მაგდას ახლა გამოცდები აქვს და უმეტეს დროს ბარსელონას უნივერსიტეტის ბიბლიოთეკაში ატარებს. ის აღფრთოვანებულია უნივერსიტეტის სასწავლო სივრცეების, მათ შორის, ბიბლიოთეკის კომფორტულობით, სტუდენტის საჭიროებების. მაგდა მამალაძე, რომელმაც ჩოხატაურის ნიკო მარის სახელობის საჯარო სკოლა, მერე კი თბილისის ჯავახიშვილის სახელობის სახელმწიფო უნივერსიტეტი წარჩინებით დაამთავრა, ახლა ბარსელონაში სწავლობს _ Universitat Autònoma de Barcelona (ბარსელონა, ესპანეთი) სამაგისტრო პროგრამაზე.
მომავალ წელს კი, სწავლას დიდ ბრიტანეთში, გლაზგოს უნივერსიტეტის – The University of Glasgow (გლაზგო, დიდი ბრიტანეთი) მაგისტრატურაში გააგრძელებს.
მაგდას თქმით, ეს უნიკალური შესაძლებლობა, ბევრი შრომის მიუხედავად, მისთვის მხოლოდდამხოლოდ საერთაშორისო ორგანიზაციების მხარდაჭერით გახდა შესაძლებელი _ Erasmus Mundus-ის ერთობლივი სამაგისტრო პროგრამის ფარგლებში – “Education Policies for Global Development” (განათლების პოლიტიკა გლობალური განვითარებისთვის), მაგდა მამალაძის ორწლიან სწავლას და ცხოვრების ხარჯებს მთლიანად Erasmus Mundus-ის პროგრამა (ევროკავშირის სახსრებით) აფინანსებს.
_ რომ არა ევროკავშირის მიერ დაფინანსება, მე ვერ ვისწავლიდი ევროპაში და ახლა სწავლას ვერ გავაგრძელებდი ევროპის ორ საუკეთესო უნივერსიტეტში. ეს პროექტი სრულად დააფინანსებს ჩემს ცხოვრების და სწავლის ხარჯებს, გავივლი სტაჟირებას ევროპის წამყვან ორგანიზაციებში, მათ შორის, არასამთავრობო, სამთავრობო ორგანიზაციებში. ეს კიდევ უფრო მარტივს გახდის ჩემს დასაქმებას. სწორედ ამაში უწყობს ევროკავშირი ხელს ადამიანს _ ის უნარები შეიძინოს, რაც შემდეგ დასაქმებაში დაეხმარება და წარმატებული იქნება მის სფეროში, _ ამბობს მაგდა.
მისმა თანატოლებმა იციან, რომ ეს ძალიან დიდი გამარჯვება და წარმატება მაგდას ბევრი შრომის, განვითარებისკენ სწრაფვის შედეგია. სწავლით, ნიჭით, თავმდაბლობით გამორჩეულ ახალგაზრდას, სწავლის პერიოდში, უამრავი ადგილობრივ, საქვეყნო, საერთაშორისო პროგრამებში მოპოვებული გამარჯვება ჰქონდა, და ყველაფერი – დამსახურებულად. მაგალითად, ინგლისური ენის ოლიმპიადაში ქვეყნის მასშტაბით, საუკეთესო შედეგის ჯილდოდ, დიდ ბრიტანეთში გაემგზავრა საზაფხულო სკოლაში.
ფსიქოლოგიის ფაკულტეტზე სწავლისას, Erasmus+ პროგრამის ფარგლებში, მაგდამ რთულ კონკურსში გაიმარჯვა და სახელგანთქმულ ლიმერიკის (ირლანდია, დიდი ბრიტანეთი) უნივერსიტეტში, პროგრამის სტიპენდიით გააგრძელა სწავლა.
უნივერსიტეტის წარჩინებით დასრულების შემდეგ, მაგდამ საგანმანათლებლო სფეროში გააგრძელა მუშაობა და ამ სფეროშიც ღირსეულად წარადგენდა საქართველოს ადგილობრივ თუ საერთაშორისო კონფერენციებზე, შეხვედრებზე. ახლა კი, მაგდა მამალაძე მაგისტრის ხარისხს ევროპის ორ, წამყვან უნივერსიტეტში დაიცავს ევროკავშირის სრული დაფინანსებით, თანაც ქვეყისთვის სასიცოცხლოდ მნიშვნელოვანი _ განათლების პოლიტიკის მიმართულებით.
“გურია ნიუსის“ კითხვაზე, რატომ არის მნიშვნელოვანი ქართველმა ახალგაზრდებმა ევროპული განათლება მიიღონ, – მაგდა მამალაძე გვპასუხობს:
„ჩემთვის ევროკავშირთან დაახლოება, პირველ რიგში, ხარისხიანი განათლების მიღების, პიროვნული და კარიერული განვითარების შესაძლებლობაა. ბავშვობიდან ვიღებდი ევროკავშირის მიერ დაფინანსებულ პროექტებში მონაწილეობას. ეს იყო მოკლევადიანი და გრძელვადიანი პროექტები საქართველოში და ასევე, საქართველოს ფარგლებს გარეთ. ლიმერიკის უნივერსიტეტში სწავლისას, ჩემი თვალით ვნახე, თუ რას ნიშნავდა ევროპული განათლება. ევროპული განათლება გაძლევს საშუალებას შენი თავი მაქსიმალურად გამოავლინო: აქ არის სტუდენტური სივრცეები, ინფრასტრუქტურა, ბიბლიოთეკები, გარემო, სტუდენტური სერვისები… ყველა ახალგაზრდას და არა მარტო ახალგაზრდას, მთელი ცხოვრების მანძილზე აძლევს შესაძლებლობას თავი გამოავლინოს მაქსიმალურად და იცხოვრონ ღირსეულად.
ირლანდიაში რომ ვსწავლობდი, თანაკურსელები მსოფლიოს სხვადასხვა ქალაქიდან, ერთმანეთისგან განსხვავებულები იყვნენ, თავიანთი კულტურით და ისტორიით ამაყობდნენ. ევროკავშირში გაერთიანება არ უქმნის ეროვნულ ფასეულობებს საფრთხეს, ევროკავშირში ზუსტად არის მრავალფეროვნება და ერთმანეთის მიმართ პატივისცემა. ჩემთვის ევროკავშირი და ევროპის ქალაქებში სწავლა და მუშაობა იმის მაგალითია, რომ ყველა პატივს ცემს ერთმანეთს, სხვის ტრადიციას და ღირებულებას. მჯერა, რომ ჩვენ შეგვიძლია, ევროპულ ოჯახში უფრო ამაყები და ძლიერები ვიყოთ ჩვენი ისტორიით და თვითმყოფადობით“, _ ამბობს მაგდა.
“გურია ნიუსმა” მიიღო დაფინანსება ამერიკის შეერთებული შტატების საერთაშორისო განვითარების სააგენტოსგან (USAID).
“გურია ნიუსი” ინარჩუნებს სრულ სარედაქციო დამოუკიდებლობას. “გურია ნიუსის” მიერ გამოქვეყნებული მასალა არ ასახავს USAID-ის ან ამერიკის შეერთებული შტატების მთავრობის პოზიციას
