საპრეზიდენტო არჩევნები დასრულდა, ხალხი ახლა იმ დაპირებების შესრულების მოლოდინშია, რომელიც “ქართული ოცნების” ლიდერმა ბიძინა ივანიშვილმა მეორე ტურის დროს გასცა.
მეორე ტურში ქალაქ ოზურგეთში, თეატრის მიმდებარე ტერიტორიაზე გამოიკრა ბანერი, რომელიც დღემდე არ ჩამოუხსნიათ. ბანერზე წერია: “დღეს _ ბოროტებას არა, ხვალ _ პასუხები ოცნებისგან!”
_ მე ვარ თემურ კილაძე, ლანჩხუთის მუნიციპალიტეტი სოფელ მამათიდან. წელს გურიაში იყო მძიმე პერიოდი და ეს პერიოდი გაგრძელდება მანამ, სანამდე ხელისუფლება დროზე არ მოგვხედავს. არ ვიცი ზუსტად, ფაროსანას ბრალი იყო თუ სხვა პრობლემის, მაგრამ თხილის გარეშე დავრჩით მთელი მოსახლეობა.
ძალიან უჭირს ხალხს. სახელმწიფომ უნდა იმუშაოს იმ კუთხით, რომ ხალხს დაეხმაროს და არა თავიანთი ჯიბის გასქელებას მოანდომონ დიდი დრო. თხილისთვის უნდა გამოყონ კომპენსაცია და ეს უნდა მოხდეს სწრაფად. თუ არ გაითვალისწინებენ ხალხის აზრს, მიიღებენ აქციებს და პროტესტს, _ გვიპასუხა თემურ კილაძემ კითხვაზე, რას ელოდა ის ხელისუფლებისგან.
_ თუ მოგწონთ ქალი პრეზიდენტი და რას ელოდებით მისგან?
_ კარგია და მისასალმებელია, რომ ქალი გახდა პრეზიდენტი და იმედია, გაამართლებს. “ნაცმოძრაობას” მხარს ვერ დავუჭერდი, რადგან მაგათ და როგორ იციან ხალხის მართვა, ყველამ კარგად დავინახეთ მათი ხელისუფლებაში ყოფნის დროს _ ქვეყანა გაანადგურეს და გათელეს. ხალხს ეს ყველაფერი კარგად ახსოვს და არ უნდათ მათი დაბრუნება, _ თქვა თემურ კილაძემ.
“გურია ნიუსი” შეეცადა, გაიგო რა მოლოდინი აქვთ ოზურგეთელებს ხელისუფლებისგან და მოსწონთ თუ არა ქალი პრეზიდენტი.
სილაურისკენ მიმავალ მიკროავტობუსში დღის 2 საათისთვის ოთხი ადამიანი იჯდა: “დავიღალეთ ამ არჩევნებით, ყოველდღე შეიძლება არჩევნები იყოს და სულ არჩევნებზე საუბრობდეს ხალხი?! ცოტა ხალხისკენაც მოიხედონ და დაინტერესდნენ”, _ გვითხრეს მიკროავტობუსის მგზავრებმა.
“სულ კაცები იყვნენ და იქნებ, ქალმა რაღაც კარგი გააკეთოს! ძალიან მძიმე ბრალდებები იყო ამ საარჩევნოდ და აღარ გვინდა ამ თემაზე კიდევ საუბარი. რაც შეეხება გასაკეთებელს საქმეებს, შუქი და გზა გვინდოდა და გაკეთებულია, ახლა გაზს თუ შემოიყვანენ კარგი იქნება”, _ ასეთია სილაურელების მოსაზრება.
მერი ღლონტი: “ველოდებით, გაკეთდეს რამე _ რაც დაგვპირდა და რაც არ დაგვპირდა. პირველ რიგში, მისახედია ჯანდაცვის პროგრამებისთვის. კი, ბატონო, ამ კუთხით კეთდება რაღაც, მაგრამ კიდევ გასაკეთებელია ბევრი რამ. წამლები ისეთი ძვირია, რომ ხშირად ვერ ვყიდულობთ და ღმერთის იმედად ვარ. ჯანმრთელობაა პირველ რიგში მთავარი.
ასევე, მისახედია ეკოლოგია _ რას ვსუნთქავთ, კაცმა არ იცის, ჭრიან ხეებს, იწვება ტყე-პარკები და ამ კუთხით ბევრია სამუშაო. დაეხმარონ, ასევე, სოციალურად დაუცველებს და პენსიონერებს”.
ლალი შალიკავა: “ძალიან ბევრი ახალგაზრდა არის ბანკების “შავ სიაში”, ვალები აქვთ და იმედია, ის პროგრამა, რომელიც დაანონსდა, აუცილებლად ამოქმედდება. უჭირთ ახალგაზრდებს, სამუშაო ადგილები არ აქვს და რა ქნან? მივიდნენ ბანკში, აიღეს სესხი, მაგრამ შემდეგ ვერ იხდიან. მე სოფელი ძიმითიდან ვარ, საქმეები კეთდება სოფელში, უკმაყოფილო არ ვარ, მაგრამ დასაქმების პროგრამა, რაც უფრო ფართო იქნება, უფრო მეტად ამოისუნთქავს ხალხი”.
დიმიტრი ღლონტი: “უკეთესი ცხოვრება გვინდა და მგონი, ამის უფლება გვაქვს. თუ დაგვპირდნენ, უნდა შეგვისრულონ. რაც უფრო მეტად მიხედავენ ხალხს, მით უფრო მეტი მხარდაჭერა ექნება არჩევნებზე ხალხისგან”.
ლილი გურიელი: “ხალხისთვის უნდა იყოს ხელისუფლება, რადგან ჩვენი არჩეულები არიან. პირველ რიგში, მისახედია სოციალური დაუცველი ფენა, შემდეგ დასაქმება, რადგან უამრავი ადამიანია უმუშევარია”.
