ვარკეთილის ზემო პლატოს მეორე მიკრორაიონში 11 სართულიანი საცხოვრებელი კორპუსის მშენებლობის წინააღმდეგ პროტესტი ყოველდღიურ რეჟიმში გრძელდება.
„ვიცავთ ჩვენს სივრცეს ფიზიკურად, ამას გარდა, მზადდება სარჩელი სასამართლოში, სადაც ვიდავებთ თბილისის მერიასთან. ვასაჩივრებთ თბილისის მერიის გამოცემულ ადმინისტრაციულ სამართლებრივ აქტებსა და ბრძანებას, რომლის საფუძველზეც გაიცა სამშენებლო ნებართვა. ანუ, ფაქტობრივად, გვსურს ნებართვის ბათილად ცნობა. დიდი იმედი გვაქვს გამარჯვების, რადგან, ჩვენი სამართლებრივ-უფლებრივი სიკეთის შელახვა ცალსახად ნათელია“, _ ამბობენ მაცხოვრებლები.
როგორც ფეისბუქზე შექმნილი გვერდი „ანას ბაღის გადასარჩენად“ ავრცელებს ინფორმაციას შეხვედრა მერიაში ვიცე-მერ ილია ელოშვილთან და ინვესტორებთან რამდენჯერმე შედგა. ინვესტორები მზად იყვნენ ადგილმონაცვლეობის შესახებ ემსჯელათ, თუმცა, მოლაპარაკებები ჩიხში შევიდა.
„ანას ბაღის ბედთან დაკავშირებით გასულ თვეს მერიაში რამდენიმეჯერ შედგა შეხვედრა ვიცე-მერთან, ბატონ ილო ელოშვილთან და ინვესტორებთან. პირველსავე შეხვედრაზე ინვესტორებმა გამოთქვეს მზადყოფნა გვემსჯელა ადგილმონაცვლეობაზე, ვიცე-მერი კი დაგვპირდა დახმარების გაწევას. ასეც მოხდებოდა, მაგრამ გარკვეულ ეტაპზე მოლაპარაკება შევიდა ჩიხში. თავიდან მერიაში განწყობილნი იყვნენ ადგილმონაცვლეობაზე ემსჯელათ, თუმცა მერე გადათქვეს. მშენებლებისგან შევიტყვეთ, რომ ადგილმონაცვლეობის „წინააღმდეგი“ ყოფილა თავად მერია. ერთადერთი დასკვნა, რის გამოტანაც შეიძლება არის ის, რომ კალაძეს არავინ არ ეკითხება არაფერს. თბილისი, ისევე, როგორც დანარჩენი საქართველო, არის ერთი მუჭა ადამიანების „შ.პ.ს.“ ჩვენ დაკარგული გვაქვს ჩვენი დედაქალაქი! ამჯერად ეს არც მონღოლებს გაუკეთებიათ და არც რუსებს!!! ეს გააკეთეს ქართველებმა!!! ყველას მოგიწოდებთ გავაგრძელოთ ბრძოლა და თბილისის დაბრუნება დავიწყოთ „ანას ბაღიდან“!“_ წერია გავრცელებულ ინფორმაციაში.
აღსანიშნავია, რომ გასულ წელს მერიამ ანას ბაღთან მშენებლობის ნებართვა გააბათილა, კითხვით თუ რატომ დგას მოსახლეობა ისევ აღნიშნული პრობლემის წინაშე „გურია ნიუსი“ დედაქალაქის მერიის არქიტექტურის სამსახურს დაუკავშირდა. სადაც გვითხრეს, რომ სამშენებლო კომპანიას პროექტში ტექნიკური ხარვეზი ჰქონდა, რის გამოც, ადრე უარი ეთქვა, შემდეგ კი კომპანიამ ხარვეზი გამოასწორა და ნებართვაც თავიდან მისცეს.
„პროექტში ტექნიკური საკითხი იყო არასწორად მითითებული, რაც გამოასწორეს და ამის გამო გაიცა ნებართვა. მოხდა ინვესტორის ცვლილება. ინვესტორმა დაიწყო სამშენებლო სამუშაოები. ანას ბაღში მშენებლობა არ იგეგმებოდა და არც იგეგმება. საუბარია ბაღის მიმდებარედ არსებულ ტერიტორიაზე. მერია მუდმივ კავშირშია ინვესტორთან და მოსახლეობასთან. იმედი გვაქვს გამოვძებნით ურთიერთმისაღებ გადაწყვეტილებებს“,_ გვიპასუხეს თბილისის არქიტექტურის სამსახურში.
ადგილობრივი მოსახლეობა ამბობს, რომ ახალი კორპუსის აშენების შემთხვევაში დაუცველი იქნება უსაფრთხოების ნორმები, რადგან სახანძროსა და სასწრაფოს მათ კორპუსამდე მისვლა გაუჭირდება.
გარდა ამისა, კორპუსის აშენების შემთხვევაში, სკვერი, რომელიც ისედაც პატარაა, მაგრამ მიმდებარე 5-6 კორპუსის ბავშვებსა და მაცხოვრებლებს იტევს, ახალი კორპუსის მაცხოვრებლებიც შეემატება და კიდევ უფრო პატარა სივრცე გახდება ბავშვებისთვის. ისინი ითხოვენ მოხდეს მშენებლობის შეწყვეტა და გაკეთდეს სკვერი.
ამავე თემაზე:
„ვითხოვთ სივრცის დაბრუნებას“_ რა ხდება ვარკეთილში „ანას ბაღთან“
