ლანჩხუთში სამსახურების რეორგანიზაცია, რომელიც ა(ა)იპ-ებში საკრებულოს თანხმობით განხორციელდა, ნაწილობრივ დასრულებულია. მუნიციპალიტეტის მერმა, ალექსანდრე სარიშვილმა დღეს ოფიციალურად წარადგინა სამი სამსახურის _ სპორტული ცენტრის, კულტურის დაწესებულებათა გაერთიანებისა და ლანჩხუთის კეთილმოწყობისა და მომსახურების ცენტრის ახალი ხელმძღვანელები.
სპორტული ცეტრი გოჩა ლომაძეს ჩააბარეს, რომელიც მანამდე ამავე ცენტრში იყო დასაქმებული მწვრთნელად. მან ამ თანამდებობაზე გაგა იმნაიშვილი ჩაანაცვლა, რომელიც ამ სამსახურს 2015 წლიდან ედგა სათავეში და იგი ყოფილი გამგებლის, ზაზა ურუშაძის კადრად მოიაზრებოდა.
რაც შეეხება ლომაძეს, იგი წინა საარჩევნო პერიოდში ალექსანდრე სარიშვილის აქტიური მხარდამჭერი იყო და ჯრ კიდევ მაშინ ანონსდებოდა, რომ სარიშვილის მერობის შემთხვევაში, სპორტული ცენტრის ხელმძღვანელობას მას ჩააბარებდნენ.
რაც შეეხება კულტურის გაერთიანებას, რომელსაც პროფესიით პედაგოგი ადელინა კილაძე უძღვებოდა, აქ მუნიციპალიტეტის ხელმძღვანელობამ არჩევანი ახალგაზრდა და პროფესიონალ კადრზე, რეჟისორ დავით წერეთელზე შეაჩერა. იგი მანამდე გაერთიანების დაქვემდებარებაში მყოფ თეატრს ედგა სათავეში.
რაც შეეხება ლანჩხუთის კეთილმოწყობისა და მომსახურების ცენტრს, რომელიც „ლანჩხუთი-სერვისისა“ და „ტექ-სერვისის“ შერწყმით შეიქმნა, აქ მერმა დავით წულაძის კანდიდატურა წარმოადგინა, რომელიც აქამდე სკოლამდელი სააღმზრდელო ცენტრის დირექტორის თანამდებობას იკავებდა.
„ბატონი დავითი პროფესიონალი და დისციპლინის მოყვარული ადამიანია“, _ ხაზგასმით აღნიშნა წულაძის კანდიდატურის წარდგენისას ალექსანდრე სარიშვილმა. თუმცა, ცნობილი ფაქტია, რომ წულაძეს არც მთლად იდიალური ურთიერთობები ჰქონდა სკოლამდელი სააღმზრდელო ცენტრის და მის დაქვემდებარებაში მყოფი საბავშვო ბაღების რიგ თანამშრომლებთან.
„გურია ნიუსთან“ საუბრისას ბაღების რამდენიმე თანამშრომელმა აღიარა კიდეც, რომ წულაძის სხვა თანამდებობაზე გადაყვანის პირობა მათ, ლანჩხუთის ამჟამინდელი ხელმძღვანელობისგან ჯერ კიდევ გასულ წელს, წინასაარჩევნო პერიოდში მიიღეს არჩევნებზე მხარდაჭერის სანაცვლოდ.
როგორც ამბობენ, დავით წულაძის დანიშვნით მუნიციპალიტეტის ხელმძღვანელობამ „ორი კურდღელი ერთდროულად დაიჭირა“. ერთი, რომ წინასაარჩევნო პირობა შეასრულა და იმათი გული მოიგო, ვისაც წულაძესთან სამსახურებრივი პრობლემები ჰქონდა. ამასთანავე, გზიდან ჩამოიშორა ნუგზარ ცინცაძე, იგივე „ცანცუა“. ეს უკანასკნელი ოფიციალურად „ტექ-სერვისის“დირექტორის მოადგილის პოსტს იკავებდა, თუმცა, ყველამ კარგად იცოდა, რომ რეალურად ის იყო ამ ა(ა)იპ-ის მმართველი და პოზიციების დათმობა არც ამჯერად სურდა და პირდაპირ ხელმძღვანელობაზე ჰქონდა პრეტენზია.
არადა, როგორც ამბობენ, ფაქტობრივად, გადაწყვეტილი იყო, რომ ძველი კადრი „ლანჩხუთი-სერვისის“ დირექტორი, თენგიზ ჭიჭილეიშვილი პოსტს შეინარჩუნებდა და გაერთიანებულ სამსახურს ჩაუდგებოდა სათავეში. თუმცა, საბოლოოდ, ასე არ მოხდა, რაშიც ბევრი „ცანცუას“ ფაქტორით ხსნის, რომელიც, როგორც ამბობენ, ახლადშექმნილ სამსახურში მოადგილედ დარჩება.
გარდა ამისა, ვრცელდება ინფორმაცია, რომ წულაძეს კიდევ ერთი მოადგილე ეყოლება მერაბ ქარჩავას სახით, რომელიც, დღესდღეობით, კულტურის დაწესებულებათა გაერთიანებაშია დასაქმებული.
ქარჩავა წინა ხელისუფლების პერიოდში ნარკოტიკული ნივთიერების უკანონოდ გასაღების ბრალდებით დააკავეს, თუმცა, ხელისუფლების ცვლილების შემდეგ, ამნისტია შეეხო და პატიმრობიდან გათავისუფლდა და კულტურის დაწესებულებაში დასაქმდა. თუმცა, დაინიშნებიან თუ არა რეალურად ნუგზარ ცინცაძე და მერაბ ქარჩავა წულაძის მოადგილეებად, ამაზე ახლადდანიშნული დირექტორი დუმს.
