გუშინ კატარში მიმდინარე მსოფლიოს საფეხბურთო პირველობაზე მერვედფინალური სტადიის შეხვედრები დაიწყო.
ყველა მოელოდა რომ აშშ–ის ნაკრები ნიდერლანდების ეროვნულ გუნდს დაძაბულ ბრძოლას გაუმართავდა. ამერიკელთა სამწუხაროდ ლუის ვან გაალის ბიჭებმა მთელი შეხვედრა დამაჯერებლად წარმართეს და 3:1 გაიმარჯვეს.
არგენტინის ეროვნული გუნდი საუდის არაბეთთან განცდილი მარცხის შემდეგ გონს მოეგო და კატარში ზედიზედ მესამე მეტოქეს აჯობა. მერვედფინალში ლეო მესისა და მისი თანაგუნდელების მორიგი მსხვერპლი ავსტრალია აღმოჩნდა – 2:1.
მეოთხედფინალში არგენტინა ნიდერლანდებს დაუპირისპირდება.
გუშინ, ურუგვაის ნაკრების თავდამსხმელმა ლუის სუარესმა მსოფლიოს ჩემპიონატიდან გავარდნის შემდეგ სოციალურ ქსელში საყურადღებო პოსტი გამოაქვეყნა:
„მსოფლიოს ჩემპიონატიდან ასე დამშვიდობება ძალიან მტკივნეულია, თუმცა ამას სიამაყით ვაკეთებთ, რადგან დარწმუნებული ვართ, რომ მთელი ძალა და ენერგია მოედანზე ქვეყნის გულისთვის დავტოვეთ. ვამაყობთ, რომ ურუგვაელები ვართ, მიუხედავად იმისა, რომ სწორედ ამის გამო ბევრი პატივს არ გვცემს. მადლობა თითოეულ ურუგვაელს, ვინც მხარს გვჭირდება მსოფლიოს ნებისმიერი კუთხიდან“.
ურუგვაი – განას მატჩის დამატებულ დროში, აფრიკული გუნდის მცველმა ალიდუ სეიდუმ ედინსონ კავანი წააქცია, თუმცა შეხვედრის გერმანელმა არბიტრმა დანიელ ზიბერტმა პენალტი არ დანიშნა, მომენტი VAR-ის საშუალებითაც გადამოწმდა, მაგრამ გადაწყვეტილება არ შეცვლილა.
შეხვედრის დასრულების შემდეგ „BBC“–ის ექსპერტებმა ალან შირერმა და რიო ფერდინანდმა ისაუბრეს, მათი აზრით ამ მომენტში პენალტი უნდა დანიშნულიყო.
„ეს უდავოდ თერთმეტმეტრიანია, სეიდუმ კავანის წინააღმდეგ თამაშის წესები დაარღვია“ – აღნიშნა შირერმა.
„ამ მომენტში კონტაქტი აშკარად იყო, ვფიქრობ, პენალტი უნდა დანიშნულიყო“ – განაცხადა ფერდინანდმა.
საკამათო ეპიზოდის შესახებ კომენტარი „პარი სენ ჟერმენისა“ და „ტოტენჰემის“ ყოფილმა მწვრთნელმა, მაურისიო პოჩეტინომაც გააკეთა.
„რა თქმა უნდა, ჩემთვის ეს თერთმეტმეტრიანია, ფორვარდმა ჭკვიანურად იმოქმედა, როდესაც დაელოდა, თუ როდის დაარღვევდა წესებს მის წინააღმდეგ მეტოქე“.
საინტერესოა რომ ლუის სუარესსა და ედინსონ კავანის გუნდს მომდევნო სტადიაზე გასასვლელად მხოლოდ ერთი გატანილი ბურთი დააკლდათ.
ურუგვაის ეროვნული გუნდი მერვედფინალურ სტადიაზე პორტუგალიელთა უნიათო თამაშის გამოც ვერ გავიდა, რომელიც ჯგუფური ეტაპის დასკვნით შეხვედრაში სამხრეთ კორეასთან დამარცხდა.
