“გურია ნიუსმა” არა ერთი სტატია მოამზადა გურიაში დაანონსებული ახალი სკოლების მშენებლობის თუ ძველი შენობების რეაბილიტაციის შესახებ. ამ ჟურნალისტური მოკვლევების მთავარი “გმირი“, როგორც დამკვეთი, სსიპ საგანმანათლებლო და სამეცნიერო ინფრასტრუქტურის განვითარების სააგენტო იყო.
როგორც ჩვენთვის გახდა ცნობილი, ეს საჯარო სამართლის იურიდიული პირი ერთი თვეა ლიკვიდირებულია! ინფრასტრუქტურულ ნაწილში, მისი ფუნქციები მუნიციპალური განვითარების ფონდს გადაეცა. სწორედ ამ უწყებისგან შევიტყვეთ, რომ დამკვეთი იურიდიული პირი ლიკვიდირებულია და საგანმანათლებლო და სამეცნიერო ინფრასტრუქტურის განვითარების სააგენტოს უფლებამონაცვლე უწყებების განსაზღვრისა და მათთვის სათანადო უფლებამოსილებების გადაცემის შესახებ” საქართველოს მთავრობის 2025 წლის 30 ივლისის #302 დადგენილების თანახმად, ფუნქციები გადანაწილდა.
“გურია ნიუსის” მიერ ფონდისთვის მიმართვის მიზანი კი ერთ-ერთი დაუსრულებელი ობიექტის – ოზურგეთის მუნიციპალიტეტის ზემო ნატანების საჯარო სკოლის ბედის გარკვევა იყო. მკითხველს შევახსენებთ ამ შენობის უახლეს “ისტორიას”: 2022 წლის 14 სექტემბერს, ოზურგეთის მუნიციპალიტეტის საგანმანათლებლო რესურსცენტრიდან გამოთხოვილი ინფორმაციით გავიგეთ, რომ უნდა დაწყებულიყო ზემო ნატანების საჯარო სკოლის ახალი შენობის მშენებლობა. ორი წლის შემდეგ, 2024 წელს, ზემო ნატანების სკოლის შენობის სრული დემონტაჟიც კი არ იყო დასრულებული. ამჯერად, 2025 წელს, ჩვენს ხელთ არსებული ინფორმაციით, როგორც იქნა, შენობის დემონტაჟი დასრულდა.
დეტალების გასარკვევად ისევ ოზურგეთის მუნიციპალიტეტის საგანმანათლებლო რესურსცენტრს მივმართეთ კითხვებით, მაგრამ მათზე პასუხები ამ დრომდე არ მიგვიღია. სამაგიეროდ, სსიპ მუნიციპალური განვითარების ფონდიდან გამოგზავნილ პასუხში ბევრი საგულისხმო ინფორმაციაა. ამ წერილში ვკითხულობთ: “ოზურგეთის მუნიციპალიტეტის სოფელ ზემო ნატანების საჯარო სკოლის პროექტთან დაკავშირებით გაცნობებთ, რომ პროექტს ახორციელებდა სსიპ საგანმანათლებლო და სამეცნიერო ინფრასტრუქტურის განვითარების სააგენტო, რომელიც მიმდინარე წლის სექტემბრის თვიდან ლიკვიდირებულია. “საჯარო სამართლის იურიდიული პირის _ საგანმანათლებლო და სამეცნიერო ინფრასტრუქტურის განვითარების სააგენტოს უფლებამონაცვლე უწყებების განსაზღვრისა და მათთვის სათანადო უფლებამოსილებების გადაცემის შესახებ” საქართველოს მთავრობის 2025 წლის 30 ივლისის #302 დადგენილების თანახმად, ინფრასტრუქტურის ნაწილში ფონდს გადმოეცა გარკვეული უფლებამოსილებები. ამ დროისთვის მიმდინარეობს პროექტის გადმოცემის პროცედურები, აქვე გეტყვით, რომ პროექტი ხორციელდება Design-Build მეთოდით“.
მკითხველს შევახსენებთ, რომ Design-Build-ის მეთოდი ნიშნავს, რომ დამპროექტებელიც და მშენებლობის გამახორციელებელი ერთი და იგივე ორგანიზაციაა.
როგორც ამ პასუხიდან ხედავთ, ამ ეტაპისთვის უცნობია როდის დაიწყება სკოლის ახალი შენობის მშენებლობა და როდის განახლდება სასწავლო პროცესი სოფელში. მანამდე კი, ზემო ნატანების საჯარო სკოლის მოსწავლეები და მასწავლებლები სასწავლო პროცესს თხინვალის საჯარო სკოლაში გაივლიან.
ასევე, წლებია სასწავლო პროცესი არ მიმდინარეობს ქვემო ნატანების საჯარო სკოლაშიც. ამ ობიექტთან დაკავშირებით, პროცესი უფრო წინაა წასული და მისი დასრულების ვადაც დათქმულია – 2026 წლის პირველი აგვისტო. სსიპ “მუნიციპალური განვითარების ფონდის” მიერ მოწოდებული ინფორმაციით, ვიგებთ, რომ სკოლის შენობის რეაბილიტაციის დროს “დაუგეგმავი” პრობლემები გამოჩნდა და პროცესიც ამიტომ გაიწელა:
“რეაბილიტაციის სამუშაოებს “შპს “ჯორჯიანს კონსტრაქშენ კომპანი” აწარმოებს. სამუშაოები დაიწყო 2024 წლის პირველ კვარტალში. რეაბილიტაციის პროცესში გამოვლინდა რიგი გარემოებები, რის გამოც პროექტში გახორციელდა გარკვეული ცვლილებები, კერძოდ: შენობაში სადემონტაჟო სამუშაოებისას გამოვლინდა კონსტრუქციული პრობლემები, რომლებმაც საჭირო გახადა კონსტრუქციული გადაწყვეტების გადამუშავება და შესაბამისი დოკუმენტაციის მომზადება; ადგილობრივი მუნიციპალიტეტისა და განათლების სამინისტროს მიმართვის საფუძველზე, პროექტში დამატებით გათვალისწინებულ იქნა შენობაში ინტეგრირებული თეატრის დარბაზის რეაბილიტაცია და აღჭურვა (თეატრის დარბაზის კონსტრუქციული გამაგრება უკვე შესრულებულია, ხოლო საპროექტო დოკუმენტაცია აღჭურვისა და სრული განახლებისთვის დასრულების ეტაპზეა); საძირკვლის სამუშაოებისას სარდაფის სივრცეში წყლის მოცილების სერიოზული პრობლემა გამოვლინდა, რის გამოც მომზადდა დრენაჟის პროექტი, რომელიც თავდაპირველ პროექტში გათვალისწინებული არ იყო. ზემოაღნიშნული გაუთვალისწინებელი, ობიექტური გარემოებებიდან გამომდინარე, პროექტის დასრულების ვადა გადაიწია _ სამუშაოების დასრულება დაგეგმილია 2026
წლის 1 აგვისტოსთვის“, _ ნათქვამია მუნიციპალური განვითარების ფონდის მიერ გამოგზავნილ წერილში.
“გურია ნიუსი” ამ თემაზე მუშაობას ისევ აგრძელებს და დამატებით ინფორმაციას აუცილებლად შემოგთავაზებთ.
ავტორი
