და აფრიკის ღარიბი ქვეყნების ჯგუფში აღმოჩნდა. ასეთი მდგომარეობა საგანგაშო უნდა იყოს ქვეყნისთვის, რომელსაც 10-12 მილიონი ადამიანის გამოკვების ბიორესურსი გააჩნია.
გურიის მოსახლეობის სურსათით უზრუნველყოფის ანალიზიდან გამომდინარე, ბოლო წლებში ჩატარებულმა გამოკვლევებმა დაგვანახა, რომ გურიის მხარის მოსახლეობის ფულადი შემოსავლები და ტემპი რეგიონებს შორის ყველაზე დაბალია. ოზურგეთის მუნიციპალიტეტში სასოფლო-სამეურნეო პროდუქტების ადგილობრივი წარმოების დონე მნიშვნელოვნად ჩამორჩება სასურველს და ამის მიზეზები არა ბუნებაში, არამედ ეკონომიკასა და პოლიტიკაში უნდა ვეძებოთ. სასურსათო რესურსების გამოყენებისთვის დიდ რეზერვს წარმოადგენს რამდენიმე ათას ჰექტარზე მეტი დაუმუშავებელი და ეწერი მიწები, გამოუყენებელია მინერალური წყლების რესურსები, თერმული წყლების, ქარისა და მზის რესურსების უდიდესი მარაგი. გამოიკვეთა ალტერნატიული კულტურების გაშენების ტენდენცია ეკოლოგიური სიტუაციის გათვალისწინების გარეშე, რამაც შეიძლება, ხელი შეუწყოს ნიადაგების ნაყოფიერების მკვეთრ დაცემას ეროზიული და მეწყერული პროცესების ინტენსიური განვითარების გამო. ამ საკითხების მართვა და გახორციელება უნდა ეფუძნებოდეს სამეცნიერო ტექნიკური პროგრესის შედეგებს. ლიდერის ფუნქცია კი უნდა ეკისრებოდეს სოფლის მეურნეობის ახლად შექმნილ სამსახურს, რაც სიახლეა, მაგრამ წარმოშობს პრობლემასაც, რაც დაუყოვნებლივ უნდა გადაიჭრას. კერძოდ, აღნიშნულ სამსახურში უნდა შეიქმნას აგროსამრეწველო სექტორში ეკონომიკური პროცესების მართვისა და რეგულირების მუდმივმოქმედი კომისია, სადაც მიწვეული იქნებიან ექსპერტები, საზოგადოების აქტიური ნაწილი. კომისიის მხარდაჭერა უნდა განახორციელოს სოფლის მეურნეობის სამინისტროსთან შექმნილმა მუდმივმოქმედმა საბჭომ.
კომისია მოამზადებს მუნიციპალიტეტის სოფლის მეურნეობის განვითარების კონცეფციას. მუნიციპალიტეტის სასურსათო სექტორის განვითარების უახლოესი პერიოდის პრიორიტეტად უნდა მიიჩნეოდეს ადგილობრივი სურსათით მოსახლეობის მოთხოვნის უზრუნველყოფის დონის მნიშვნელოვანი ამაღლება, ხოლო გრძელვადიან პერსპექტივაში, ტრადიციული და ახალი საექსპორტო პროდუქციის წარმოების ხელშეწყობა. სოფლად საფინანსო პოლიტიკის ამოცანას წარმოადგენს ეფექტური საკრედიტო სისტემის ჩამოყალიბება. საინფორმაციო-საკონსულტაციო სამსახურების ბაზაზე უნდა შეიქმნას სესხის საგარანტიო ფონდი, სადაც ფინანსები მოიზიდება, როგორც ბიუჯეტიდან, ისე დონორი და კომერციული ორგანიზაციებიდან. სესხის საგარანტიო ფონდი განსაზღვრავს კონკრეტულ შემთხვევაში თითოეული ოჯახისთვის საჭირო სესხის საჭირო რაოდენობას და პასუხისმგებლობას იღებს მისი სწორად განსაზღვრის და დროულად დაბრუნების თაობაზე. კომისია ასევე მოამზადებს წინადადებებს ეკოლოგიურად უსაფრთხო ზონების შექმნის შესახებ. ძირითადად კი, ამ კომისიამ ცენტრალური ხელისუფლების მხარდაჭერით ყველაფერი უნდა გააკეთოს, რათა მუნიციპალიტეტში ხელი შეეწყოს საინვესტიციო გარემოს შექმნის აუცილებლობას. უნდა მოხდეს მიწის პატარა ნაკვეთების გამსხვილება, რადგან მიწის პრივატიზაციის შედეგად დაქუცმაცებულ ნაკვეთებზე გართულებულია თანამედროვე ტექნოლოგიებისა და ტექნიკის ეფექტიანად გამოყენება. მოწინავე ქვეყნების გამოცდილებათა საფუძველზე მიზანშეწონილია, ასეთი მიწების ბაზებზე ფორმირებული იქნეს კოოპერატიული და სააქციო საზოგადოებები. კომისიისავე გადაწყვეტილებით და სოფლის მეურნეობის სამინისტროსთან შეთანხმებით, რეკომენდაცია უნდა მიეცეს აგროსამრეწველო სექტორში იმ პროდუქტების წარმოების ხელშეწყობას, რომელიც ყველაზე მომგებიანია, როგორც წმიდა ეკონომიკურ, ასევე სოციალურ-პოლიტიკური თვალსაზრისით. თითოეულ ფერმერს უნდა მიეწოდოს ინფორმაცია და მიეცეს კვალიფიცირების საშუალება ანუ კომისიის რეკომენდაციები ორიენტირებული უნდა იყოს წარმოების მოთხოვნაზე. განსაკუთრებული ყურადღება უნდა დაეთმოს სოფლის მეურნეობის სამინისტროს ხელშეწყობით საგარეო ბაზრებზე პოზიციების აღდგენას, ახალი ბაზრების ათვისებას. კომისია ასევე შეეცდება, მხარი დაუჭიროს საზოგადოების იმ ჯგუფებს და ცალკეულ პირებს, რომლებიც თავიანთი აქტიური ჩართვით ხელს შეუწყობენ სოციალურ-ეკონომიკური რეფორმების გახორციელებას. სოფლის მეურნეობის ახალი სამსახურის თანამშრომლები აქტიურად უნდა მონაწილეობდნენ მუნიციპალიტეტის სოფლებში ინფრასტრუქტურის გაფართოებისა და გაუმჯობესებისთვის პრიორიტეტების განსაზღვრაში, რათა ინფრასტრუქტურის განვითარების სამომავლო ინიციატივები აუცილებლად ეხმიანებოდეს აგროსამრეწველო სექტორის განვითარების საჭიროებებს, ანუ გათვალისწინებული უნდა იქნეს აგრარული, სოციალური და ყოფითი პრობლემების კომპლექსურად გადაჭრა.
გურამ იობიშვილი, საქართველოს საინჟინრო აკადემიის მრჩეველი
