ჩოხატაურის სახალხო თეატრში ახალ სპექტაკლზე მუშაობენ _ რეჟისორ გოგი ცინცაძის მიერ ნოდარ დუმბაძის რამდენიმე ნაწარმოების _ “მე ვხედავ მზეს”, “მე, ბებია, ილიკო და ილარიონი”, “დიდრო”, “სისხლი” _ მიხედვით, მზადდება წარმოდგენა. მასვე ეკუთვნის სპექტაკლის მხატვრობა. მუსიკალური გამფორმებელია ავთანდილ მახარაძე, ქორეოგრაფი კი _ გოჩა ჯინჭარაძე. სპექტაკლში მონაწილეობენ: ზაურ კეკელიძე, ნინო სიხარულიძე, გია ხვინჩიაშვილი, გიორგი სიხარულიძე, ნუკრი მახარაძე, ჯემალ სიხარულიძე, შოთა ყაჭეიშვილი, არსენ დუნდუა, ოთარ ცინცაძე, მერი სირაძე, ავთო მახარაძე, მარი სიხარულიძე და სხვები.
ჩოხატაურის სახალხო თეატრსა და ოზურგეთის სახელმწიფო თეატრებს შორის ოდითგანვე მჭიდრო შემოქმედებითი ურთიერთობა არსებობდა. სასიხარულოა, რომ ეს ურთიერთობა კვლავ გრძელდება _ ამჯერად სპექტაკლში მონაწილეობას მიიღებს ოზურგეთის ალექსანდრე წუწუნავას სახელობის სახელმწიფო თეატრის მსახიობი ნელი ბასილაშვილი.
ვესაუბრებით რეჟისორ გოგი ცინცაძეს:
_ ბატონო გოგი, თქვენ ნოდარ დუმბაძის რამდენიმე სპექტაკლში მიიღეთ მონაწილეობა, ახლა კი თავად გადაწყვიტეთ მისი ნაწარმოებების ინსცენირება და დადგმა ჩოხატაურის სახალხო თეატრის სცენაზე.
_ დიახ, თავს უფლება მივეცი შევჭიდებოდი ნოდარ დუმბაძის ნაწარმოებებს. იგი ხომ ყველასთვის საყვარელი და ახლობელი, ეროვნული, თვითმყოფადი, უდიდესი ნიჭის, ქართული სულისა და ხასიათის გამომხატველი განუმეორებელი მწერალია, ჩვენი სისხლი და ხორცია. მან გააცნო მთელ ქვეყანას თავისი მშობლიური კუთხის ადამიანები, რომლებსაც თავისებურად უყვართ და უდგანან ერთმანეთს მხარში, თავისებურად ახალისებენ ცხოვრებას ცრემლნარევი ღიმილით, ალერსიანად კილავენ ერთმანეთის ნაკლს. დუმბაძის ჰუმანიზმით სავსე გმირები შეიყვარა ხალხმა _ ჰუმანიზმი ხომ ის უზარმაზარი ძალაა, რომელიც ბოროტებას უპირისპირდება და სძლევს კიდეც. დღეს ისე, როგორც არასდროს, გვჭირდება სიყვარული, ერთად დგომა, “ჭირსა შიგან გამაგრება” და თუ ჩვენი სპექტაკლის ნახვის შემდეგ მაყურებელი კიდევ ერთხელ დაფიქრდება საკუთარ თავზე და ეცდება უკეთესი გახდეს, ეს იქნება ჩვენი გამარჯვება. დიდი ხანი ვფიქრობდი ნოდარ დუმბაძის ნაწარმოებების ინსცენირებაზე. საკმაოდ რთული გამოდგა მასზე მუშაობა. იმედი მაქვს, მსახიობები კარგად შეასრულებენ როლებს და მაყურებლის წინაშე მაღალმხატვრული დონის სპექტაკლით წარვსდგებით.
