ესტონეთის პრემიერ-მინისტრმა, კაია კალასმა თქვა, რომ ცეცხლის შეწყვეტა არ ნიშნავს, რომ ოკუპირებულ ტერიტორიებზე სისასტიკე დასრულდება. მისი თქმით, ევროპამ მსგავსი შეცდომა უკვე სამჯერ დაუშვა საქართველოში, დონბასსა და ყირიმში, და რომ იგივე აღარ უნდა განმეორდეს.
“ძალიან მაწუხებს ნაადრევი მოწოდებები ცეცხლის შეწყვეტასა და მშვიდობაზე, რადგან ცეცხლის შეწყვეტა არ ნიშნავს, რომ ოკუპირებულ ტერიტორიებზე სისასტიკე დასრულდება. ჩვენ უკვე სამჯერ დავუშვით ეს შეცდომა საქართველოში, დონბასსა და ყირიმში – იმავე შეცდომას ვეღარ დავუშვებთ”, – განაცხადა კალასმა.
კაია კალასმა ასევე გააკრიტიკა საფრანგეთის პრეზიდენტი, ემანუელ მაკრონი, რომელიც ვლადიმირ პუტინს უკრაინაში ომის შესაჩერებლად დიპლომატიური გამოსავლის მოძიებისკენ მოუწოდებდა. კალასის აზრით, საფრანგეთის პრეზიდენტის ეს ნაბიჯი, ჰქმნის განწყობას, რომ პუტინი დანაშაულებისთვის პასუხისმგებლობის თავიდან აცილებას შეძლებს.
მისივე თქმით, პუტინს შეუძლია სახე გადაირჩინოს თუ ჯარებს რუსეთში დააბრუნებს, რადგან მისი ძალები სუვერენული ქვეყნის ტერიტორიაზე არიან.
“მე მასთან საუბრის აზრს ვერ ვხედავ, თუ ჩვენ გვსურს, ჩვენი გზავნილი იყოს, რომ იგი იზოლირებულია, ის ამისთვის დაისჯება და პასუხს აგებს ჩადენილი დანაშაულებისთვის”,- აღნიშნა კალასმა.
ესტონეთის პრემიერი ამბობს, რომ რუსეთის შეჭრის საპასუხოდ ევროპული ერთიანობის შენარჩუნება რთულია ომის გავლენის ფონზე, რადგან ახლა არის ეტაპი, როცა სანქციები დასავლეთსაც აზიანებს.
“თავიდან სანქციები მხოლოდ რუსეთისთვის იყო რთული, მაგრამ ახლა ჩვენ მივდივართ იმ მომენტამდე, როდესაც სანქციები მტკივნეულია ჩვენი ქვეყნებისთვის და ახლა საკითხავია, რამდენი ტკივილის ატანისთვის ვართ ჩვენ მზად. სხვადასხვა ქვეყნებისთვის ეს განსხვავებულია. ერთიანობის შენარჩუნება ძალიან რთულია. ეს სულ უფრო და უფრო რთულდება მაღალი ინფლაციისა და ენერგიაზე ფასების გამო”, – თქვა მან.
კალასმა აღნიშნა ისიც, რომ რუსეთ-უკრაინის ომისგან გამოწვეული მაღალი ინფლაციისა და ეკონომიკური ზრდის შენელების გამო ევროპული ერთიანობის შენარჩუნება რთულდება.
“ჩვენ იმ ეტაპზე ვართ, როდესაც სანქციები ჩვენს მხარეს აზიანებს. თავიდან სანქციები რუსეთის დასუსტებისკენ იყო მიმართული, მაგრამ ჩვენ მივდივართ იმ მომენტამდე, როდესაც სანქციები ჩვენი ქვეყნისთვის მტკივნეულია და საკითხავია ის, თუ რამდენი ტკივილის ატანისთვის ვართ მზად. ეს მაჩვენებელი სხვადასხვა ქვეყნისთვის განსხვავებულია. ერთიანობის შენარჩუნება ძალიან რთულია. მაღალი ინფლაციისა და ენერგორესურსების ფასების გამო სიტუაცია სულ უფრო და უფრო რთულდება.
თუმცა, გაზი შეიძლება ძვირი იყოს, მაგრამ თავისუფლება ფასდაუდებელია. თავისუფალ სამყაროში მცხოვრებ ადამიანებს ეს ნამდვილად არ ესმით”,– ამბობს კალასი.
კალასი სამშაბათს გერმანიის კანცლერს, ოლაფ შოლცს შეხვდება, ის ხაზს გუსვამს, რომ ევროკავშირი სწორ გადაწყვეტილებებს იღებს, მაგრამ უკრაინისთვის ძალიან ნელი ტემპით.
ავტორი
