სუმოს 2020 წლის პირველი სუპერტურნირი ჰაცუ ბაშოს იწყება.
იაპონიის სუმოს ასოციაციამ სასტარტო ორი დღის ბრძოლების განრიგი წარმოგვიდგინა.
სამწუხაროდ, ბანძუკეში ქართველი რიკიში ტოჩინოშინი გვარიანად დაქვეითდა და მიმდინარე ბაშოზე
დასავლეთის მე-6 მეგაშირას სტატუსით გამოვა.
ლევან გორგაძის ჩავარდნის მიზეზი ვერაგული ტრავმა გახლავთ. მან ამ მძიმე დაზიანების გამო ბოლო ბაშო ნაადრევად დატოვა.
იმედია, ქართველ სუმიტორს ჰაცუ ბაშოზე ტრავმა აღარ შეაწუხებს, კაჩი-კოშის ანუ დადებით ბალანს მოიპოვებს და მომავალ ბაშოზე გაუმჯობესებული წოდებით გამოვა.
ტოჩინოშინი ჰაცუ ბაშოზე, სადაც 2018 წელს იმპერატორის თასი მოიპოვა, პირველ ორთაბრძოლას აღმოსავლეთის მე-7 მაეგაშირა იაპონელ შოჰოძანთან გამართავს.
მეორე დღეს კი მისი მოწინააღმდეგე ასევე მე-7 მაეგაშირა იაპონელი ონოშო იქნება.
წელს ჰაცუ ბაშოზე ორი იოკოძუნა და ორი ოძეკი გამოვა.
ლეგენდარული მონღოლი იოკოძუნა ჰაკუჰო საწყის დაპირისპირებებში კომოსუბი დაიეიშოს და პირველი მაეგაშირა ენდოს შეხვდება.
იოკოძუნა კაკურიუს მეტოქეები პირველი მაეგაშირა ენდო და კომოსუბი აბი იქნებიან.
ოძეკი ტაკაკეიშოს პირველ ორთაბრძოლას დასავლეთის პირველი მაეგაშირა მიოგირიუსთან ჩაატარებს. შემდეგ კი გამარჯვების მოპოვებას მე-2 მაეგაშირა ჰოკუტოფუჯისთან შეეცდება.
რაც შეეხება ოძეკი გოიეიდოს, იგი ჯერ ჰოკუტოფუჯის დაუპირისპირდება.
მეორე ბრძოლაში კი დოჰიოზე მე-2 მაეგაშირა მიტაკეუმის წინაშე დადგება.
ჯურიოდან რანგით დაბალ დივიზიონ მაკუშიტაში მოუწია დაქვეითება ქართველ გოლიათ გაგამარუს. თეიმურაზ ჯუღელი მიმდინარე ბაშოზე კაჩი-კოშის გაფორმებას და ჯურიოში აღზევებას შეეცდება.
ჰაცუ ბაშო სტარტს, ტრადიციულად კვირა დღეს, 12 იანვარს აიღებს და 15 დღე გაგრძელდება.