ამ მატჩის შემდეგ ერთი სკანდალი აგორდა. კრიშტიანო რონალდო 65-ე წუთზე შეცვალეს და „ვარსკვლავთბიჭუნა“ შეხვედრის შემდეგ ცუდ ხასიათზე იყო.
იმ ფაქტმა, რომ პორტუგალიის ნაკრების მთავარმა მწვრთნელმა ფერნანდუ სანტუშმა 65-ე წუთზე მისი მოედნიდან გაყვანა გადაწყვიტა, ეუსებიოს რეკორდის (9 გოლი მსოფლიოს ჩემპიონატებზე) დამხობა გააძნელა. ამის გარდა კრიშტიანოს ძალიან არ უყვარს როდესაც მატჩის მიმდინარეობისას ცვლიან.
ესპანური გამოცემა „AS CMTV“-ის მტკიცებით, სათადარიგოთა სკამთან მისულმა რონალდომ მწვრთნელს სიტყვიერი შეურაცხყოფა მიაყენა.
მოგვიანებით რონალდომ ეს ამბავი უარყო: – „კორეელმა ფეხბურთელმა მომიწოდა, მოედნიდან უფრო სწრაფად გავსულიყავი. ჰოდა, ვუთხარი, მშვიდად იყავი, შენ ვინ გეკითხება–მეთქი. ავტორიტეტი არ აქვს. თუ მოედნიდან ნელა გავდივარ, მსაჯის საქმეა, ამაზე მიმითითოს.“
„გაჯავრებული“ ფეხბურთელი ფერნანდუ სანტუშმაც დაიცვა: – „კორეელ ფეხბურთელზე იყო გაბრაზებული. ეს ყველამ დაინახა. შეურაცხყოფა მიაყენეს და უთხრეს, სწრაფად გადიო“.
საინტერესოა, რომ კრიშტიანო რონალდო პირველი ფეხბურთელი გახდა, რომელმაც მსოფლიოს ჩემპიონატზე კარში 100-ჯერ დაარტყა. სტატისტიკა 1966 წლის შემდეგ ითვლება.
განის ეროვნული ნაკრების მთავარმა მწვრთნელმა ოტო ადომ თანამდებობა დატოვა. ამის შესახებ მან ურუგვაისთან მატჩის შემდეგ პრესკონფერენციაზე განაცხადა.
„მსოფლიოს ჩემპიონატიც რომ მოგვეგო, მაინც წავიდოდი. ჩემი ოჯახი ჩვენს მომავალს გერმანიაში ხედავს“, – თქვა 47 წლის განელმა მწვრთნელმა.
ოტო ადო განის ნაკრებს მიმდინარე წლიდან ხელმძღვანელობდა და მთავარ მწვრთნელად მან კარიერაში პირველად იმუშავა. ოტო ადო გერმანიაში, ქალაქ ჰამბურგშია დაბადებული და კარიერის უმეტესი ნაწილიც იქ აქვს გატარებული.
ოტო ადო, კარლოს კეირუშის, ხერარდო მარტინოსა და რობერტო მარტინესის შემდეგ მეოთხე მწვრთნელია, რომელმაც მუნდიალზე ჯგუფში ჩარჩენის შემდეგ თანამდებობა დატოვა.
ბელგიის ფეხბურთის ფედერაციას რობერტო მარტინესის შემცვლელი უკვე მოძიებული ყავს. ნიდერლანდების ნაკრების მთავარმა მწვრთნელმა ლუის ვან გაალმა, აშშ–ის ნაკრებთან მატჩისწინა პრესკონფერენციაზე ბელგიის ნაკრების მწვრთნელობა არ გამორიცხა. როგორც მან თქვა, გადაწყვეტილებას მეუღლესთან ერთად მიიღებს.
