ლანჩხუთის სპორტული ცენტრის დირექტორისა და მისი ყოფილი თანამშრომლის, ციური სიხარულიძის ურთიერთბრალდებებზე იყო საუბარი „გურია ნიუსში“ გამოქვეყნებულ სტატიაში „ყოფილი ზონდერია, ახლაც სუს-ით იმუქრება“ _ დაპირისპირება სპორტულ ცენტრში“ და ამის გამოძახილი აღმოჩნდა აღნიშნული ცენტრის თანამშრომელთა ერთი ნაწილის წერილობითი პასუხი.
„გავეცანით „გურია ნიუსში“ გამოქვეყნებულ სტატიას ყოფილი თანამშრომლის, ქალბატონ ციური სიხარულიძის მოსაზრების შესახებ. ვაცხადებთ, რომ ციური სიხარულიძე კოლექტივში ყველასგან პატივცემული და დაფასებული ადამიანი იყო. ძალიან გაგვიკვირდა, როცა გადაწყვიტა რომ წასულიყო სამსახურიდან.ყველანი ვურჩევდით შეეცვალა გადაწყვეტილება და გაეგრძელებინა მუშაობა. მიუხედავად ამისა, მან აზრი არ შეიცვალა და ამის მიზეზად ცენტრის მოლარესთან, მარინა გობრონიძესთან უთანხმოებას მიუთითებდა. კოლექტივის არც ერთ წევრს მათ შორის კონფლიქტი და დაპირისპირება არ შეუმჩნევია. ციური სიხარულიძე სამსახურიდან საკუთარი ნება-სურვილით, პირადი განცხადების საფუძველზე გათავისუფლდა.
რაც შეეხება ციური სიხარულიძის ბრალდებებს ცენტრის დირექტორის, ბატონ გოჩა ლომაძის მისამართით, არ შეესაბამება სინამდვილეს, ვინაიდან დირექტორი თანამშრომლებისგან ითხოვს შრომის შინაგანაწესით დაკისრებული მოვალეობის შესრულებას. პატიობს რამდენიმე გადაცდომას, მაგრამ თუ დარღვევებს სისტემატური ხასიათი მიეცა, აკეთებს შესაბამის რეაგირებას. არ გვახსოვს ოჯახური მდგომარეობიდან გამომდინარე თანამშრომელს ეთხოვოს გათავისუფლება და არ გაეწიოს ანგარიში.
რაც შეეხება პროფკავშირის თემას, ჩვენ სპორტული პროფკავშირიდან გამოვედით იმ მიზეზით, რომ ვითხოვეთ ჩვენი თანამშრომლებისთვის, რომლებიც საჭიროებენ მკურნალობას, გაეწიათ დახმარება, რაზედაც უარი განაცხადეს თანხის არქონის მოტივით. თუმცა ვალდებულნი იყვნენ, ურიერთშეთანხმების საფუძველეზე ეს თხოვნა დაეკმაყოფილებინათ, ვინაიდან საწევრო გადახდილი გვაქვს და დაახლოებით 720 ლარის გამოყოფის შესაძლებლობა გააჩნდათ.
პირველად გავიგეთ, რომ რომელიმე თანამშრომელმა „სკოჩით“ პირი აიკრა პროტესტის ნიშნად, ასეთი ჩვენთან არ მომხდარა და ოჯახში თუ პირი აიკრა, ეს ჩვენ არ გვეხება, თუმცა არც ამის შესახებ არ გვსმენია. ჩვენი კოლექტივი არის შრომისმოყვარე, მეგობრული და გვაქვს ერთი მიზანი – აღვზარდოთ ჯანმრთელი და სასახელო სპორტსმენები. გარდა ამისა, გვინდა აღვნიშნოთ, რომ ბატონი გოჩა ლომაძე პოლიციელად არ დაბადებულა. მისი დედა ქალბატონი რუდანი და და, ქალბატონი ინგა, ასევე თავად ბატონი გოჩა ბავშვობიდან იყვნენ სპორტსმენები, იზრდებოდნენ სპორტსკოლაში და არაერთი წარმატება მოუტანეს სკოლას და რაიონს. აქვე აღვნიშნავთ, რომ არც ყოფილი პოლიციელობაა დასაძრახი, რამეთუ ყველა ქვეყანაში საამაყოა და მათზე უკმაყოფილებას მხოლოდ დამნაშავეები და დანაშაულზე მიდრეკილები გამოხატავენ, რაც ჩვენი აზრით დანაშაულია. რაც შეეხება ფინანსურ მაქინაციებს, ჩვენი ღრმა რწმენით, ესეც აბსურდული ბრალდებაა. ბატონი გოჩა ოჯახიდან ეხმარება სპორტულ ცენტრს, არამც თუ რაიმე მიჰქონდეს ცენტრიდან. ამის ნათელი მაგალითია რამდენიმე დღის წინ უცხოეთიდან დასასვენებლად ჩამოსული მისი დის, ინგა ლომაძის მიერ გაწეული ქველმოქმედება, რომელმაც სპორტული ცენტრის შშმ აღსაზრდელებს გაუწია დახმარება და საკუთარი სახსრებით ისინი მშობლებთან ერთად წაიყვანა ბათუმში, დელფინარიუმის დასათვალიერებლად, თანაც დაჰპირდა ბავშვებსა და მათ მშობლებს, რომ ეს არ იქნებოდა ერთჯერადი ღონისძიება.
ჩვენი კოლექტივი არ არის განაწყებნებული ქალბატონ ციური სიხარულიძის ქმედებით, რადგანაც მიგვაჩნია, რომ მის მიერ მოყვანილი ფაქტები არ წარმოადგენს ქალბატონ ციურის აზრს, არამედ სავარაუდოდ ნაკარნახევია ზოგიერთი იმ განაწყენებული თანამშრომლის მიერ, რომლებიც დღემდე ვერ შეეგუენ ახალი ადმინისტრაციის მოთხოვნებს, რომ ყველამ განურჩევლად დაიცვას შრომის შინაგანაწესი და მუხლჩაუხრელად იშრომონ სპორტული ცენტრის წარმატებისთვის. მათაც მოვუწოდებთ, დადგნენ ჩვენს გვერდით და ერთად ვაკეთოთ კეთილი საქმე“- ვკითხულობთ სპორტული ცენტრის თანამშრომელთა მიერ ციური სიხარულიძის წერილის საპასუხოდ გაკეთებულ განცხადებაში, რომელსაც თან 30 თანამშრომლის ხელწერა ერთვის.
თავად ციური სიხარულიძე სპორტული ცენტრის თანამშრომელთა ნაწილის მიერ მისი მისამართით გაკეთებულ განცხადებაზე მხოლოდ მოკლე კომენტარით შემოიფარგლა.
„არ ვიცი ვინ რას ამბობს, არ მაინტერესებს. ყველამ საკუთარ გულში ჩაიხედოს და მერე განსაჯოს. საერთოდ არ მინდა ამ თემას დავუბრუნდე, დავიღალე უკვე. არც გოჩა ლომაძე მაინტერესებს, დაანებოს თავი ჩემს თვალთვალს და ადევნებას. მეტს ვერაფერს ვიტყვი, არაფერი საქმე არ მაქვს სპორტულ ცენტრთან“, -გვითხრა ციური სიხარულიძემ.
