აპრილის დასაწყისიდან, როცა თანდათან მატულობს ჰაერის ტემპერატურა, თხილის პლანტაციებში პარალელურად ჩნდება მავნებელ ტკიპას პრობლემა. ჩვენს მკითხველ მეურნეებს შევახსენებთ, რომ ეს ტკიპა სწორედ წინა წლის აგვისტოში დაზიანებული კვირტიდან გამოდის, ვარდისფერი რომაა და ხშირად თხილის ყვავილი გვგონია.
წლევანდელი გაზაფხული წვიმიანია და ბუნებრივია, სოკოვანი და ბაქტერიული დაავადებებიც გაცილებით მომძლავრებულია; ამას უკვე ტკიპა ემატება.
მართალია, ბევრ მეურნეს უკვე შეწამლული აქვს პლანტაცია სპილენძის შემცველი პრეპარატით, თუმცა, ის უფრო ერთჯერადი პრევენცია იყო და ასეთი წვიმების პერიოდში, აუცილებელია, კიდევ ერთხელ შეიწამლოს სოკოვანი დაავადებების საწინააღმდეგო საშუალებებით.
მცენარე როცა იწყებს ვეგეტაციას და გამოდის ფოთლები, სწრაფად გამოდის ტკიპაც იმ ვარდისფერი “ყვავილიდან” და გამოზამთრებული მავნებელი, ახალ შთამომავლობას აჩენს. ამიტომ ახლა, აპრილის შუა რიცხვებიდანვე, უნდა მოხდეს მისი განადგურება.
ტკიპას საწინააღმდეგოდ უნდა გამოვიყენოთ აკარიციდები. ასეთი პრეპარატები არსებობს სპეციალურ მაღაზიებში და და საჭირო რჩევას ადგილზე მოგცემენ
თუ მავნებლის ფართო სპექტრია და პლანტაციაში არის სხვა მავნე მწერებიც (ხარაბუზა, ამბროზიის ხოჭო), მაშინ უნდა გამოიყენოთ მათ წინააღმდეგ მოქმედი ინსექტიციდები; მათ შორის, ტკიპებზე მოქმედი.
ხაზს ვუსვამთ _ თუ მარტო ტკიპაა პლანტაციაში, უნდა გამოვიყენოთ სპეციალური პრეპარატები, აკარიციდები, ხოლო თუ სხვა მავნებელიც არის, მაშინ შეარჩევთ ისეთ პრეპარატებს, რომელიც ყველა სახეობის ტკიპას ანადგურებს.
ჩვენს მკითხველებს კიდევ ერთხელ შევახსენებთ, რომ ამ წლის გაზაფხული ცივი და წვიმიანია. ამიტომ წინა წლებთან შედარებით მაღალია სოკოვანი დაავადებების ფონი. სწორედ ამიტომ აუცილებელია გააგრძელოთ შეწამვლა სპილენძის შემცველი პრეპარატებითაც _ იმით, რითაც ადრეული პირველი წამლობა ჩაატარეთ.
სოკოვან და ბაქტერიულ დაავადებებს ყველა ეტაპზე უნდა ვებრძოლოთ, გურიაში განსაკუთრებით _ აქ სინესტე ჭარბადაა და მათ საუკეთესო გარემო აქვთ საარსებოდ.
შეგახსენებთ, რომ ჯერ ნაცრის საწინააღმდეგო შეწამვლა არ სჭირდება პლანტაციებს _ ნაცრიანობა მაისის შუა რიცხვებიდან შეიმჩნევა. და თუ მაინც ურჩევს ვინმე ფერმერს, რომ ნაცარზეც შეწამლოს პლანტაცია, ეს არის მხოლოდ პრეპარატის გასაღების მცდელობა.
