“ნუ მომკლავთ!” _ ასე იწყება ქალაქ ოზურგეთში მცხოვრები 87 წლის ნარი ჩავლეიშვილის მიერ დაწერილი ათეულობით წერილი, რომელსაც ის ძალოვან სტრუქტურებს და ადგილობრივი ხელისუფლების წარმომადგენლებს უგზავნის.
ნარი ჩავლეიშვილის პრობლემის შესახებ “გურია ნიუსი” დიდი ხნის წინ წერდა, მაგრამ საქმე, რომელიც ათეულ წლებს ითვლის, ძალოვანი სტრუქტურის წარმომადგენლებს დღემდე გამოუძიებელი აქვს.
“გამქურდეს და დამაყაჩაღეს, გამანადგურეს, მოსპეს ჩემი ჯანმრთელობა და დღემდე გამოუძიებელია ეს საქმე. არადა, პოლიციას დავუსახელე ეჭვმიტანილები. ჩემს თავზე დატრიალებული ტრაგედიის მოწმეა ყველა ორგანო, მაგრამ შედეგი არ არის. 2004 წელს, ერთ-ერთი კერძო ობიექტის მესვეურებმა დამიზიანეს ავტოფარეხი, რაც ჩემთვის სასიცოცხლოდ მნიშვნელოვანია. ბინა, სადაც ამჟამად ვიმყოფები, საცხოვრებლად უვარგისია _ არ არის დენი, არ მოდის წყალი, ამიტომ სამზარეულოდ ვიყენებდი ავტოფარეხს, მისი აღდგენა ვერ მოხერხდა და ახლა უფასო სასადილოს იმედზე ვარ, სადაც ბოლო დროს განუკითხაობაა. ადრე კარგი კვება გვქონდა, ახლა ახალ პირობებზე გადაგვიყვანეს და ვნახოთ, რა იქნება.
მხოლოდ პენსიაზე ვარ დამოკიდებული და ისიც ვალებში მიდის. წამლის ფული მე არ მაქვს და პატრონი მე არ მყავს. ყველა უწყებას ოფიციალურად ვწერ, მაგრამ პასუხები იშვიათად მოდის. ვითხოვ, ჩემი გაუხსნელი საქმეების დროულად გამოძიებას და ყურადღების მოქცევას ადგილობრივი ხელისუფლებისგან.
ჩემზე ანეკდოტი დადის _ გაიზარდა სოფელ ბახვში და ცხოვრების ბოლო წლები გაატარა პოლიციასა და პროკურატურაშიო. ნამდვილად მწყდება გული, რომ 87 წლის ქალს ყურადღებას არ მაქცევენ”, _ გვითხრა ნარი ჩავლეიშვილმა.
საქმე წლების წინაა აღძრული, შინაგან საქმეთა სამინისტროსა და პროკურატურას შორის კი ამ ხნის განმავლობაში მიმოწერები მიმდინარეობს.
“07.40.2006 _ საქართველოს პროკურატურა, ოზურგეთის რაიონული პროკურატურა – ოზურგეთის შს რაიონული განყოფილების უფროსს ბატონ ელგუჯა ჩავლეიშვილს:
ოზურგეთის შს რაიონული განყოფილების წარმოებაში არსებულ სისხლის სამართლის #5699043 საქმეზე დასართავად გეგზავნებათ მოქალაქე ნარი თაყაიშვილის (ეს მისი მეორე გვარია) 2006 წლის 03 აპრილის განცხადება.
გიგზავნით რა ზემოთ აღნიშნულ განცხადებას, გთხოვთ, დაავალოთ საქმის მწარმოებელ გამომძიებელს სრულყოფილად გამოიკვლიოს ოზურგეთის რაიონული პროკურატურიდან გადმოგზავნილი როგორც წინა, ასევე, აღნიშნულ განცხადებაში მითითებული ფაქტობრივი გარემოებები და შემჭიდროვებულ ვადებში აწარმოოს საქმის ყოველმხრივი, ობიექტური და სრულყოფილი გამოძიება”, _ ხელს განცხადებაზე ოზურგეთის რაიონული პროკურატურის პროკურორი გრიგოლ კეზევაძე აწერს.
03/09/2006 _ შსს ოზურგეთის რაიონული სამმართველოს უბნის უფროსი ინსპექტორ-გამომძიებელი გიორგი ნემსაძე ნარი ჩავლეიშვილს წერს, რომ შსს ოზურგეთის რაიონულ სამმართველოში, განცხადებაში მოყვანილ ფაქტებზე აღძრულია სისხლის სამართლის საქმე და მიმდინარეობს გამოძიება.
