მას შემდეგ რაც საფეხბურთო კლუბ „გურიას“ აღმასრულებელი დირექტორის პოსტზე ოთარ ჩხაიძე, დროებით, კლუბის იურისტმა ვლადიმერ გვარჯალაძემ ჩაანაცვლა, ამ პოსტზე არაერთი კანდიდატურა მოიაზრებოდა.
მათ შორის ყველაზე რეალური ჩანდა ნუგზარ ჩხაიძის კანდიდატურა. მითუმეტეს, რომ სატყეო სამსახურიდან მისი გათავისუფლების შემდეგ ის უმუშევარი დარჩა, თან არც საფეხბურთო გამოცდილება დაეწუნება. ჩხაიძე წლების განმავლობაში ყოველთვის ასოცირდებოდა „გურიას“ მესვეურთა შორის. მითუმეტეს, ბოლო დროს ვრცელდებოდა ინფორმაცია, რომ მის კანდიდატურას ლობირებდა ლანჩუთის მუნიციპალიტეტის ყოფილი მაჟორიტარი თემურ ჩხაიძე, რომელიც მისი უახლოესი მეგობარია.
თუმცა, თავის დროზე „გურია ნიუსთან“ საუბარში თავად ექს-მაჟორიტარი კატეგორიულად უარყოფდა ვინმეს ლობირებას და საერთოდ კლუბთან მიმართებაში მის რაიმე კავშირს.
„სისულელეა ეს ყველაფერი! მე არავის არ ვლობირებ,საერთოდ არ ჩავრეულვარ და არც ახლა ვერევი კლუბის საკითხებში“, – ამბობდა თემურ ჩხაიძე.
გუშინ, დღის მეორე ნახევარში „გურიასთან“ დაკავშირებით საკმაოდ მწვავე შეხვედრა გაიმართა მუნიციპალიტეტის ადმინისტრაციულ შენობაში. სწორედ ამ შეხვედრის შემდეგ გავრცელდა ნუგზარ ჩხაიძის აღმასრულებელ დირექტორად დანიშვნის შესახებ ინფორმაცია. ინფორმაციის გადამოწმების შემდეგ გაირკვა, რომ ამ საკითხზე შეხვედრისას უსაუბრიათ, თუმცა, საბოლოო გადაწყვეტილება გამგებელს ჯერჯერობით, არ მიუღია.
„გურია ნიუსთან“ საუბრისას, ამას ადასტურებენ როგორც კლუბის მოქმედი ხელმძღვანელები თენგიზ კიკვაძე და ლადო გვარჯალაძე, ასევე თავად ნუგზარ ჩხაიძეც, რომლის თქმით, აღმასრულებელი დირექტორის თანამდებობაზე მართლაც მოიაზრება მისი კანდიდატურა, თუმცა საბოლოო გადაწყვეტილება ჯერ მიღებული არაა.
„ჯერჯერობით, გარკვეული არაა მე დავინიშნები თუ არა ამ პოსტზე. როგორც კი საკითხი გადაწყდება, მედიას აუცილებლად ჩავაყენებ საქმის კურსში და კლუბთან მიმართებაში ჩემს სამოქმედო გეგმასაც გავაცნობ. ჩვენი უმთავრესი მიზანია, რომ „გურიას“სპონსორი გამოუჩნდეს და გუნდმა ნორმალურად ფუნქციონირება შეძლოს“, _ამბობს ჩხაიძე.
სხვათაშორის, თუ გავითვალისწინებთ იმასაც, რომ ნუგზარ ჩხაიძე პირველია ვინაც ხელს აწერს საფეხბურთო კლუბ ლანჩხუთის „გურიას“ გულშემატკივართა მიერ გავრცელებულ განცხადებას, სადაც სპონსორის საკითხთან დაკავშირებით საკრებულოს თავმჯდომარეს, გოგი ხელაძეს რიგგარეშე სხდომის მოწვევის თხოვნით მიმართავენ, უნდა ვივარაუდოთ, რომ სწორედ იგია ამ ჯგუფის სულისჩამდგმელი.
როგორც არ უნდა იყოს ფაქტია, რომ კლუბში პრობლემები დაგროვდა, დროში საკმაოდ გაიწელა დირექტორატის დანიშვნის საკითხი. გარდა აღმასრულებელი დირექტორისა, ამ დრომდე ვაკანტურია ასევე სპორტული დირექტორის პოსტიც, რომელიც მანამდე ედიშერ ჟორდანიას ეკავა. ამას ემატება ისიც, რომ დაანონსებული სპონსორის თემა ისევ ბუნდოვანია და მერაბ ჟორდანიას ჩამოსვლა ისევ დიდი კითხვის ქვეშაა. ჰოდა, ამ ფონზე სულაც არაა გასაკვირი, რომ „გურიამ“ ჩემპიონატის პირველი ორი შეხვედრა რომ დათმო, გათამაშების ცხრილში ბოლო ადგილი უკავია და ამ ლიგიდანაც გავარდნის ერთ-ერთი უპირველესი კანდიდატია.
