ოზურგეთის მუნიციპალიტეტის სოფლებში ყველაზე მტკივნეული საკითხი უკიდურესად გაჭირვებული სოციალურად დაუცველი მრავალშვილიანი ოჯახების თემაა _ ამ ოჯახებს არ აქვთ მუდმივი საცხოვრებელი, პერმანენტულად უხდებათ გადაადგილება ერთი საცხოვრებლიდან მეორეში. მათი მძიმე ფინანსური მდგომარეობა ძალიან მძიმეა _ იღებენ სოციალურ დახმარებას და როგორც “გურია ნიუსთან” ამბობენ, იმის შიშით, რომ ეს დახმარება არ მოუხსნან, თურქეთში ვერ გადადიან სამუშაოს საძებნელად. გარდა მუდმივი ფსიქოლოგიური დაძაბულობისა, რაც უკავშირდება მუდმივად ახალი საცხოვრებლის ძიებას და ფინანსურ პრობლემებთან გამკლავებას, ისინი მუდმივად დგანან თავშესაფრის ან ლუკმა-პურის დაკარგვის საშიშროების წინაშე.
“გურია ნიუსმა” მრავალშვილიანი, სოციალურად დაუცველი ოჯახები მოინახულა.
ოზურგეთის მუნიციპალიტეტის სოფელ დვაბზუში ალექსანდრე თევზაძის 12-სულიანი ოჯახი ცხოვრობს. მათი საცხოვრებელი რამდენიმე ოთახისგან შედგება, ბავშვებს ცემენტის იატაკზე ძინავთ, სადაც არის პატარა საკუჭნაო და სამზარეულო.
მრავალსულიანი ოჯახიდან 5 სკოლის მოსწავლეა, ოჯახის უფროსები არსად მუშაობენ, ჰყავთ ერთი ცხენი, რომლითაც, ოჯახის დიასახლისის, მარგო თევზაძის თქმით, მეზობლებს ყანაში კულტივაციაში ეხმარება და სოციალურ დახმარებასთან ერთად, ოჯახში ლუკმა-პურის შემომტანია.
“თავს სოციალური დახმარებით ვირჩენთ თვიდან თვემდე, სხვა სამუშაო არ არის. სად და როგორ პირობებში ვცხოვრობთ, თქვენ თითონაც ხედავთ”, _ ამბობს თევზაძე.
ოზურგეთის მუნიციპალიტეტის სოფელ დვაბზუში მცხოვრები მირიან ღლონტის ოჯახიც მრავალშვილიანი და სოციალურად დაუცველია.
მირიანის მეუღლის ცირა ჟღენტის თქმით, 7-სულიან ოჯახში 4 მცირეწლოვანია:
“მე და ჩემი მეუღლე უმუშევრები ვართ. მძიმე ეკონომიკურ პირობებში გვიწევს ცხოვრება. რამდენიმე დღის წინ ოზურგეთის მაჟორიტარმა დეპუტატმა არჩილ თალაკვაძემაც მოგვინახულა”.
ოზურგეთის მუნიციპალიტეტის განათლების, ახალგაზრდობის საქმეთა და სოციალური დაცვის სამსახურის უფროსი მაიზერ ცელაძე “გურია ნიუსთან” კომენტარს აკეთებს და ამბობს, რომ ოზურგეთის მუნიციპალიტეტის გამგეობა დემოგრაფიული მდგომარეობის გაუმჯობესების მიზნით ახორციელებს მრავალშვილიანი ოჯახების დახმარების პროგრამას, რომელიც ითვალისწინებს “სოციალურად დაუცველი ოჯახების მონაცემთა ერთიან ბაზაში” რეგისტრირებული 0-დან და 57 001-მდე სარეიტინგო ქულის მქონე ოზურგეთის მუნიციპალიტეტის ტერიტორიაზე მცხოვრები მრავალშვილიანი ოჯახებისთვის (4 და მეტი 18-წლამდე ასაკის ბავშვი) ყოველთვიური მატერიალური დახმარების გაწევას თითოეულ ბავშვზე 15 ლარის ოდენობით:
“რაც შეეხება ოზურგეთის მუნიციპალიტეტის დვაბზუს ადმინისტრაციულ ერთეულში მცხოვრებ ალექსანდრე თევზაძისა და მირიან ღლონტის მრავალშვილიან ოჯახებს, ისინი არიან რეგისტრირებული სოციალურად დაუცველი ოჯახების მონაცემთა ერთიან ბაზაში, სხვა სოციალური პროგრამებით გათვალისწინებული დახმარების თაობაზე აღნიშნულ მოქალაქეებს ჩვენთვის არ მოუმართავთ”, _ ამბობს მაიზერ ცელაძე.