12.10.2009 წელი _ საქართველოს შსს გურიის სამხარეო მთავარი სამმართველო, ოზურგეთის რაიონული სამმართველო წერს ნარი ჩავლეიშვილს:
“2009 წლის 25 სექტემბრის თქვენი განცხადების შესახებ გაცნობებთ, რომ სისხლის სამართლის #5607531 საქმეზე, მიმდინარეობს გამოძიება აღნიშნულ საქმეზე დაკითხულია მოწმეები, ხოლო თქვენ ცნობილი ხართ დაზარალებულად და დაკითხული ხართ დაზარალებულის სტატუსით.
აღნიშნულ სისხლის სამართლის საქმეზე წინასწარ გამოძიება არ შეწყვეტილა და ის მიმდინარეობს ამჟამადაც”, _ წერილს ხელს აწერს შსს გურიის სამხარეო მთავარი სამმართველოს ოზურგეთის რაიონული სამმართველოს უფროსი, პოლიციის მაიორი გია ურიდია.
03.07. 2009 წელი _ საქართველოს შინაგან საქმეთა სამინისტროს გენერალური ინსპექციის დასავლეთის რეგიონული სამმართველოს უფროსი ბ. ჭაბუკიანი:
“თქვენი განცხადების საფუძველზე ჩატარდა სრულყოფილი სამსახურებრივი შემოწმება, რა დროსაც ოზურგეთის რაიონული სამმართველოდან გამოთხოვილი და შესწავლილი იქნა 1999 წელს თქვენი საცხოვრებელი ბინის გაქურდვის და 2007 წელს თქვენზე ყაჩაღური თავდასხმის ფაქტების ირგვლივ არსებული მასალები.
გაცნობებთ, რომ ოზურგეთის რაიონული სამმართველოს თანამშრომლების მხრიდან სამსახურებრივი მოვალეობის შეუსრულებლობის ან სხვა გადაცდომის ფაქტები არ გამოვლენილა. 1999 წელს თქვენი საცხოვრებელი ბინის გაქურდვის და 2007 წელს თქვენზე ყაჩაღური თავდასხმის ფაქტებზე აღძრულ სისხლის სამართლის საქმეებზე მიმდინარეობს წინასწარი გამოძიება, დამნაშავე პირების დადგენა-დაკავების მიზნით, რაზედაც დამატებით იქნებით ინფორმირებული”.
25.12.2009 _ შსს გურიის სამხარეო მთავარი სამმართველოს უფროსის მოადგილე, დეტექტივების სამმართველოს უფროსი, პოლიციის პოლკოვნიკი ე. ჩავლეშვილი წერს გია ურიდიას და მალხაზ სირაძეს (ოზურგეთის პროკურორს):
“გამოძიების შემდგომი წარმართვისთვის გიბრუნდებათ სისხლის სამართლის საქმეები, ნარი ჩავლეიშვილის საცხოვრებელი ბინის გაქურდვისა და ჯანმრთელობის ნაკლებად მძიმედ დაზიანების ფაქტზე. დანაშაული გათვალისწინებული საქართველოს სსკ-ის 91-ე მუხლის მესამე ნაწილით (ძვ. რედაქცია) და 118-ე მუხლის პირველი ნაწილით.
სისხლის სამართლის საქმეებთან ერთად გეგზავნებათ დაზარალებულ ნარი ჩავლეიშვილის განცხადება. გთხოვთ, განიხილოთ განცხადებაში მოყვანილი გარემოებები და მიიღოთ შესაბამისი გადაწყვეტილება, რაზედაც აცნობეთ განმცხადებელს”.
23 .07 2013 წელი _ “სამართლებრივი შეფასებისა და შემდგომი რეაგირებისთვის გეგზავნებათ შს სამინისტროს გენერალურ ინსპექციაში შემოსული მოქალაქე ნარი თაყაიშვილის განცხადება, სადაც ის მიუთითებს ოზურგეთის რაიონული სამმართველოს თანამშრომლების მიერ მისი საცხოვრებელი სახლის გაქურდვისა და მასზე ყაჩაღური თავდასხმის ფაქტებზე არაობიექტურად წინასწარ გამოძიების წარმოების შესახებ.
გთხოვთ, მიღებული საბოლოო გადაწყვეტილების შესახებ აცნობოთ განმცხადებლებს და შსს გენერალურ ინსპექციის დასავლეთ რეგიონულ სამმართველოს”, _ წერილს ხელს აწერს შსს გენერალური ინსპექციის დასავლეთის რეგიონული სამმართველოს უფროსი ბ. ჭაბუკიანი.
