მათი უმრავლესობა აქაური არ არის. სახალხო დამცველის მონიტორინგის შედეგების მიხედვით, 27 მაისის მდგომარეობით, ჩოხატაურში იმყოფებიან: გიორგი გურგენაძე, ამირან ჩუბინიძე, გიგა გავაშელიშვილი, გიორგი მატიაშვილი, ლეგა ონიანი, დიმიტრი ტიტვინიძე, ირაკლი კვარაცხელია და ავთანდილ რიჟამაძე.
“გურია ნიუსი” შეეცადა გადაემოწმებინა ეს ინფორმაცია და ისიც, რამდენადაა შესაძლებელი ჩოხატაურში მყოფი დაკავებულებისთვის საკვების მიწოდება.
ჩოხატაურის დროებითი მოთავსების იზოლატორის ხელმძღვანელმა დაგვიდასტურა, რომ აქციის შედეგად დაკავებული პიროვნებები ახლაც ამ იზოლატორში იმყოფებიან. თუმცა, აღნიშნა, რომ ზემოთ აღნიშნული სიიდან მისთვის ლეგა ონიანის ვინაობა ცნობილი არ არის. მისივე თქმით, დროებითი მოთავსების იზოლატორი საქველმოქმედო ადგილი არ არის და ამიტომ, ნათესავების გარდა, საკვებს ვერავისგან მიიღებენ.
_ ჩვენ გიორგი გურგენაძესთან გვინდა საკვები პროდუქტების შეგზავნა.
_ არა. გურგენაძეს დღეს უკვე შეუგზავნეს საკვები. მეტის მიღება არ შეიძლება.
_ რატომ, აკრძალულია?
_ სასჯელაღსრულების დეპარტამენტს აქვს თავისი წესები. ამ წესების თანახმად კი, თქვენგან ვერაფერს მივიღებთ. თან გურგენაძეს დღეს მოუტანეს საკვები.
_ იქნებ, ავთანდილ რიჟამაძეს გადასცეთ საკვები? როგორც ვიცი, მასთან დღეს მნახველი არ ყოფილა.
_ ეს საქველმოქმედო დაწესებულება არ არის. მხოლოდ ნათესავებისგან მოტანილ პროდუქტებს მივიღებთ, ისიც ზღვრული რაოდენობით, _ დაგვიზუსტა დმი-ის ხელმძღვანელმა.
ჩვენს წყაროს ცნობით, რამდენიმე დაკავებულის ახლობლები ჯერ ჩოხატაურში არ ჩამოსულან, რადგან შინაგან საქმეთა სამინისტრო და სასჯელაღსრულების დეპარტამენტი მონაცემებს დაკავებულთა ადგილსამყოფლის შესახებ ხშირად ცვლის. გვითხრეს ისიც, რომ ამ ადამიანებს კვების მხრივ პრობლემები აქვთ და ის საკვები, რომელიც მცირე რაოდენობით შედის ჩოხატაურის დროებითი მოთავსების იზოლატორში, 8 კაცს არ ეყოფა.
კითხვაზე, როგორ მოხვდნენ თბილისში დაკავებული პირები გურიის სამივე მუნიციპალიტეტში, პასუხი არავის აქვს. წყაროს ცნობით, ამის მიზეზი ის არის, რომ გურიაში ძველი კადრები სასურველი ჩვენების მიღების დიდოსტატები არიან. მეტიც, როგორც ჩვენი წყარო ამბობს, შინაგან საქმეთა სამინისტრომ, დაკავებულებისგან აღიარებითი ჩვენებების მისაღებად პენსიაში გასული პოლიციელები (შევარდნაძის დროინდელი ძალოვნები) გამოიძახა.
ამ ყველაფერს ერთი საეჭვო გარემოებაც ემატება _ სპეცრაზმის მიერ წართმეულ ფოტოაპარატის მეხსიერების ბარათზე დაფიქსირებული გვყავდა გურიის სამხარეო პოლიციის სამმართველოს ყოფილი ხელმძღვანელი ბესო გელენიძე, რომელიც აქციის საღამოს, პარლამენტისკენ მიმავალი დავაფიქსირეთ. გელენიძეს სამოქალაქო ტანსაცმელი _ კრემისფერი პერანგი და შავი შარვალი ეცვა.
სახალხო დამცველის მიერ გავრცელებულ ოფიციალურ ინფორმაციაში კი ნათქვამია, რომ ვინმე ბესო გელენიძე სამტრედიის დროებითი მოთავსების იზოლატორში ჰყავთ დაკავებული. ჯერჯერობით, დაუდასტურებელია ეს ის გელენიძეა, რომელმაც ზოტელებს თავები კონდახებით დაუხეთქა, ავტომატი ესროლა და რომელიც ჩვენს აქციის დღეს პარლამენტთან დავაფიქსირეთ თუ მისი სეხნია. ჩვენს ხელთ არსებული ყველა ტელეფონის ნომერი, რომელიც ადრე გელენიძეს ეკუთვნოდა, მომსახურების ზონიდან არის გასული ან მიუწვდომელია. თუ გავითვალისწინებთ იმასაც, რომ რამდენიმე წლის წინ, ბესო გელენიძე ოპოზიციის მოწინააღმდეგე ტაქსისტის როლში იხილა საზოგადოებამ, ამიტომ, გადაუმოწმებელი ეჭვი, რომ გელენიძე “შეგზავნილი აგენტია”, საფუძველს მოკლებული არ უნდა იყოს.
ამ ეჭვს წყაროს მიერ მოწოდებული ინფორმაციაც ამყარებს, რომლის თანახმადაც, დროებითი მოთავსების იზოლატორში მყოფ პირებს შინაგან საქმეთა სამინისტრომ აგენტები შეუგზავნა ინფორმაციების მოსაპოვებლად. ჩვენი წყარო ამბობს, რომ ასეთი აგენტები ჩოხატაურის, ლანჩხუთისა და ოზურგეთის დროებითი მოთავსების იზოლატორებშიც არიან. წყაროსვე ცნობით, დაკავებული მომიტინგეების უმრავლესობა სასტიკად არის ნაცემი და მათ სამედიცინო დახმარებას არავინ უწევს. როგორც გვითხრეს, შეგზავნილი აგენტებიც “დასიანიაკებულები” არიან ყოველგვარი ეჭვის გასაქარწყლებლად.
და კიდევ ერთი ფაქტი _ საინფორმაციო სააგენტოების მიერ გავრცელებულ ფოტოზე, რომელიც თითქმის ყველა მედია საშუალებაში გამოქვეყნდა, ერთ-ერთ პოლიციელს დასისხლიანებული და ხელებშეკრული მომიტინგე მიჰყავს. გურულები, რომლებსაც ბესო გელენიძის დრო კარგად ახსოვთ, ჩვენთან საუბრისას ამტკიცებენ, რომ ეს პოლიციელი გელენიძის მარჯვენა ხელი, ზოტელების დარბევის და ცემის “ადმირალად” წოდებული მურმან ცირდავაა. ამის მტკიცება ცოტა რთულია, ამიტომ ჩვენ სააგენტოების მიერ გადაღებული პოლიციელის და ჩვენ არქივში არსებულ ცირდავას ფოტოებს ერთად, უკომენტაროდ ვაქვეყნებთ. თუმცა, კიდევ ერთხელ ვიმეორებთ, რომ ეს ვარაუდები საგულდაგულო გადამოწმებას საჭიროებს.
