ს
ტიქიამ ლანჩხუთის მუნიციპალიტეტს მნიშვნელოვანი ზარალი მიაყენა. განადგურებულია გზები, დატობრილია სახლები, საყანე ფართობები. მუნიციპალიტეტის გამგებლის ზაზა ურუშაძის ინფორმაციით ძლიერმა წვიმამ და ქარმა თიტქმის ყველა სოფელი მნიშვნელოვნად დააზარალა.
ამ დროის მონაცემებით, სოფელ შუხუთში სტიქიამ დააზიანა შიდა გზები. დატბორილია ათამდე ოჯახი და საყანე ფართობების 80 %. ამავე სოფელში წყლის ძლიერმა ნაკადმა ხიდი წაიღო.
სოფელ აკეთში, თამაზ ვადაჭკორიას ეზოს წინ მეწყერია ჩამოწლილი და როგორც გამგებელმა გვითხრა სამი მეტრი გზა წაღებულია.
სოფელ ნინოშვილში დონდოლაძის სახლთან ზვავი ჩამოვა. ამავე სოფელში შიდა გზები პრაქტიკულად არ არსებობს.
სოფელ გვიმბალაურში 20-მდე ოჯახია დატბორილი.
სოფელ სუფსაში საყანე ფართობების 90% წყლით არის დაფარული.
შიდა გზები დაზიანებულია სოფელ ღრმაღელეში. ამავე სოფელში ათეულობით ოჯახი საკარმიდამო ნაკვეთების გარეშეა დარჩენილი.
სოფელ მამათში ძლიერმა ქარმა კილაძეების სახლს სახურავი გადახადა. წვიმამ კი შიდა გზები გაანადგურა.
სოფელ ნიგოეთში 8 ოჯახია დატბორილი; სოფელ ჩიბათში დაზიანებულია ნაპირსამაგრები და წაღებულია ხიდი. სოფელ ჯურუყვეთში ქარმა ადმინისტრაციულ შენობას სახურავი გადააძრო. ამავე სოფელში რამდენიმე ოჯახი დაიტბორა. ანალოგიური მდოგარეობაა სოფელ აცანაში.
რაც შეეხება ქალაქს _ ქარმა სახურავი მრავალბინიან საცხოვრებელ სახლს ახადა, დაიტბორა ქუჩები და რამდენიმე საცხოვრებელი სახლი. ბარათშვილის ქუჩაზე მცხოვრებ ავთანდილ ზენაიშვილს ადიდებულმა მდინარემ ნალია და მიწის ნაკვეთი წაართვა.
ზაზა ურუშაძის თქმით, გამგეობაში უკვე შექმნილია საგანგებო შტაბი და მიმდინარეობს ზარალის დათვლა.
