ამ ინფორმაციას, დღეს გამართულ ბრიფინგზე საქართველოს პრეზიდენტი გამოეხმაურა და აღნიშნა, რომ ამ ფაქტით, “შეუძლებელია, მთელი დემოკრატიული სამყაროს დასაცინი არ გავხდეთ, მითუმეტეს, რომ მათი დასაცავები ვართ”.
_ ასე დაემთხვა, როდესაც იაროსლავ კაჩინსკი იმყოფება საქართველოში, დილით ვნახე, რომ მთავრობამ მიიღო გადაწყვეტილება, და ახლა ხელთ მაქვს კულტურის სამინისტროს ოქმი ქალაქ გორში იოსებ სტალინის ძეგლის აღდგენის შესახებ. ჩვენ კარგად უნდა გვახსოვდეს, როგორი იყო იოსებ სტალინი საქართველოსთვის. 1921 წელს, როდესაც სისხლისმსმელი ვლადიმერ ლენინიც კი წინააღმდეგი იყო საქართველოს დაპყრობის, იოსებ სტალინის დაჟინებული გადაწყვეტილებით საქართველოში შემოვიდა მე-11 არმია და წერტილი დაუსვა საქართველოს დამოუკიდებლობას. იოსებ სტალინმა საქართველოს ჩამოაჭრა ტერიტორიები – საუკეთესო ქართული მიწები, ქართული მოსახლეობით და გადასცა ის სხვა საბჭოთა რესპუბლიკებს. იოსებ სტალინმა ხელოვნურად შექმნა ე.წ სამხრეთ ოსეთისა და აფხაზეთის ავტონომიები – ის ნაღმები, რომლებიც დამოუკიდებლობის მოპოვებასთან ერთად აგვიფეთქდა.
იოსებ სტალინმა დახვრიტა პოლონელ ოფიცრებთან ერთად კატინში ქართველი ოფიცრები, რომლებიც იბრძოდნენ ჯერ საქართველოს დამოუკიდებლობისთვის, შემდეგ კომუნიზმისა და ფაშიზმის წინააღმდეგ პოლონეთში. სწორედ სტალინის ხელმოწრით დახვრიტეს ქართველები და პოლონელები კატინში!
სტალინის ბრძანებით განადგურდა საქართველოს ინტელიგენციის საუკეთესო ნაწილი! იოსებ სტალინმა ჩაიდინდა წარმოუდგენელი დანაშაულები ქართველი ხალხის წინააღმდეგ… 21-ე საუკუნეში სტალინის ძეგლის აღდგენა – ეს არის წარმოუდგენელად ბარბაროსული და ანტიქართული აქტი, ანტისახელმწიფოებრი, ანტიეროვნული ქმედება, რომელიც აქცევს საქართველოს საერთაშორისო იზოლაციაში. შეუძლებელია, მთელი დემოკრატიული სამყაროს დასაცინი არ გავხდეთ, მითუმეტეს, რომ მათი დასაცავები ვართ.
სტალინის ძეგლის აღდგენა გორში, იმ ადგილას, რომელიც იბომბებოდა რუსების მიერ, არის იქ დაღუპული ქართველების, საკუთარი სახლებიდან გამოყრილი ადამიანების სულში ჩაფურთხება.
თუკი საქართველოში ვინმეს უნდა დაიჯეროს ბავშვური თამაში იმასთან დაკავშირებით, რომ, თითქოს, ის არ იღებს ამ გადაწყვეტილებებს, მისი პრობლემაა. პირადად მე ძალიან კარგად ვიცი, ვინ იღებს გადაწყვეტილებას ამ მთავრობაში.
მინდა მოვუწოდო საქართველოს პრემიერ-მინისტრს: გადახედოს ივანიშვილმა ამ ბრიყვულ გადაწყვეტილებას! ეს არ არის ის, რაც წაადგება საქართველოს საქმეს! _ განაცხადა მიხეილ სააკაშვილმა.
პრეზიდენტის ამ განცხადებას უკვე გამოეხმაურნენ პოლიტიკოსები და საზოგადოებისთვის ცნობილი სახეები. სამართალმცოდნე ლევან ალაფიშვილი,”გურია ნიუსთან” საუბრისას აღნიშნავს, რომ ადამიანი, რომელსაც სტალინის მუზეუმის შექმნის აქტზე აქვს ხელი მოწერილი (თანაც 2005 წელს) დღეს მისი ძეგლის გახსნის შესაძლებლობაზე ამდენს, ასე ომახიანად და პათეტიკით რომ საუბრობს ცოტა უხერხულია.
_ სტალინის სახელმწიფო მუზეუმის შემქმნელი სტალინის ძეგლის გახსნის შესაძლებლობას გმობს?… არა, არა, ვეძებ და ვერ მიპოვია პოლიტიკაში მორალი. ეგებ ტყუილად ვეძებ… ვისმენ სტალინთან და სტალინის ძეგლთან დაკავშირებულ რიტორიკას, უფრო სწორად პოლიტიკურ სპეკულაციას და მხოლოდ ღიმილის ამარა ვრჩები. ძნელია მოიძებნოს ჭკუათმყოფელი ადამიანი, რომელიც ძალადობას, რეპრესიებს, ადამიანის უფლებების ნიველირებას თუ ტოტალიტარიზმს გაამართლებს, მოიწონებს და არ დაგმობს, მათ რიცხვში საკუთარ თავსაც მოვიაზრებ. ამ ყველაფრის შემდგომ ფაქტები რომ საჯაროდ გაცხადებულისგან განსხვავებულ რაიმეს ღაღადებენ, ესაა ცუდი და დასაგმობი. ძალიან რომ არ გამიგრძელდეს, ვიტყვი, რომ საქართველოში არსებობს “ი.ბ. სტალინის სახელმწიფო მუზეუმი”; ეს არ არის კერძო მუზეუმი, იგი საჯარო სამართლის იურიდიული პირია, შექმნილია 2005 წელს და შექმილია საქართველოს პრეზიდენტის #937 ბრძანებულებით. (http://goo.gl/MWFW7F). კულტურის სამინისტროს ოფიციალურ საიტზე, მუზეუმების ჩამონათვალშიც (http://goo.gl/G5Yq1m) გვხვდება “სსიპ სტალინის სახელმწიფო მუზეუმი”. მუზეუმების ასოციაცია გვამცნობს, რომ ჩვენში არსებობს (ვირტუალურ სივრცეშიც) “ი. ბ. სტალინის სახელმწიფო მუზეუმი”(http://goo.gl/jZQXEc) და მისი ვებგვერდია: www.stalinmuseum.ge 21-ე საუკუნეში, ტექნოლოგიებისა და ინფორმაციის გავრცელების საუკუნეში სანამ რაიმეს იტყვი, უნდა დაფიქრდე, რომ მისი გადამოწმება პრობლემას არ წარმოადგენს, შესაძლოა უხერხულობაში აღმოჩნდე. არც საქართველოს და არც პოლონეთის მოსახლეობისათვის დიდ სირთულეს არ წარმოადგენს სტალინთან დაკავშირებული პოლიტიკური სპეკულაციის შემოწმება. ადამიანი, რომელსაც სტალინის მუზეუმის შექმნის აქტზე აქვს ხელი მოწერილი (თანაც 2005 წელს) დღეს მისი ძეგლის გახსნის შესაძლებლობაზე ამდენს, ასე ომახიანად და პათეტიკით რომ საუბრობს, ცოტა უხერხულია!
