ნინო ბურჯანაძის თქმით, ყვარელში ადამიანებს იგივე პრობლემები აქვთ, რაც მთელს საქართველოშია. ადამიანებისთვის ძალიან მნიშვნელოვანია, რომ ქვეყანა დაემსგავსოს ქვეყანას, ყველას აწუხებს ის, რაც ხდება ახალგორის რეგიონში და შეწუხებულები არიან ხელისუფლების მხრიდან უმოქმედობით.
“ჩვენთვის ახლა მთავარი ამოცანაა, რაც შეიძლება ეფექტურად შევძლოთ ჩვენი ხმების დაცვა, რადგან ვხედავთ რომ აბსოლუტურად ყველა რეგიონში გვაქვს ძალიან დიდი მხარდაჭერა. აღსანიშნავია ის ფაქტი, რომ რეგიონებში ჩვენთან მოდიან ადამიანები და გვაფრთხილებენ, რომ არის ძალიან დიდი საფრთხე გაყალბებისა, რადგან ადგილებზე ხდება გარკვეული გარიგებები “ნაციონალურ მოძრაობასა” და “ოცნებას” შორის. მანამდე კი, თითქოს ხდება საზოგადოების შემზადება ამ გაყალბებისთვის. მე დარწმუნებული ვარ, რომ ქართველი ხალხი არ დაუშვებს კიდევ ერთხელ საქართველოში არჩევნების გაყალბებას და მე მოსახლეობას ვპირდები, რომ ჩემი არჩევის შემთხვევაში, აღდგება სამართლიანობა ყველგან და ყველასთვის, მავთულხლართები ქვეყანაში აღარ იქნება, ადამიანები თავიანთი შრომის ნაყოფს გაიტანენ და გაყიდიან თავისუფლად ნებისმიერ ბაზარზე და ქვეყანა დაადგება ნორმალური განვითარების გზას.”
ნინო ბურჯანაძემ “ნაციონალური მოძრაობის” პრეზიდენტობის კანდიდატის მიერ გაკეთებულ განცხადებაზეც გააკეთა კომენტარი:
“ნაციონალური მოძრაობა” საერთოდ რომ ბედავს და ხმას იღებს და ლამის აქციების გამართვაც დაიწყეს, სამწუხაროდ ეს არის “ქართული ოცნებისა” და კოჰაბიტაციის ბრალი. თქვენ იცით, რომ ჩვენ ყველანი ვართ “ქართული ოცნების” გულშემატკივარნი, ჩვენ ძალიან დიდ პატივს ვცემთ ბატონ ბიძინა ივანიშვილს, მაგრამ ის რაც მისმა გარემოცვამ გააკეთა ჩვენთვის მიუღებელია, კოჰაბიტაცია “ნაციონალურ მოძრაობასთან” არის მიუღებელი. ჩემთვის გაუგებარია, ციხის კადრების შემდეგ “ნაციონალური მოძრაობა” საერთოდ როგორ ბედავს კიდევ ხმის ამოღებას?”_ განაცხადა ნინო ბურჯანაძემ.
