ამას შედეგად მოყვა ის, რომ “ნაციონალური მოძრაობის” 2012 წლის დარღვევები სულ ახლახანს “აღმოაჩინეს”. ახლა გაახსენდათ, რომ შსს-ს შემოწმებაც შეიძლებოდა და მისი ცენტრალური აპარატისაც. პირველად, ამ 9 წლის განმავლობაში, კონტროლის პალატამ ვანო მერაბიშვილის სახელი ახსენა და როგორც მათ მიერ გავრცელებულ პრესრელიზში ვკითხულობთ: “აღნიშნული ფაქტების გათვალისწინებით, შინაგან საქმეთა სამინისტროს მიერ არაეკონომიურად გახარჯულია 1,660,800 ლარი. სახელმწიფო აუდიტის სამსახური აუდიტის მასალებს შემდგომი მოკვლევისათვის გადაუგზავნის სამართალდამცავ ორგანოებს”.
საინტერესოა, რა ბედი ეწევა იმ დარღვევებს, რომელიც ლევან ბეჟაშვილის და აუდიტის სამსახურის ამჟამინდელი ხელმძღვანელის თავად ლაშა თორდიას პერიოდში ხდებოდა და რის შესახებაც საპარლამენტო კომისიამ საკმაოდ კრიტიკული დასკვნა დადო? დარჩება ეს დასკვნა ფიქტიურ დოკუმენტად თუ მოყვება შესაბამისი რეაგირება? ამის გარკვევა საფინანსო-საბიუჯეტო კომიტეტის თავმჯდომარესთან, დავით ონოფრიშვილთან გადავწყვიტეთ.
“სამსახური, რომელიც სამაგალითო უნდა იყოს ქვეყანაში თავისი გამჭვირვალობით, კანონის და დაკისრებული ვალდებულების ზედმიწევნით აღსრულებით და პროფესიონალიზმით, ფაქტობრივად, მთელი წლის განმავლობაში გადასული იყო ოპოზიციის პოლიტიკურ დევნაზე. საქმისთვის, როგორ ჩანს, ნაკლებად ეცალათ, რადგანაც მთელი ამ პერიოდში უბრალოდ 57 დასკვნა არის გაკეთებული მხოლოდ და მხოლოდ, როცა წინა წლებში, მაგალითად 2011 წელს, 100-ზე მეტი იყო, უფრო ადრე _ კიდევ უფრო მეტი.
წლებია არ შემოწმებულა ისეთი მნიშვნელოვანი ხარჯვითი ერთეულები, როგორიცაა თავდაცვის სამინისტრო, რეგიონული განვითარებისა და ინფრასტრუქტურის სამინისტრო, კულტურის სამინისტრო, უშიშროების საბჭო, რამდენიმე წელია არ შემოწმებულა საქართველოს პრეზიდენტის ადმინისტრაცია, უზენაესი სასამართლო, იუსტიციის სამინისტრო, სოფლის მეურნეობის სამინისტრო…
ეს არის ის პოლიტიკა, რაც ტარდებოდა ბოლო პერიოდში მიხეილ სააკაშვილის და “ნაციონალური მოძრაობის” ხელმძღვანელობით. ქართველ ხალხს, საზოგადოებას არ უნდა ცოდნოდა, რაში და როგორ იხარჯება ის ფული, რომელიც ბიუჯეტით იყო გათვალისწინებული.
თავად, 50 და 100 ლარის გამო ხშირად არასრულწლოვანებსაც იჭერდნენ და ციხეში წლობით სვამდნენ, ნულოვანი ტოლერანტობის პრინციპი შემოიღეს და დღეს უკვირთ, როცა აკავებენ ადამიანებს, რომლებსაც ასობით-ათასობით ლარი აქვთ არამიზნობრივად დახარჯული და ამას პოლიტიკურ დევნად აფასებენ. ეს სწორედ იმ განუკითხაობის შედეგია და ბევრი ადამიანი ჩაითრიეს.
დღეს, ახალ ხელისუფლებას უკვე სხვა გზა არ აქვს, როცა ხედავს, რომ სერიოზული დანაშაულია ამაზე რეაგირება არ მისცეს.” _ აცხადებს დავით ონოფრიშვილი “გურია ნიუსთან”.
_ როგორ უნდა გამოსწორდეს მდგომარეობა და რა რეაგირება მოყვება იმ ფაქტებს, რაც უკვე მოხდა? მაგალითად, იმ დროს, როცა ქვეყანაში სადაც ასეთი საშინელი უმუშევრობა იყო, კონტროლის პალატაში 400-მდე საშტატო ერთეულიდან 150-იდან 200 ადგილი რეზერვში ჰქონდათ და ამას ახლა იმით ხსნიან, რომ კონკურსებს ატარებდნენ და მხოლოდ პროფესიონალებს ტოვებდნენ. თუმცა, ძალიან ბევრი ფაქტი იყო ისეთი, როცა “ნაციონალური მოძრაობის” დროს კონტროლის პალატიდან სწორედ იმიტომ უშვებდნენ ადამიანებს, რომ პროფესიონალები იყვნენ.
