შესაძლოა, რუსეთის ინტერესებში იყოს ამ მოლაპარაკებების საერთოდ ჩაშლა, თუკი ამ მოლაპარაკების თემა გადაუწყვეტელი პრობლემები გახდება. თუ რუსეთში ასეთი მოტივაცია არსებობს, ეს აბაშიძეს უკეთ ეცოდინება, მაშინ მისი გადაჭრა რუსეთის უფრო მაღალ ეშელონებში უნდა მოხდეს,” _ ამბობს “გურია ნიუსთან” პოლიტოლოგი რამაზ საყვარელიძე.
შეგახსენებთ, რომ გუშინ ოკუპირებული ერედვის მოსაზღვრე სოფელ დიცთან რუსებმა მავთულხლართების გავლების პროცესი განაახლეს, რასაც ადგილობრივების პროტესტი მოჰყვა და ფიზიკურ და სიტყვიერ დაპირისპირებაშიც გადაიზარდა.
აღნიშნულთან დაკავშირებით, საქართველოს საგარეო უწყებამ ღრმა შეშფოთება გამოხატა და საერთაშორისო თანამეგობრობას საკითხით დაინტერესებისკენ მოუწოდა.
პოლიტოლოგი რამაზ საყვარელიძე მიიჩნევს, რომ “ამ შემთხვევაში საკითხავია, თუ რამდენად ქმედითია საერთაშორისო საზოგადოება რუსეთის მიმართ”.
“აქ პრობლემა ისაა, თუ რამდენად უწევს რუსეთი მას ანგარიშს. ვიცით, რომ საერთაშორისო საზოგადოების პოზიცია რუსეთს ბევრს სხვა საკითხში და განსაკუთრებით ისეთში, სადაც ძალა მის მხარესაა, არ ადარდებს და ამდენად ეფექტურობის მოლოდინი ნაკლებია,” – აღნიშნავს საყვარელიძე და დასძენს, რომ რთულია, ასეთ შემთხვევაში გამოსავლის პოვნა.
ამასთან, ექსპერტი ამ საკითხზე “ნაციონალური მოძრაობის” წარმომადგენელთა განცხადებებსაც ეხმაურება: “რასაც “ნაციონალები” მოუწოდებენ, რომ იარაღს მოვკიდოთ ხელი და ა.შ. დაუშვებელია. სწორედ იარაღმა მიიყვანა საქმე აქამდე,” _ ამბობს პოლიტოლოგი.
შსს-ს წარმოამდგენლების განცხადებით, შესაძლოა, სამინისტრომ ოკუპირებული ტერიტორიის პერიმეტრზე, სოფელ დიცთან პატრულირება გააძლეროს. რამაზ საყვარელიძე მიიჩნევს, რომ თუკი პროცესები ამ მიმართულებით განვითარდა, პროვოკაციის შესაძლებლობის რეალური რისკი უნდა განისაზღვროს.
“ფაქტობრივად, პატრულირება ნიშნავს, რომ პატრულმა მოსახლეობის ინტერესი ფიზიკურად უნდა დაიცვას და ასეთი ფიზიკური დაცვა თავისთავად კონფლიქტის პროვოცირებად შეიძლება გადაიქცეს,” _ უთხრა საყვარელიძემ “გურია ნიუსს”.
