საჯარო მოხელეთა კონკურსისა და ატესტაციის ჩატარების უზრუნველსაყოფად ოზურგეთის მუნიციპალიტეტის საკრებულოს აპარატსა და გამგეობაში უნდა შეიქმნას საჯარო მოხელეთა საკონკურსო-საატესტაციო კომისია, რომლის თავმჯდომარე ოზურგეთის მუნიციპალიტეტის საკრებულოს თავმჯდომარე ალეკო მამეშვილი იქნება. კომისიის შემადგენლობაში კი შედიან კომისიის თავმჯდომარე, მისი მოადგილე და წევრები.
ოზურგეთის მუნიციპალიტეტის საკრებულოს საზოგადოებასთან და პრესასთან ურთიერთობის სამსახურში გვითხრეს, რომ ალეკო მამეშვილის კანდიდატურა კომისიის თავმჯდომარის პოსტზე ბიუროს სხდომაზე დასახელდა და 22 მაისს, საკრებულოს სხდომაზე გახდება ცნობილი დაუჭერენ თუ არა დეპუტატები მის კანდიდატურას მხარს.
საჯარო სამსახურის შესახებ საქართველოს კანონის 30-ე მუხლის მე-2 პუნქტით გათვალისწინებული მოთხოვნის შესაბამისად, 2013 წლის 1 ივლისიდან 3 თვის განმავლობაში, ყველა საჯარო მოხელე ვალდებულია, გაიაროს კონკურსი-ატესტაცია, კანონით განსაზღვრული წესით.
ამასთან დაკავშირებით თავის მოსაზრებას აფიქსირებენ ოზურგეთის მუნიციპალიტეტის საკრებულოს წევრი, პარტია “თავისუფალი დემოკრატების” ოზურგეთის რაიონული ორგანიზაციის თავმჯდომარე დიმიტრი კვერღელიძე და საკრებულოს წევრი ლელა ნაცვალაძე.
დიმიტრი კვერღელიძე: _ ძალიან კარგია, რომ საერთოდ კონკურსი ტარდება. ეს არის ჩვენი დამსახურება, რადგან პირველივე დღიდან მოვითხოვთ, რატომ არ კეთდებოდა ეს დღემდე. ძალიან მიკვირს, სამი წლის განმავლობაში ეს რატომ არ გაკეთდა. საკრებულოს თავმჯდომარეს, რომელსაც სამი წლის განმავლობაში, დღეს გაახსენდა, რომ კონკურსის ჩატარება აუცილებელია, აქამდე რატომ არ ჩაატარა? მაგრამ ახლა უნდა, რომ “ოცნებას” მოაწონოს თავი, მაგრამ არის თავიდან ბოლომდე “ნაციონალი” და “დაძვრება” ვანო მერაბიშვილთან ყველა შეხვედრაზე. ასე რომ, კომისიის თავმჯდომარეობაზე ჩვენ ვერანაირად ვერ დავუჭერთ მხარს მამეშვილს, იმიტომ, რომ ამ ადამიანის კომისიის თავმჯდომარეობის შემთხვევაში, არ იქნება ეს კომისია ობიექტური და იქნება მიკერძოებული, ეს ადამიანი არის პარტიული პიროვნება.
ყოველთვის და დღემდე უჭერდა მხარს “ნაციონალურ მოძრაობას” და თუ დღეს გადახედავთ დასაქმებულებს, ყველა არის “ნაციონალური მოძრაობის” მხარდამჭერი. რა გარანტია მაქვს მე ან ჩემს თანამოაზრეებს იმისა, რომ კიდევ ერთხელ არ მოხდება იგივე და ამ საჯარო მოხელეებს კიდევ ერთხელ არ “გაუპრავდებათ” შედეგი? ვითომ კომისიაზე ტესტირებაგავლილები ერქმევათ. ამიტომ, პირველი, რაც აუცილებელია და საჭიროა, ამ კომისიაში, უნდა იყვნენ ჩართულები არასამთავრობო ორგანიზაციები, ექსპერტები, უნდა იყვნენ აუცილებლად მოწვეული დამოუკიდებელი ექსპერტები. ასევე, აუცილებლად უნდა იყოს ეს კომისია საჯარო და მაშინ ექნება ნდობა ამ კომისიას.