_ სწორედ ეს არის ის მოტივაცია და მიზანი, რაც მათ ჰქონდათ ამ წლებში. მათ ასეთ სამსახურში ძირითადად მორჩილი ადამიანები ჭირდებოდათ და არა პროფესიონალები., რიგ შემთხვევებში თვალი უნდა დაეხუჭათ იმ ნაკლოვანებებზე, ხარვეზებზე, შეიძლება დანაშაულებრივ ქმედებებზე, როცა ისინი შემოწმების დროს აწყდებოდნენ სხვადასხვა უწყებაში. როცა იცოდნენ, რომ უწყებაში ძალიან დიდი შეცდომები იყო ან არამიზნობრივი ხარჯები, იქ საერთოდ არ შედიოდნენ. ზემოთ ჩამოვთვალეთ, რომელია ეს უწყებები. ან თუ შედიოდნენ და აღმოაჩენდნენ, დასკვნებს თაროებზე დებდნენ და ჩვენ ვიცით ასეთი დასკვნები, რომლებიც შემოდებული იყო თაროზე, არ იყო საბოლოოდ განხილული. მარტო ბოლო პერიოდი რომ ავიღოთ, იმ 57 დასკვნიდან დაახლოებით 10-15 წინა, ძველი წლების დასკვნებია…
_ მათ შორის არის საერთო სასამართლოების აქტი, რომელიც 2010 წელს დასრულებული იყო და გადამალეს…
_ დიახ, ახლა სწავლობენ და ასეა სხვა მიმართულებით. ეს არის სწორედ ის მიდგომები, რაც მიუღებელია და სწორედ იყო ის დანაშაულებრივი ქმედებები, რაც “ნაციონალური მოძრაობის” პოლიტ ელიტამ სახელმწიფო დონეზე დააკანონა.
_ თქვენ ახსენეთ თაროზე შემოდებული დასკვნები და მათ შორის იყო საერთო სასამართლოების ძალიან გახმაურებული აუდიტი. საერთოდ სასამართლოების დეპარტამენტის თავმჯდომარემ, დიმიტრი გეგელიამ 2 წლის შემდეგ მომწერა პასუხად, რომ ექსპერტიზის ბიუროს ხარჯებთან დაკავშირებით, რომელიც საერთო სასამართლოებს ასევე არამიზნობრივად ჰქონდა გადარიცხული: “მთავარმა პროკურატურამ 2010 წლის 19 ნოემბერს მიიღო დადგენილება და შეწყვიტა წინასწარი გამოძიება სისხლის სამართლის კანონით გათვალისწინებული ქმედების არარსებობის გამო. პროკურატურამ მიიჩნია, რომ ორ საბიუჯეტო ორგანიზაციას შორის არსებული ხარვეზის აღმოფხვრა მიზანშეწონილი იყო უწყებებს შორის ურთიერთშედარების მოხდენით.” რამდენად ნორმალურად მიგაჩნიათ ეს პრაქტიკა, როდესაც პროკურატურა და კონტროლის პალატა და პრივატული საუბრების დონეზე აგვარებენ საქმეებს?
_ რა თქმა უნდა, ეს არ არის ნორმალური მდგომარეობა, პროკურატურასთან შეიძლება ითანამშრომლო რაღაც საკითხებზე, მაგრამ კონტროლის პალატას და პროკურატურას თავიანთი ფუნქციები აქვთ. როცა საკითხი დგას ისე, რომ პროკურატურა უნდა ჩაერთოს საქმეში, აქ უკვე სხვაგვარი მოქმედებებია საჭირო. აუდიტის სამსახური თვითონ გადასცემს ხოლმე ავტომატურ რეჟიმში პროკურატურას მოკვლევის მასალებს, როგორც კი ხედავს, სისხლის სამართლის ან სხვა სახის დანაშაულებრივ ქმედებებს აქვს ადგილი. შემდეგ პროკურატურა იმსჯელებს აღძრას თუ არა ამ საკითხებზე საქმე.
_ თქვენ აცხადებთ, რომ კონტროლის პალატაში არიან პროფესიონალებიც. რაც შეეხება ბიუჯეტის ხარჯვით ნაწილს, წლების განმავლობაში საქართველოს პარლამენტის დროებით კომისიას ხელმძღვანელობდა ბატონი ბეჟან ბუცხრიკიძე, (ახლა გახლავთ კონტროლის პალატის ადგილობრივი თვითმმართველი ერთეულების ბიუჯეტების აუდიტის დეპარტამენტის უფროსი. ავტ)
მას ამ წლების განმავლობაში არცერთხელ დაუფიქსირებია რაიმე ხასიათის ხარვეზი ან დარღვევა კონტროლის პალატის საქმიანობაში. რატომ ვიფიქროთ, რომ ადამიანი, რომელიც ამ ყველაფერს ხედავდა და მაინც ამბობდა, რომ იქ იდეალური სიტუაცია იყო, უნდა მუშაობდეს მხოლოდ იმიტომ, რომ პროფესიონალია?
_ გეთანხმებით, წინა წლებში მართლაც ძალიან რბილად და ყოველგვარი დებატების გარეშე მიდიოდა კონტროლის პალატის ფინანსური შემოწმების პროცესი. მგონი, არავის ახსოვს საერთოდ კონტროლის პალატის ანგარიშის დამტკიცების რამე განსაკუთრებული სიმწვავე და ეს ყველაფერი ჩვეულებრივად მიღებული იყო პარლამენტის “ნაციონალური მოძრაობის” უმრავლესობის მიერ. იღებდნენ ჩვეულებრივად დასკვნებს ანუ ამ ანგარიშს და არანაირი კრიტიკული აზრი არ არსებობდა. ეს იყო პოლიტიკური ნება, დაკვეთა და ამას ასრულებდა “ნაციონალური მოძრაობა”.
მიუხედავად ამისა, ყველას გაშვება და გათავისუფლება მაინც არ არის მიზანშეწონილი. რაც შეეხება ზედა რგოლს, ხელმძღვანელობას, ალბათ კანონით ისაზღვრება რამდენი წლით უნდა იყოს და როგორ. იმის შანსი ჯერ კიდევ აქვთ ზოგიერთ თანამშრომელს, რომ დაანახონ საზოგადოებას და ჩვენ ყველას, რამდენად კეთილსინდისიერად შეუძლიათ მუშაობა.
