სოციალური პროგრამის შესრულების შემდეგ, ბახვი ჰესი სოციალური ფონდის მეშვეობით დაეხმარება სოფლებს _ ინტერვიუ ბახვი ჰესის დირექტორთან, გიორგი აბრამიშვილთან

კომპანიის კეთილი ნების საფუძველზე, სხვადასხვა ჯგუფთან ჩართულობის და ორმხრივი კომუნიკაციის შედეგად,  ასევე, მრჩეველთა საბჭოს რეკომენდაციების საფუძველზე, შემუშავდა სოციალური პროგრამა, რომელიც 2021 წლის შემოდგომიდან ამოქმედდა.  ბახვი ჰესის სოციალური პროგრამა მრავალმხრივია და ამ დროისთვის პროექტების 90% უკვე შესრულებულია.

– ბატონო გიორგი, როგორც ვიცით, ბახვი ჰესის სოციალური პროგრამა წარმატებით ხორციელდება. როგორ მოახერხეთ, რომ ის ყველასათვის მისაღები იყო თავიდანვე?

– პირველ რიგში ვიტყოდი იმას, რომ სოციალური პროგრამა ჩვენმა გარემოსდაცვისა და სოციალური პროექტების გუნდმა შექმნა არა დამოუკიდებლად და ერთპიროვნულად სამშენებლო პერიმეტრთან არსებულ სოფლებში მცხოვრები მოსახლეობისთვის, არამედ სწორედ ამ მოსახლეობასთან ერთად, იმ ადამიანებთან ერთად, ვისთვისაც კეთდებოდა ეს პროგრამა. პირველ ეტაპზე სამშენებლო პერიმეტრთან ახლოს მდებარე სოფლებში კარდაკარის პრინციპით ჩავატარეთ საჭიროებების კვლევა. შემდეგ, ამ კვლევაზე დაყრდნობით გამოვყავით მიმართულებები და ამ მიმართულებებს დავაშენეთ კონკრეტული პროექტები. პროგრამა მოიაზრებს პროექტებს, რომლებიც ფარავს განათლებას – ბაღი, სკოლა, უნივერსიტეტი; ინფრასტრუქტურის რეაბილიტაციას – გზები, ხიდები, განათება, წყლის სისტემა; მცირე ბიზნესისა და ტურიზმის ხელშეწყობას – გურული ჩაი, სტუმარ-მასპინძლობის ობიექტები;   შშმ პირების გაძლიერება და ა.შ. მართალი ბრძანდებით, როცა ამბობთ, რომ ამ პროექტების 90% პირნათლად შეასრულა ბახვი ჰესმა. ამჟამად გვაქვს რამდენიმე მიმდინარე პროექტი, რომელიც მშენებლობის დასრულებამდე იქნება აქტიურ ფაზაში.

– ბატონო გიორგი, შეიძლება ვთქვათ, რომ თქვენმა პროექტებმა ცოტა მაინც შეცვლა ცხოვრების ხარისხი სამშენებლო მოედნის მიმდებარედ არსებულ სოფლებში?

– ვფიქრობ ამის თქმის საფუძველი გვაქვს, რადგან თავისუფლად შეგვიძლია შევადაროთ 2021 წელს არსებული ვითარება და დღევანდელობა ერთმანეთს.

პირველი, რაც შეგვიძლია ვთქვათ ისაა, რომ ჩვენ პირნალთლად შევასრულეთ დანაპირები და მაქსიმალურად დავასაქმეთ ადგილობრივი მოსახლეობა პროექტზე. ეს კი ნიშნავს ოჯახებში ხელფასის სახით შესულ თანხას, რაც აძლევს საშუალებას ადგილობრივებს გაიუმჯობესონ ცხოვრების პირობები. ჩვენ ასევე შესაძლებლობების ფარგლებში პრიორიტეტს ვანიჭებთ ადგილობრივებს, როცა გვჭირდება მძიმე თუ მსუბუქი ტექნიკის დაქირავება, მომსახურების თუ გარკვეული პროდუქტების შეძენა. ჩვენი დანაპირები იყო, რომ პროექტის ბიუჯეტი პრიორიტეტულად დაიხარჯებოდა რეგიონში და ასეც ვიქცევით, იქნება ეს პურის შესყიდვა, თუ ტრაქტორის ქირაობა. რაც შეეხება სოციალურ პროექტებს, შშმ პირები იღებენ ყოველთვიურ დახმარებას 2021 წლიდან და ვფიქრობ, თანხა, რასაც ისინი იღებენ, გარკვეულ პრობლემებს უგვარებს მათ. ვანისქედში, რაც ეს სოფელი არსებობს სულ სუფთა წყლის პრობლემა ჰქონდათ. სოფლის მაცხოვრებლებს სახლში არ მიეწოდებოდათ სუფთა წყალი. შარშან ჩვენ სრულად მოვუგვარეთ ვანისქედელებს ეს პრობლემა. ბახმაროში  ენერგოეფექტური განათების სისტემა დავამონტაჟეთ USAID-ის ენერგეტიკულ პროგრამასთან ერთად, გავაძლიერეთ გურული ჩაი და სტუმარ-მასპინძლობის სექტორი USAID-ის ეკონომიკურ პროგრამასთან ერთად, მოვაწესრიგეთ ინფრასტრუქტურა – გზები, ავაშენეთ ახალი ხიდი, საგანმანათლებლო პროგრამებით კი დავეხმარეთ საბავშვო ბაღს, სკოლის მოსწავლეებს ავუმაღლეთ ცნობიერება გარემოსდაცვით და   განახლებადი ენერგიების საკითხებზე. ჩვენს მიერ დაქირავებული ტრენერები ეხმარებიან უფროსკლასელებს პროფესიულ ორიენტაციაში, გვყავს სტუდენტები, რომელთა სწავლის საფასურის 80% კომპანია ანაზღაურებს, რადგან ისინი სწავლობენ იმ დისციპლინებზე, რომლებიც მნიშვნელოვანია ქვეყნის განვითარებისთვის. ჩვენ მიზანი იყო, ჩვენი პროექტები რომლებსაც ვახორციელებდით აქ, ყოფილიყო ცვლილების მომტანი და ვფიქრობ გამოგვივიდა კიდეც.

– რა იქნება მშენებლობის დასრულების შემდეგ? გაქვთ სამომავლო გეგმები სოციალური თემების მიმართულებით?

 როგორც თავში ვთქვით, პროექტების 90% უკვე შესრულებულია და დანარჩენი 10%-იც მშენებლობის დასრულებასთან ერთად შესრულდება. თუმცა, ჩვენ ასე ვერ შეველეოდით აქაურობას და ვერ შევაჩერებდით მთისპირის თემზე ზრუნვას. ჯერ კიდევ ერთი წლის წინ დავდეთ ჩვენი ხედვა და შევათანხმეთ ადგილობრივ თვითმმართველობასთან, რომ ბახვი ჰესი გააკეთებს ფონდს, სადაც ყოველწლიურად ჩაირიცხება გარკვეული თანხა, როგორც კომპანიის კეთილი ნება. ამ თანხის განკარგვის უფლება ადგილობრივ თვითმმართველობასთან ერთად ექნება მთისპირის თემს და მისი მიზნობრიიობა იქნება თემში არსებული სხვადასხვა სოციალური თუ ინფრასტრუქტურული სახის პრობლემის მოგვარება. ვფიქრობ, ამ გზით, ჩვენ არ შევაჩერებთ მთისპირის განვითარებას და ბახვი ჰესი დარჩება პოზიტიური ცვლილებების განმახორციელებლად რეგიონში.