2017 წელი 18 ივლისი _ ოზურგეთის რაიონული პროკურატურა წერს შსს ოზურგეთის რაიონულ სამმართველოს უფროსს თემურ სხირტლაძეს:
“შესწავლისა და სათანადო რეაგირებისთვის გეგზავნებათ ქალაქ ოზურგეთში, აკაკის ქუჩა #25-ში მცხოვრები ნარი ჩავლეიშვილის განცხადება, რომელიც შეეხება, როგორც წლების წინ მის მიმართ გახორციელებულ უკანონო ქმედებებს, აგრეთვე, ქალაქ ოზურგეთში მდებარე უპოვართა სასადილოში კვებასთან დაკავშირებით ამჟამად არსებულ დარღვევებს.
გთხოვთ, სრულყოფილად შეისწავლოთ განცხადებაში მოყვანილი გარემოებები და მიღებული კანონშესაბამისი გადაწყვეტილების შესახებ აცნობოთ განმცხადებელსა და ოზურგეთის რაიონულ პროკურატურას”, _ წერილს ხელს აწერს ოზურგეთის რაიონული პროკურატურის პროკურორი შოთა ჩხაიძე.
2018 წლის 8 მაისს, საგამოძიებო დანაყოფების რეგიონულ ტერიტორიულ ორგანოებში საპროკურორო საქმიანობაზე ზედამხედველობის სამმართველოს უფროსი ლონდა ბიჭიკაშვილი ოზურგეთის რაიონულ პროკურორს შოთა კვაჭანტირაძეს წერს:
“გეგზავნებათ 2018 წლის 16 აპრილს საქართველოს მთავარ პროკურატურაში შემოსული ნარი ჩავლეიშვილის განცხადება”.
2018 წლის 18 ივნისს, შსს გურიის პოლიციის დეპარტამენტის ოზურგეთის რაიონული სამმართველოს უფროსის მოადგილეს, გიორგი შარაშენიძეს ოზურგეთის რაიონული პროკურატურის პროკურორი ნიკა მახარაძე წერს:
“ქვემდებარეობით, შეტყობინებაში მითითებულ გარემოებების შესწავლისა და შემდეგი რეაგირების მიზნით გეგზავნებათ, მოქალაქე ნარი ჩავლეიშვილის განცხადება და თანდართული დოკუმენტაცია. გთხოვთ, მიიღოთ შესაბამის გადაწყვეტილება და შედეგების შესახებ აცნობოთ განმცხადებელს და ოზურგეთის რაიონულ პროკურატურას”.
2018 წლის 14 აგვისტო _ “შინაგან საქმეთა სამინისტროს გენერალურ ინსპექციაში განხილული იქნება თქვენი წერილი და განცხადება, სადაც გამოთქვამდით პრეტენზიას შინაგან საქმეთა სამინისტროს მომსახურების მიმართ. გაცნობებთ, რომ საქართველოს სისხლის სამართლის საპროცესო კოდექსის 32-ე მუხლის მოთხოვნათა შესაბამისად, გამოძიებაზე საპროცესო ხელმძღვანელობას ახორციელებს პროკურატურა, შესაბამისად, საგამოძიებო მოქმედებების მიმართებაში არსებულ პრეტენზიებთან დაკავშირებით შეგიძლიათ მიმართოთ პროკურატურას”, _ გენერალური ინსპექცია (დეპარტამენტი), ოპერატიული უზრუნველყოფის მთავარი სამმართველო, ოპერატიული უზრუნველყოფის მესამე სამმართველოს უფროსი გეგა ჭაფოძე.
ნარი ჩავლეიშვილი, ასევე, წერილებს წერდა ადგილობრივ ხელისუფლებას და მათ წარმომადგენლებს. მისი თქმით, ოზურგეთის მუნიციპალიტეტის მერს რვაჯერ მიწერა და პასუხი მისგან არ მიუღია.
ოზურგეთის მუნიციპალიტეტის მერიის პრესსამსახურის უფროსის ეკატერინე მგელაძის ინფორმაციით, “ოზურგეთის მუნიციპალიტეტის მერიის შესაბამისმა სამსახურმა განიხილა მოქალაქე ნარი ჩავლეიშვილის წერილი. მერიის ინფრასტრუქტურისა და არქიტექტურის სამსახურის სპეციალისტებმა სიტუაცია ადგილზე შეისწავლეს. აკაკის ქუჩაზე, სადაც ნარი ჩავლეიშვილის საცხოვრებელი სახლია, ამჟამად კანალიზაციის ქსელის მოწყობისა და მიწისქვეშა კომუნიკაციის მონტაჟის სამუშაოები მიმდინარეობს, რომლის დასრულების შემდეგ შესაბამისი სამსახური აღნიშნული პრობლემის მოგვარებაზე იზრუნებს”, _ ამბობენ მერიის პრესსამსახურში.
