სატყეო სექტორის რეფორმის მხარდაჭერის პროექტის “ECO.Georgia-ს” ფარგლებში, ჩოხატაურის მუნიციპალიტეტში სამუშაო შეხვედრა გაიმართა.
შეხვედრას ესწრებოდნენ მერის პირველი მოადგილე მაია კუტუბიძე, საკრებულოს თავმჯდომარის პირველი მოადგილე ზაალ მამალაძე, გერმანიის საერთაშორისო თანამშრომლობის საზოგადოების (GIZ) წარმომადგენლები და ექსპერტები.
მხარეებმა განიხილეს მუნიციპალიტეტის ინტერესები და შესაძლებლობები ტყის მართვის მიმართულებით და ხაზი გაუსვეს მონაწილეობრივი მიდგომის მნიშვნელობას ტყეების მართვის პროცესში.
როგორც ჩოხატაურის მუნიციპალიტეტის მერიის ფეისბუქგვერდზე გავრცელებულ ინფორმაციაში ვკითხულობთ, მონაწილე მუნიციპალიტეტების ინტერესებისა და მათი შესაძლებლობების შესწავლის მიზნით, შეირჩა კომპანია Georgia’s Environmental Outlook – GEO, რომელიც საქართველოს გარემოს დაცვისა და სოფლის მეურნეობის სამინისტროსთან და მუნიციპალიტეტებთან თანამშრომლობით, შეიმუშავებს რეკომენდაციებს ტყის მართვის პროცესში ჩართულობის გაზრდისა და გაუმჯობესებისთვის.
უფრო კონკრეტულად კი, რას ითვალისწინებს პროექტი ECO.GEORGIA ჩოხატაურში, რა ღონისძიებები შეიძლება გახორციელდეს და რამდენად მნიშვნელოვანია ეს სამომავლოდ ჩოხატაურისთვის, ამ საკითხებზე მერის პირველ მოადგილეს მაია კუტუბიძეს ვესაუბრეთ:
“პროექტი ითვალისწინებს საქართველოში სატყეო სექტორის რეფორმის გახორციელების ხელშეწყობას სათბური აირების ემისიების შესამცირებლად ქვეყნის ტყეების გაძლიერებული, ბუნებაზე დაფუძნებული მართვისა და ენერგოეფექტურობის გაუმჯობესების გზით.
პროექტი თანადაფინანსებულია კლიმატის მწვანე ფონდის, გერმანიის ფედერაციული რესპუბლიკის, შვეიცარიის კონფედერაციის და საქართველოს მთავრობების მიერ.
აღნიშნული პროექტი მოიცავს საქართველოს სამ რეგიონს: გურიას, მცხეთა-მთიანეთსა და კახეთს (თიანეთი, ახმეტა, თელავი, დედოფლისწყარო, ყვარელი, ლანჩხუთი, ოზურგეთი და ჩოხატაური). პროექტის ხანგრძლივობა 7 წელია (2021-2027 წლები).
პროექტის გახორციელება მუნიციპალიტეტისთვის უმნიშვნელოვანესია, როგორც სოციალურ-ეკონომიკური, ასევე, ეკოლოგიური კუთხით. დაწყებულია სამიზნე მუნიციპალიტეტებთან სამუშაო ჯგუფის შეხვედრები, მუნიციპალური ტყის მართვის დანერგვასთან დაკავშირებით მოსაზრებების და წინადადებების შემუშავებაზე”, _ აღნიშნავს კუტუბიძე.
_ რა არის პროექტის მთავარი მიზნები?
_ პროექტის მთავარი მიზნებია საქართველოში სატყეო სექტორის მხარდაჭერა, კლიმატის ცვლილების შერბილებასა და მიმდინარე სატყეო რეფორმის გახორციელებაში წვლილის შეტანა. პროექტი ტყის აღდგენის, ტყის კარგვის შემცირების, ტყის მდგრადი მართვისა და კონსერვაციის გზით ხელს შეუწყობს ტყის ნახშირბადის მარაგების გაზრდას, ასევე დაეხმარება ენერგო ეფექტური და ალტერნატიული საწვავისთვის ბაზრის განვითარებას, საცხოვრებელი პირობების გაუმჯობესებასა და ადგილობრივი თვითმმართველობის როლის გაზრდას ტყის მდგრად მართვაში, ცნობიერების ამაღლების, პროფესიული უნარ-ჩვევების გაუმჯობესების, შესაბამისი პოლიტიკისა და რეგულაციების მეშვეობით.
პროექტის წამყვანი ფაქტორებია: ხე-ტყის კომერციული დამზადება, საწვავი ხე-ტყის დამზადება.
კუტუბიძის თქმით, “პროექტის მთავარი ამოცანაა საწვავ ხე-ტყეზე მოსახლეობის მოთხოვნილების დაკმაყოფილება და საწვავის მიწოდება მუნიციპალიტეტის მდგრადად მართული ტყეებიდან”.
_ რა ღონისძიებები შეიძლება გახორციელდეს ამ მიმართულებით?
_ ადგილობრივი მოსახლეობის ცნობიერების ამაღლება, ტყესა და ტყესთან დაკავშირებულ ღირებულებათა ჯაჭვების სარგებლის შესახებ და სატყეო სექტორში მიმდინარე პროცესებში ადგილობრივი თემების ჩართულობა; ტყისგან მისაღები სარგებლის მხარდაჭერა. ადგილობრივი დონის პერსპექტივაა სარგებელი თემებისა და ადგილობრივი მეწარმეებისთვის, სანდო და ხარისხიანი საწვავი ხე-ტყის მიწოდება საქმიანი ეზოების მეშვეობით; ღუმელების და ალტერნატიული საწვავის ადგილობრივი მწარმოებლების მხარდაჭერა, ოჯახების შემოსავლის გაზრდა, დამატებითი სამუშაო ადგილები და განათლება, ჰაერის შიდა დაბინძურების შემცირება, საწვავის უფრო ფართო არჩევანი: საწვავი ხე-ტყე, ბრიკეტები და ა. შ.
რაც შეეხება პროექტით მიღებულ შედეგებს, შექმნილია ტყის მდგრადი მართვისთვის ხელშემწყობი გარემო, მუნიციპალიტეტი მზადაა, განახორციელოს ტყეების სწორი მართვა; მნიშვნელოვნად შემცირებულია საწვავად შეშის გამოყენება; ტყით სარგებლობისთვის შექმნილია გამართული ბიზნეს გარემო; ტყეების მართვაში მონაწილეობენ პროფესიონალი და გადამზადებული კადრები; შინამეურნეობები აღჭურვილია თანამედროვე სერტიფიცირებული ღუმელებით; ადგილობრივი მოსახლეობა აქტიურადაა ჩართული ტყეების მართვის პროცესში.
ავტორი
