“მოეწყობა ავტომანქანების პარკირების ადგილები და განთავსდება ავტობუსის გაჩერება. ყველაფერი გაკეთდება მგზავრთა უსაფრთხო და კომფორტული გადაადგილებისა და ქალაქის ცენტრალური ნაწილის მოწესრიგებისთვის”, _ ეს განცხადება ლანჩხუთის მერმა ალექსანდრე სარიშვილმა რამდენიმე დღის წინ ქალაქის ცენტრში მიმდინარე ინფრასტრუქტურული სამუშაოების მონახულებისას გააკეთა და მოადგილესთან ერთად ფაქტის ამსახველი ფოტოებიც გადაიღო.
მერის თქმით, აღნიშნული პროექტის განხორციელება, რომლის ღირებულებაც 184 ათას ლარს შეადგენს, მუნიციპალიტეტისთვის მნიშვნელოვანია.
მერიის გვერდზე გამოქვეყნებულ ამ ინფორმაციას კი არაერთი რიგითი ლანჩხუთელი გამოეხმაურა.
ზოგი უფასებს ადგილობრივ ხელისუფლების გარჯას და გულმხურვალე მადლობასაც არ იშურებს:
“როგორ ლამაზად გამოიყურება ახლა ცენტრი.
როგორ ლამაზდება გურია. მადლობა ქალაქის მერს ალექსანდრე სარიშვილს, საკრებულოს თავმჯდომარეს ბესიკ ტაბიძეს!”
მოქალაქეთა მეორე ნაწილი კი კრიტიკულია და მუნიციპალიტეტის ხელმძღვანელ პირთა საყურადღებოდ ამბობენ, რომ ქალაქის კეთილმოწყობა მხოლოდ მისი ცენტრალური ნაწილით არ უნდა შემოიფარგლებოდეს და შედარებით პერიფერიულ ზონებსაც უნდა მიექცეს ყურადღება. განსაკუთრებით რკინიგზის სადგურის მიმდებარე ტერიტორიის მოწესრიგებას ითხოვს. მოსახლეობის აზრით, ამ ადგილს არანაირი ცივილიზაციის ნიშანწყალი არ ეტყობა.
“ლანჩხუთი მარტო ცენტრი არაა… სადგურის მოედანს როდის მიხედავთ?
ყველაფერს ცენტრში რომ ჩუჩქავთ, გაფართოვდით ცოტა, რკინიგზის იქეთ ლანჩხუთი არაა? ერთ დროს იქეთ იყო ცხოვრება, ნაომარს რომ გავს ყველაფერი, იქეთაც მიხედეთ, ერთ რადიუსში რომ კეთდება ყველაფერი.
რკინიგზის გადაღმა ლანჩხუთს არ ეკუთვნის? რა ვიცი, ცაბაძის ქუჩა კია. 6 წელია გეხვეწებით და უყურადღებოდ გვტოვებთ… რა ქვია ამას? აქ ხალხი არ ვცხოვრობთ?
კარგია, რასაც აკეთებთ, მაგრამ საფო მგელაძის ქუჩას რატომ არ აკეთებთ? გარშემო ყველა ქუჩა მოასფალტებულია და ეგ პატარა ქუჩა რა გახდა, რომ ვერ შეძელით? რამდენჯერ გთხოვეთ. სასაფლაოსკენ მიმავალი გზა მოწესრიგებული არ უნდა იყოს? რა გასაჭირია ასეთი?”
ადგილობრივი ხელისუფლებისგან აგარაკის უბანში, კუპრეიშვილის #12-ში მდებარე მრავალბინიანი სახლის მცხოვრებლებიც ითხოვენ ყურადღებას.
“მოგვხედეთ! აგარაკის, კუპრეიშვილის 12 კორპუსის მდგომარეობა იცით კარგად და მოგვაქციეთ ყურადღება! ასეთ უყურადღებობამ როდემდე უნდა გასტანოს?! მერე შეშფოთება გვიანი იქნება…”
ცნობისთვის, აქაური მოსახლეობა წლებია პრობლემის თაობაზე ხმამაღლა საუბრობს და პრობლემის აღმოსაფხვრელად ხელისუფალთ რეაგირებისკენ მოუწოდებს.
“გურია ნიუსი”, მოსახლეობის თხოვნით, ჯერ კიდევ 2015 წელს წერდა კუპრეიშვილის ქუჩაზე მდებარე #12 კორპუსის საძირკველში არსებულ რთულ ვითარებაზე.
“მიუხედავად ბევრი შეწუხებისა და გამგებელთან შეხვედრისა, ისევ ისეა ყველაფერი. მხოლოდ დაპირებები, მეტი არაფერი. მოვლენ, გადაიღებენ ფოტოებს და წავლენ. თურმე, გეოლოგები ყოფილან მოსაყვანი. ეს ჩვენც ვიცით, დროზე უნდა აქაურობას შველას, სანამ კორპუსი თავზე არ ჩამოგვენგრა.
თავიდან, ჩვენს სახლს ბინა არ ჯობდა, თუმცა, ახლა რა დღეში ვართ, კი ხედავთ. შეცდომა თავშივე იქნა დაშვებული მშენებლების მიერ. იმდენი აუთვისებელი ტერიტორია იყო მაშინ ლანჩხუთში და გაუგებარია, რატომ ააშენეს აქ სახლი, პირდაპირ “საცივის ფეხზე”? სარდაფი სულ წყლითაა სავსე, ზამთარ-ზაფხულ წყალი დგას საძირკველში”, _ ამბობდნენ მაშინ ადგილობრივები, რომელთა პრობლემა, როგორც ირკვევა, კვლავაც მოუგვარებელია.
ლანჩხუთის მერისგან ინფრასტრუქტურული პრობლემების მოგვარებას სოფლის მოსახლეობაც ითხოვს და ურჩევენ, რომ “მშენებარე ან დასრულებულ სამუშაოს დათვალიერების ნაცვლად, მოინახულონ დანგრეული გზები და ინფრასტრუქტურა”.
“ახალსოფელში გადათხარეს ყველაფერი, ბეტონს დაგიგებთო. ხალხს მოაჩვენეს თავი, ხმები გაინაღდეს და იმხელა “იამებია” საქონელი ვარდება შიგ, ადამიანებსა და ტრანსპორტზე ხომ ზედმეტია. იქებს თავს, თურმე ლანჩხუთის ცენტრი მოაწყო;
ლესა რამ შეგაძულათ, რკინიგზის გადაღმა კუთხე, ბატონო ალექსანდრე?! ლომაძე რომ არ ვარ, მაგით არ გვაქცევ ყურადღებას? სოციალური არ მეკუთვნის მარტოხელობის, კაი, გზას მაინც მიხედე, თხოვნაც არ გესმით…
კარგია რაც კეთდება, მისასალმებელია, იქნებ გვიმბალაურში, ხოფერიას ქუჩასაც მიაქციოთ ყურადღება”, _ წერენ მერიის ფეისბუქის გვერდზე პრობლემით შეწუხებული მოქალაქეები.
ავტორი
