უწყლობა, უგზოობა, ნაგავი _ როგორ ხვდება ურეკი ტურისტულ სეზონს

ურეკში ტურისტული სეზონი უკვე დაიწყო. ოზურგეთის მუნიციპალიტეტის ზღვისპირეთში სხვადასხვა ქვეყნიდან ჩამოსული დამსვენებლების ნაკლებობას არ უჩივიან და იმედი აქვთ, რომ მათი რიცხვი მკვეთრად გაიზრდება. თუმცა, ამ მოლოდინის გამართლებაში ადგილობრივების ნაწილს ეჭვი ეპარება _ ამის მიზეზად ისინი დაბაში არსებულ პრობლემებს ასახელებენ.

_ 2017 წელს დაიგო ცენტრალური გზა და მორჩა. მას შემდეგ აქეთკენ არავინ იყურება. პატარა ქუჩებში გადაადგილება შეუძლებელია. შარშან, ბევრმა ტურისტმა ამის გამო სხვა კურორტზე არჩია დასვენება. ხელისუფლებას რომ ეს გავაგებინეთ, დაპირება მივიღეთ, მაგრამ დაპირებად დაგვიტოვეს. ისევ ის სიტუაციაა, რაც შარშან, _ ამბობენ ურეკელები, რომელთა მთავარი პრობლემა უწყლობაა.

_ არ ვიცით, ვის მივმართოთ და რა გავაკეთოთ. წყალს მიაქვს მთელი გურია და ურეკში უწყლობით ვიხრჩობით. რამდენიმე უბანში დღეგამოშვებით, გრაფიკით მოდის წყალი. არის უბნები, სადაც კვირაში ერთხელ უშვებენ, _ გვიყვებიან ურეკში.

ადგილობრივები ხაზს უსვამენ იმ ფაქტს, რომ ცენტრალურ გზაზე არც სიჩქარის შემზღუდველი ნიშნებია და არც ბარიერები, რაც ყველასთვის სახიფათოა:

_ ზაფხულში ძალიან დატვირთული მოძრაობაა ცენტრალურ გზაზე, სადაც ერთი საგზაო ნიშანიც კი არ დგას. ამ გზაზეა სკოლა, საბავშვო ბაღი, სადაც ბარიერიც კი არაა გაკეთებული. მაინცდამაინც ვინმე უნდა მოკვდეს, რომ ეს გააკეთონ? _ ამბობენ ურეკელები.

მათივე თქმით, ხელისუფლებას ტურიზმის განვითარებაზე საუბარი მხოლოდ პიარისთვის სჭირდებათ:

_ რამდენიმე დღის წინ განაცხადეს, ურეკში ბულვარის მშენებლობა დავიწყეთ და 5 მილიონს ვხარჯავთო. ასეთი არაფერი გაგვიგია _ ის, რომ არაფერია დაწყებული და ერთი აგურიც არ დევს, თქვენც ხედავთ და რომც იყოს, ხომ სრული სიგიჟეა?! ვის გაუგია შუა ტურისტულ სეზონზე სამუშაოების დაწყება, პლაჟის გადათხრა? რა ბულვარი, რის ბულვარი. დაბის შემოსასვლელი ვერ გაუწმენდავთ, ელემენტარულად, ვერ გაუცელავთ. რკინიგზის სადგურთან, ბალახებმა დაფარა ყველაფერი; ნაგვის ურნებიც კი არ დგას არსად. როგორ შეიძლება ტურისტული ინფრასტრუქტურის მოწყობა დაიწყო და პლაჟთან ახლოს სანაგვე ურნაც კი არ დადგა?! _ დაბაში არსებულ რეალობაზე საუბრისას აღშფოთებას ვერ მალავენ ადგილობრივები.

ამ პრობლემებზე ყურადღებას ტურისტებიც ამახვილებენ _ უწყლობა, უგზოობა, ნაგვით სავსე კურორტი ყველას აწუხებს:

_ ძალიან კარგი კურორტია. შესანიშნავი ქვიშა და ზღვა, მაგრამ მოუვლელია. ირგვლივ სულ ნაგავია. სანაგვე ურნები ახლო-მახლო არსად დგას. ბევრ ადგილზე სამშენებლო ნაგავი ყრია და არ იღებენ, _ გვითხრეს ტურისტებმა.

იმის გასაგებად, როდის და როგორ აპირებს ადგილობრივი ხელისუფლება ამ უმნიშვნელოვანესი პრობლემების მოგვარებას, ოზურგეთის მერთან დაკავშირება ვცადეთ, თუმცა, კონსტანტინე შარაშენიძემ სატელეფონო ზარებს არ უპასუხა. ანალოგიურად მოიქცა მისი მოადგილე და პრესსამსახურის ხელმძღვანელი, რომლებიც, როგორც გვითხრეს. მერმა გააფრთხილა და ჩვენთან კონტაქტი აუკრძალა.

რაც შეეხება მსხვილ ინფრასტრუქტურულ პროექტს და მედიით გაშუქებულ ინფორმაციას ურეკში ბულვარის მშენებლობასთან დაკავშირებით, როგორც მუნიციპალური განვითარების ფონდში “გურია ნიუსს” უთხრეს, სამუშაოები მალე უნდა დაიწყოს და ამ თემაზე მოსახლეობის ინფორმირება ფონდის წარმომადგენლებმა უკვე მოახდინეს.