„მე ბელგიის ნაკრების მწვრთნელად? ჩემი მეუღლე, ტრუუსი უნდა დაარწმუნოთ. შემიძლია გადაწყვეტილება მივიღო, როგორც თავისუფალმა ადამიანმა , მაგრამ არის ქვეყნები, სადაც არც მე წავალ და არც მეუღლე გამომყვება.
ახლა მხოლოდ მსოფლიოს ჩემპიონატსა და ნიდერლანდების ნაკრებზე ვფიქრობ. ვმუშაობთ იმისთვის, რომ მსოფლიოს ჩემპიონატები გავხდეთ და 4 თამაშია დარჩენილი. მსოფლიოს ჩემპიონები რომ გავხდეთ, შეთავაზებებსაც მივიღებ, მაგრამ ჯერ არ ვართ და ნიდერლანდური მედიაც გვაკრიტიკებს. წარსულით არ ვცხოვრობ, მომავლით ვცხოვრობ. ბელგიის ნაკრების ჯგუფში ჩარჩენა მე არ მიკვირს, ფეხბურთში ყველაფერი ხდება, ჩვენ მოვახერხეთ მათი დამარცხება ბოლო მატჩებში. ფეხბურთში საჭიროა იღბალი, მსაჯებიც თამაშობენ როლს, მხოლოდ ტექნიკა და ტაქტიკა არ არის მნიშვნელოვანი“, – თქვა ვან გაალმა.
ლუის ვან გაალი ნიდერლანდების ნაკრებს მუნდიალის დასრულების შემდეგ დატოვებს, რადგან რონალდ კუმანთან კონტრაქტი უკვე გაფორმებულია და სწორედ ის იქნება ნაკრების ახალი მწვრთნელი.
გუშინ, ფიფას პრესსამსახურმა განცხადება გაავრცელა, რომელშიც განმარტებულია, რომ იაპონიისა და ესპანეთის მატჩში აზიელთა მეორე გოლის მომენტში ბურთს მოედნის ფარგლები ბოლომდე არ დაუტოვებია.
„სხვადასხვა რაკურსმა შეიძლება შეცდომაში შეგიყვანოთ, მაგრამ არსებული მტკიცებულებებიდან გამომდინარე, ჩანს, რომ ბურთი სრულად გადასული არ არის“, – ნათქვამია ფიფას განცხადებაში.
ხსენებულ მომენტში გოლი აო ტანაკამ გაიტანა და იაპონიამ 2:1 მოიგო, რის შედეგადაც, ჯგუფში გერმანიის ნაკრები ჩარჩა.
გერმანიის ნაკრებზე ჩამოვარდა საუბარი და ახლო წარსულში ცნობილი ფეხბურთელი ბასტიან შვაინშტაიგერი მსოფლიოს ჩემპიონატზე გერმანიის ნაკრების ჯგუფში ჩარჩენას გამოეხმაურა და განაცხადა, რომ ეს მისთვის შოკისმომგვრელი ამბავია.
„ძალიან იმედგაცრუებული და შოკირებული ვარ იმით, თუ როგორ წარიმართა ტურნირი გერმანიის ნაკრებისთვის. ზოგადად, გუნდის თამაში საკმარისად კარგი არ იყო. როცა ანგარიშში წინ ხარ, არ შეიძლება მუდმივად მეტოქეს მისცე თამაშში დაბრუნების რწმენა. როცა მე ნაკრებში ვთამაშობდი, მსგავსი არაფერი მახსენდება. გუნდი დაცვაში კონცენტრირებული არ იყო და უბრალოდ მეტოქეებს უყურებდნენ“, – თქვა ბასტიან შვაინშტაიგერმა.
ბრაზილიის ნაკრების ფეხბურთელის ნეიმარის მამამ, უფროსმა ნეიმარმა თავის შვილზე ისაუბრა და თქვა, რომ ის მოედანზე ფინალისთვის დაბრუნდება.
