანდელი სოციალური პროგრამის მიხედვით, დაფინანსება 42 200 ლარამდეა გაზრდილი.
ამ პროგრამის მიზანია ნაადრევ ეტაპზე კიბოს დიაგნოზით ნაოპერაციები ქალების მხარდაჭერა მათი შემდგომი რეაბილიტაციის მიზნით. პროგრამა ითვალისწინებს სამედიცინო კვლევებს, სარეაბილიტაციო ვარჯიშების ტრენინგებს, ფსიქოლოგიურ ტრენინგებს, მონაწილეობას სხვადასხვა კულტურულ ღონისძიებებში და ა. შ.
ხანდაზმულთათვის ერთჯერადი დახმარების გაწევის მიზნით, სოციალური პროგრამის პროექტის შესაბამისად, ლანჩხუთის ბიუჯეტი 2021 წელს სამი ათასი ლარის დახარჯვას გეგმავს.
რაც შეეხება მძიმე საცხოვრებელ პირობებში, უბედური შემთხვევისა და სტიქიური მოვლენების შედეგად დაზარალებული ოჯახებისთვის ერთჯერადი ფულადი დახმარების გაწევის პროგრამას, აქ გასულ წელთან შედარებით შემცირებულია ბენეფიციართა რაოდენობა და შესაბამისად დაფინანსებაც. 2020 წელს პროგრამა 40 ბენეფიციარზე იყო გათვლილი, რისთვისაც 50 ათასი ლარის გახარჯვა იყო გათვალისწინებული. მიმდინარე წელს კი პროგრამით, რომელიც მიზნად ისახავს დაზიანებული საცხოვრებელი სახლის შეკეთებას, 15 ბენეფიციარი ისარგებლებს.
რაც შეეხება შშმ პირის სტატუსის მქონე ბენეფიციართა სარეაბილიტაციო კურსის დაფინანსებას, ამ კუთხით თუ შარშან 9 800 ლარი ჩაიდო ბიუჯეტში, წელს 14 ათას ლარამდეა დაფინანსება გაზრდილი და მისით 20 ბენეფიციარი ისარგებლებს.
რაც შეეხება ერთჯერადი ფულადი დახმარების პროგრამას _ ამ მხრივ, წლევანდელ ბიუჯეტში 10 ათასი ლარია ჩადებული.
წლის მთავარი საფინანსო დოკუმენტის მიხედვით, სოციალური პროგრამა ბენეფიციარებისთვის მედიკამენტების შესაძენად 15 ათასი ლარით განისაზღვრა. პროგრამის მიხედვით, წლის განმავლობაში ერთჯერადად მედიკამენტების შესაძენად, 150 ლარის ფარგლებში, დახმარებას ის ადამიანები მიიღებენ, რომელთა ოჯახების სარეიტინგო ქულა 65 000-დან 150 000-ს არ აღემატება.
რაც შეეხება ბავშვთა ადრეული განვითარების ხელშეწყობის, ბავშვთა რეაბილიტაცია-აბილიტაციის ქვეპროგრამით მოსარგებლე შშმ ბავშვებისა და მათი თანმხლები პირების ტრანსპორტირებას უზრუნველყოფს, 25 ათასი ლარის დახარჯვაა დაგეგმილი, როგორც გასულ წელს და იგი 30 ბავშვზეა გათვლილი.
მიმდინარე წლის სოციალური პროგრამიდან თანხა მიიმართება გენდერული თანასწორობის უზრუნველყოფისა და ოჯახში ძალადობის აღმოფხვრის ხელშეწყობისთვის, რისთვისაც ბიუჯეტიდან ლანჩხუთის მერია სამი ათასი ლარის გახარჯვას გეგმავს. როგორც სოციალური პაკეტის პროექტშია მითითებული, პროგრამა სამ ბენეფიციარზეა გათვლილი და თითოეულზე ერთჯერადი დახმარების სახით ათასი ლარის გაცემას ითვალისწინებს.
მერიის სოციალური პაკეტში ექვსი ათასი ლარის გახარჯვაა გათვალისწინებული სახელმწიფო ზრუნვის სისტემიდან გასული ახალგაზრდების დასახმარებლად, რაც მუნიციპალიტეტში რეგისტრირებული ამ კატეგორიის 18-დან 24 წლამდე ახალგაზრდისთვის ერთჯერად დახმარებას ითვალისწინებს. პროგრამა ცხრა ბენეფიციარზეა გათვლილი.
ორ ათასი ლარითაა განსაზღვრული მინდობით აღზრდაში მყოფ ბავშვთა დასახმარებლად გათვალისწინებული სოციალური პაკეტი და ბიოლოგიურ ოჯახში დაბრუნებისას, საჭიროების შემთხვევაში, გაეწევათ ერთჯერადი ფულადი დახმარება.
