რუსეთი ამჟამად უკრაინის წინააღმდეგ ომში დიდ პრობლემებს აწყდება. თუმცა, კუთხეში მომწყვდეული და დამარცხების პერსპექტივით შეშინებული ვლადიმერ პუტინი, ესკალაციაზე უფრო წავა, ვიდრე _ დათმობებზე, _ ამბობს საიმონ ტისდალი, The Guardian-ის საერთაშორისო ურთიერთობების მიმომხილველი.
რუსეთი ფრონტზე უზარმაზარ დანაკარგებს განიცდის და ვერ ახერხებს შემდგომ წინსვლას, უკრაინა კი თითქმის ყოველდღიურად აყენებს მტკივნეულ დარტყმებს აგრესორს, ბომბავს ნავთობობიექტებს, რაც კიდევ უფრო ასუსტებს რუსეთის ეკონომიკას.
თუმცა, სტატიის ავტორი მიიჩნევს, რომ კიევისა და მისი მოკავშირეების ოპტიმიზმი ნაადრევია _ პუტინი ვერ აცნობიერებს, რომ აგებს. ის რუსეთს კვლავ სუპერსახელმწიფოდ მიიჩნევს. იგი არ იყენებს სმარტფონს, ინტერნეტს და ეყრდნობა თავის ახლო წრეს _ ჩინოვნიკებს, გენერლებს, დაზვერვას, სახელმწიფო მედიას და ისმენს მათგან იმას, რისი მოსმენაც სურს. ამრიგად, რეალობისგან მოწყვეტილმა პუტინმა შეიძლება დაიჯეროს, რომ გამარჯვება ახლოა და გააგრძელოს ომი.
მაშინაც კი, თუ პუტინის გარშემო „ინფორმაციული ბუშტი“ მოულოდნელად გასკდება, კარგი არაფერი გამოვა _ როდესაც დიქტატორი გააცნობიერებს, რომ სტრატეგიული და პირადი დამარცხება უახლოვდება, ყველაზე ნაკლები, რასაც ის მოინდომებს, მშვიდობაა.
ტისდალის თქმით, პუტინისგან უფრო სავარაუდო პასუხი იქნება ომის უკრაინის მიღმა გაფართოება და ნატოს ქვეყნების რუსეთთან პირდაპირ დაპირისპირებაში ჩათრევა. ნაწილობრივ ეს უკვე ხდება.
ორგანიზაცია Centre for Democracy & Resilience ევროპაში რუსეთის ჰიბრიდული ომის შემდგომ ესკალაციას პროგნოზირებს. კრემლის ერთ-ერთი მთავარი მიზანია შიშისა და ქაოსის დათესვა დასავლეთის ერთიანობის შესასუსტებლად.
ანალიტიკოსების აზრით, ევროპული ქვეყნები, ადრე თუ გვიან, იძულებულნი იქნებიან, აღიარონ, რომ ისინი კოლექტიური თავდასხმის ქვეშ არიან და რუსეთს უფრო მკაცრად უპასუხონ. 1930-იანი წლებიდან მოყოლებული ევროპის ყველაზე მასშტაბური გადაიარაღების ფონზე, ამან შეიძლება გამოიწვიოს დასავლეთსა და რუსეთს შორის პირდაპირი სამხედრო კონფლიქტი.
რაც უფრო ძლიერი იქნება დასავლეთის რეაქცია, მით უფრო რადიკალური შეიძლება გახდეს პუტინი. ავტორი მიიჩნევს, რომ რუსეთის მიერ ბირთვული იარაღის გამოყენების სრულად გამორიცხვა შეუძლებელია.
ტისდალი ვარაუდობს, რომ პუტინმა შეიძლება სცადოს კონფლიქტის გაყინვა გადაჯგუფებისა და გადაიარაღების მიზნით, ან დათანხმდეს ცეცხლის შეწყვეტას ხანგრძლივი მშვიდობის მიღწევის რეალური განზრახვის გარეშე. ავტორის აზრით, სწორედ აქ იმალება საფრთხე უკრაინისთვის _ უკრაინული საზოგადოების მხრიდან ახალი არჩევნების ჩატარების მოთხოვნამ შეიძლება შეასუსტოს ქვეყნის ერთიანობა. თანაც, თუ რუსეთიდან საფრთხე შესუსტდება, ევროპული ქვეყნები შეამცირებენ სამხედრო დახმარებას და უსაფრთხოების მკაფიო გარანტიების გარეშე ცეცხლის შეწყვეტამ, შესაძლოა, უკრაინა კიდევ უფრო დაუცველი გახადოს რუსეთის განახლებული აგრესიის მიმართ.
