თეა წულუკიანი მიიჩნევს, რომ საქართველოში მოქმედი მოდელი ადამიანის უფლებათა დაცვის ევროპული სასამართლოს პრაქტიკას არ შეესაბამება.
“ნაფიცი მსაჯულების სასამართლო კარგი იყო საერთოდ არ არსებულიყო საქართველოში, მაგრამ ის არსებობს. ჩემი და ამ მთავრობის მიდგომა არის ის, რომ რაც არსებობს, იმის ბრმად ნგრევას არ ვიწყებთ. ნაფიცების იდეა თავისთავად ხელწამოსაკრავი და ავტომატურად ცუდი არ არის , მთავარია როგორ გაკეთდება ის. რა თქმა უნდა, დღეს ნაფიცი მსაჯულების სასამართლოს აქვს ბევრი ხარვეზი, უჭირს ამ ინსტიტუტს და მას დახმარება სჭირდება, მაგრამ ამას ვერ გააკეთებს აღმასრულებელი ხელისუფლება. ეს უნდა გააკეთოს თვითონ მართლმსაჯულების სისტემამ. არ არის გამორიცხული რომ მართლმსაჯულების რეფორმის მომდევნო ტალღა სიღრმისეულად შეეხოს ამ ინსტიტუტსაც.”
ნაფიც მსაჯულთა სასამართლო საქართველოში 2010 წლიდან ამოქმედდა. 2012 წლის 1 ოქტომბრამდე ის მხოლოდ თბილისის საქალაქო სასამართლოში მოქმედებდა და საქართველოს სისხლის სამართლის კოდექსის 109-ე მუხლით (განზრახ მკვლელობა დამამძიმებელ გარემოებაში) გათვალისწინებული დანაშაულის საქმეებს იხილავდა. ახალმა ხელისუფლებამ ნაფიც მსაჯულთა სასამართლოს განსჯადობა გააფართოვა და დღეს მოქმედი კანონმდებლობით ნაფიცები ყოფილი თუ მოქმედი თანამდებობის პირების მაღალი საზოგადოებრივი ინტერესის მქონე სისხლის სამართლის საქმეებსაც განიხილავენ. სხვადასხვა სასამართლოებში ათობით ყოფილი თუ მოქმედი ჩინოვნიკის საქმის განხილვა მიმდინარეობს, თუმცა ნაფიცი მსაჯულების მონაწილეობაზე ყველა მათგანმა უარი თქვა.
2 წლის განმავლობაში ნაფიც მსაჯულთა სასამართლომ 5 სისხლის სამართლის საქმე განიხილა. უკანასკნელი ბიზნესმენ ანტონ ადუაშვილის შეკვეთით მკვლელობა იყო. ნაფიცმა მსაჯულებმა სრულად გამოიყენეს ვერდიქტზე მსჯელობისათვის კანონით მინიჭებული პირველადი 3, შემდგომ 6 და კიდევ 3 საათი, სულ 12 საათი და რადგან მათ ვერ შეძლეს ვერდიქტის მიღება, სასამართლომ მართლმსაჯულების განსახორციელებლად დამატებით გონივრულ ვადად კიდევ 1 საათი დაუმატა. მოსამართლეს რამდენჯერმე მოუხდა მსაჯულებისათვის იმის შეხსენება, რომ მოქალაქეობრივი პოზიციის დაფიქსირება მართებდათ. იმ შემთხვევაში თუ ნაფიცები ვერც დამატებითი ერთი საათის განმავლობაში გამოიტანდნენ ვერდიქტს, მოსამართლე სასამართლოს ამ შემადგენლობას ქმედუუნაროდ ჩათვლიდა და დაითხოვდა. ამასობაში კი ბრალდებულებს წინასწარი პატიმრობის ვადა ეწურებოდათ, რის შემდეგაც ისინი ციხეებს დატოვებდნენ. მსგავსი პრეცედენტების გამოსარიცხად იუსტიციის მინისტრს ნაფიც მსაჯულთა ინსტიტუტის ქართული მოდელის ევროპულ სტანდარტებთან დაახლოება აქვს გადაწყვეტილი, რადგან მის მიერ გამოტანილი ყოველი ვერდიქტი ევროპულ სასამართლოში გაუქმების რისკის წინაშე არ დადგეს.
“ცხადზე ცხადია, რომ ბევრი რამ უნდა შეიცვალოს. დღეს თუნდაც ანტონ ადუაშვილის საქმეზე რომ გასაჩივრდეს ვერდიქტი სტრასბურგის სასამართლოში, რაც არ უნდა კარგი და კანონიერი ვერდიქტი იყოს, შეიძლება პრობლემა დადგეს ევროპულ დონეზე, იმიტომ, რომ თვითონ ინსტიტუტია ევროპული სტანდარტების შეუსაბამო, ვერდიქტი არ საბუთდება და არსებითად ვერ საჩივრდება, ამიტომ აუცილებელია ამის გადახედვა”, _ ამბობს წულუკიანი “გურია ნიუსთან”.
მისივე თქმით, ნაფიც მსაჯულთა სასამართლოს გაუქმება არ იგეგმება.