„ვფიქრობ, ნეიმარი მოედანზე ფინალისთვის დაბრუნდება და ყველაფერს გააკეთებს იმისათვის, რომ თანაგუნდელებს ტურნირის მოგებაში დაეხმაროს. რაც მთავარია, მას ფორმის პიკში დაბრუნება შეუძლია. ყველამ იცის, რომ ჩემს შვილს გუნდზე დიდი გავლენა აქვს, ის ნომერ პირველია“, – თქვა ნეიმარის მამამ.
ბრაზილიური მედიის ცნობით, ნეიმარს გამოჯანმრთელების პროცესში პროგრესი კი აქვს, თუმცა ამ დრომდე ვერ ვარჯიშობს. ბრაზილიელთა საწვრთნელ ცენტრში უკვე დაბრუნდნენ ტრავმირებული დანილო და ალექს სანდრო, ხოლო ნეიმარი სასტუმროში დარჩა.
თუ „პსჟ“–ის თავდამსხმელი სამ დეკემბერს წვრთნის პროცესში ჩართვას შეძლებს, სავარაუდოდ, მსოფლიოს ჩემპიონატის 1/8-ფინალის შეხვედრაში სათადარიგოთა სკამზე იქნება და ცვლილებაზე მხოლოდ უკიდურეს შემთხვევაში ითამაშებს. წესით, ნეიმარი მზად 1/4-ფინალური მატჩისთვის უნდა იყოს. ბრაზილიური მედიის მტკიცებით, საჭიროების შემთხვევაში, ფეხბურთელი, რომლისთვისაც მსოფლიოს ჩემპიონატზე გამარჯვება კარიერის უმთავრესი მიზანია, გამაყუჩებლებით თამაშზეც კი თანახმაა.
მსოფლიო ჩემპიონატის ბოლო ტურში ბელგიას შეეძლო ხორვატია დაემარცხებინა და ფლეი–ოფში გასულიყო, მაგრამ შესვენების შემდეგ შეცვლაზე შესულმა რომელუ ლუკაკუმ ოთხი ნაღდი მომენტი ვერ გამოიყენა, მატჩი 0:0 დასრულდა, მისი გუნდი ჯგუფში ჩარჩა, ხოლო მეტოქემ გათამაშების შემდეგ ეტაპზე გააღწია.
ლუკაკუ ტურნირზე ერთ ტაიმში ხელიდან გაშვებული მომენტების მიხედვით ანტირეკორდსმენი და ბელგიელთა წარუმატებლობის სიმბოლო გახდა.
ხორვატიის ეროვნული გუნდის ყოფილმა ნახევარმცველმა ივან რაკოტიჩმა განაცხადა, რომ მას მათგან „ჯილდო“ ეკუთვნის: „კარგი ხარ, ლუკაკუ! სპლიტში ერთთვიანი შვებულება ჩვენი ხარჯით უნდა მოვუწყოთ“.
თურქეთის ტელეკომპანია „TRT“–ზე კი მატჩის მიმდინარეობისას კომენტატორი გამოცვალეს იმის გამო, რომ მან ეთერში ჰაქან შუქურის სახელი ახსენა.
მაროკოსა და კანადის მატჩში, როდესაც ჰაკიმ ზიეშმა გოლი გაიტანა, კომენტატორმა ალფერ ბაკირჩიღილმა გაიხსენა, რომ მსოფლიოს ჩემპიონატის ისტორიაში ყველაზე სწრაფი გოლის ავტორი თურქი თავდამსხმელი ჰაქან შუქურია.
მეორე ტაიმში მატჩი უკვე სხვა კომენტატორმა წაიყვანა და განმარტება თუ რატომ მოხდა ცვლილება, არ გაკეთებულა.
ცნობილია, რომ ჰაქან შუქურს თურქეთის ხელისუფლებასთან პრობლემები აქვს და პრეზიდენტ რეჯეფ ტაიფ ერდოღანის მტერია, რის გამოც ახლო წარსულში ლეგენდარული ფეხბურთელი სამშობლოში დაბრუნებას ვერ ახერხებს და დღემდე აშშ–ში ცხოვრობს.
ავტორი