ყველა საჯარო მოხელემ, მათ შორის, მოვალეობის შემსრულებლებმაც, აუცილებლად უნდა გაიარონ ტესტირება. როცა კონკურსი ცხადდება, ყველა საჯარო მოხელეს, მოვალეობის შემსრულებელს უწყდება უფლებამოსილება და ყველა ვალდებულია, კონკურსში მიიღოს მონაწილეობა. სწორედ მაშინ დაიმსახურებს ახალი ხელისუფლება ნდობას. “ქართული ოცნება” ამ პროცესს გაუწევს კონტროლს და დავაკვირდებით, რამდენად საჯაროდ და კანონიერად გახორციელდება ყოველივე. არ დავუშვებთ, რომ აქ მოხდეს კიდევ ერთი შერჩევითი სამართალი, ისევ არაპროფესიონალების და პატრონიანების დანიშვნა და “უპატრონოების” გვერდზე გაწევა.
თუ კონკურსის თემა მამეშვილს პიარისთვის უნდა, ჩვენ მას ამის საშუალებას არ მივცემთ, “კეკლუცობას” რომ ცდილობს “ოცნების” წინაშე, ამას არ დავუშვებთ. გინდათ, გითხრათ, რატომ აკეთებს მამეშვილი მაგას? იმიტომ, რომ გამგებელი არ დაუპირისპირდეს. თუ ის გამგებელს მოეფერება, ფიქრობს, რომ სკამი შეუნარჩუნდება. მე მოვუწოდებ გამგებელს, რომ არ გახდეს ალეკო მამეშვილის თანამოაზრე ამ პროცესებში.
ლელა ნაცვალაძე: _ 2010 წელს განცხრომაში მყოფმა “ნაციონალურმა მოძრაობამ” მსგავსი კონკურსის ჩატარება მოინდომა, შეიქმნა კომისიაც, შეადგინეს ტესტებიც, მაგრამ “ვიღაცამ” ურჩია, რომ არ უნდა ჩაეტარებინათ, რადგან მომავალი არჩევნებისთვის ამომრჩევლებს კარგავდნენ. მთელ საქართველოში ოზურგეთი არის ერთ-ერთი “მოწინავე” მუნიციპალიტეტი, სადაც თანამდებობებზე მოვალეობის შემსრულებლად ინიშნებიან. ეს არის უკანონობა. ახალ ხელისუფლებას ცუდი მემკვიდრეობა ერგო _ წინა ხელისუფლებამ ხმების მოპოვებისთვის დაასაქმა უამრავი ადამიანი, შესაბამისად, გაზრდილია ბიუჯეტის ხარჯი, ეს არის კატასტროფა! ჩვენ ვიცით უამრავი ჩინოვნიკი, რომლებიც მხოლოდ იმიტომ დაინიშნენ, რომ არჩევნებში ხმები მოეპოვებინათ. თუმცა, ადამიანების სახლში გაშვება ძალზედ მტკივნეული პროცესია, მაგრამ წესი _ წესია და სამართლიანობის აღდგენისათვის ეს აუცილებელია. პირველი, რაც ჩემთვის არის მიუღებელი და დაუშვებელი, ეს არის საკრებულოს თავმჯდომარე იყოს კომისიის თავმჯდომარე. ალეკო მამეშვილი არის პირი, რომელიც არჩეულია 4 წლის ვადით და მე მას არ ვცნობ საკრებულოს თავმჯდომარედ. მე ვაცხადებ, რომ მას არ აქვს მორალური უფლება, ხელმძღვანელობდეს ამ კომისიას. ის, რომ ოზურგეთში გადატვირთულია საშტატო განრიგი, ბიუჯეტის ნახევარზე მეტი ხელფასებსა და პრემიებში მიდის და ალეკოს უზრუნველ ცხოვრებას ხმარდება, სწორედ მამეშვილის დამსახურებაა. მუნიციპალიტეტის საკრებულოსა და გამგეობაში იმდენი თანამშრომელია, კაბინეტებში ვერ ეტევიან. მართალია, მე არც ერთ მათგანის მიმართ პიროვნულად ცუდად არ ვარ განწყობილი, მაგრამ ვიტყვი, რომ ისინი არიან წინა ხელისუფლების მსხვერპლი, რომელიც გამოიყენეს არჩევნებში ხმების შესაგროვებლად.
