“გურია ნიუსს” საარჩევნო კომისიის რამდენიმე წევრმა განუცხადა, რომ #60 საარჩევნო ოლქში შემავალ კომისიებში, ბოლო 9 წლის განმავლობაში ჩატარებულ არჩევნებში მონაწილე კომისიის თავმჯდომარეები, მოადგილეები, მდივნები კვლავ აღნიშნულ თანამდებობებზე არიან იმ განსხვავებით, რომ დღეს “ქართულ ოცნებას” წარმოადგენენ. ჩვენ ხელთ გვაქვს ოფიციალური დოკუმენტი, სადაც აღნიშნული ფაქტი დასტურდება. თუმცა, კონკრეტული პიროვნებების დასახელებისგან ამჯერად თავს შევიკავებთ.
საინტერესოა, რას ფიქრობენ ამასთან დაკავშირებით პარტიების “ქართული ოცნების”, “ნაციონალური მოძრაობის”, “დემოკრატიული მოძრაობის” ოზურგეთის რაიონული შტაბების თავმჯდომარეები.
მიხეილ გოგოტიშვილი, “ნაციონალური მოძრაობის” ოზურგეთის შტაბის თავმჯდომარე
“ზეწოლა იყო ამ ადამიანებზე, საარჩევნო კომისიის თავმჯდომარეებსა და მდივნებზე. შესაბამისად, “ქართულ ოცნებაში” დაპორტირდნენ. ზოგი კომისიაში შევიდა, ზოგმა სხვა თანამდებობა მიიღო. ეს ადამიანები იმიტომ იყვნენ “ნაციონალურ მოძრაობაში”, რომ პარტია იყო ხელისუფლებაში, ახლა გადავიდნენ “ქართულ ოცნებაში” იმიტომ, რომ დღეს “ქართული ოცნებაა” ხელისუფლებაში. ჩვენთან კი მოხდა პარტიის გადახალისება. გეტყვით, იმას, რომ ძალიან ბევრი “ნაციოანალური მოძრაობის” პარტიის წევრი დღეს, სხვა პარტიებიდან არიან მოვლენილები საოლქო კომისიაში”.
თამარ ნადირიძე, ნინო ბურჯანაძის ოზურგეთის შტაბის ხელმძღვანელი:
“ნაციონალურმა მოძრაობამ” და “ქართულმა ოცნებამ” საარჩევნო კომისიების სრული უზურპაცია მოახდინეს. საარჩევნო კომისიები, ცესკოდან დაწყებული და საუბნო საარჩევნო კომისიით დამთავრებული, ამ ორმა კოჰაბიტირებულმა ძალამ, სრული გარიგებით დააკომპლექტა. პროცესებს არსებულმა საარჩევნო კანონმდებლობამ ხელი შეუწყო, რომლის წინააღმდეგაც თავის დროზე, 2012 წლის საპარლამენტო არჩევნებამდე “ქართული ოცნება” გამოდიოდა. დღეს, არათუ მოხდა საარჩევნო კანონის სრულყოფა, არამედ ზაქარია ქუცნაშვილის კომისიამ თავისი დადგენილებით ფაქტიურად მხარი დაუჭირა იმ პრინციპებს, რასაც თავის დროზე აპროტესტებდნენ. ნინო ბურჯანაძის ოზურგეთის საარჩევნო შტაბი აცხადებს, რომ საარჩევნო კომისიები ფაქტიურად პოლიტიზირებული არიან. ოზურგეთის საოლქო კომისიაში ვადაგასული 2–3 წევრის ჩანაცვლება ისევ ნაციონალური მოძრაობის მხარდამჭერებით მოხდა, ამ მიზეზით შეიძლება საუბარი მთლიანად საუბნო კომისიების ნაკლებ კვალიფიციურობაზეც, რადგან საუბნო კომისიების არაპარტიული წევრების უმრავლესობა, საარჩევნო სუბიექტების მიერ შეგზავნილები არიან, რასაც სამწუხაროდ კანონით ვერ დაარეგულირებ. ნინო ბურჯანაძის ოზურგეთის საარჩევნო შტაბი ვთხოვთ მხარდამჭერებს და ზოგადად ამომრჩეველს, რომ მოვიდნენ არჩევნებზე, დააფიქსირონ თავიანთი არჩევანი და ამით არ დაუტოვონ არჩევნების გაყალბების შესაძლებლობა ამის მოსურნე ძალებს”.
დავით დარჩია, “ქართული ოცნების” ოზურგეთის საარჩვენო შტაბის თავმჯდომარე:
_ კომისიის წევრი “ქართული ოცნებიდან არის ერთი ადამიანი, რომელიც დავნიშნეთ და ნამდვილად “ქართული ოცნების წევრია” და ეჭვიც არ მეპარება, რომ ასეა, რაც შეეხება საოლქოდან დანიშნულებს, იქ ნამდვილად ვერ გეტყვით რატომ უნდა იყოს სალაპარაკო, ადამიანი თუ გუშინ იყო ნაციონალი და დღეს მას “ქართულ ოცნებაში” უნდა, ეს მათი ნებაა და ამაში მე ვერაფერ ტრაგედიას ვერ ვხედავ. გულწრფელად გეტყვით, რომ მე ამ პროცესებში არ ჩავრეულვარ, იმაზე, რომ არჩევნები ჩატარდება კანონიერად და არ მოხდება რაიმე დარღვევა, ამაზე პასუხისმგებელი არის საოლქო.
_ბატონო დავით, რამდენად ენდობით ძველ კადრებს?
_გასაგებია, მაგრამ მაქვს ინფორმაცია, რომ საოლქომ ეს ადამიანები შეარჩია იმის მიხედვით, რომ ამ ადამიანებს აქვს შესაბამისი ცოდნა და გამოცდილება ამ კუთხით, ახალი კადრები არ არიან განათლებულები ამ საკითხში და ეს გამოიწვევდა სირთულეებს. ამიტომ მე ოლქის თავმჯდომარის მოსაზრებას ვიზიარებ ამ შემთხვევაში.
_ ხომ არ გადაგიხედიათ ძველი სიებისთვის, ძალიან ბევრი ფაქტი იყო, რომ ბევრ უბანზე დაფიქისირდა გარდაცვლილები, ან ზედმეტად ჩაწერილები, ისევ იმ სიებით ხელმძღვანელობს დღეს საოლქო?
_მე და შტაბს ამის სიების გადამოწმება ნამდვილად არ გვეხება…სიმართლე რომ გითხრათ.
_უბრალოდ, თუ დაინტერესდით?
_იყო რაღაც საკითხები, მაგალითად სოფელ ნატანებში ერთი უბნიდან მეორეზე იყვნენ მიწერილები, ეს იციან ჩვენი უბნის წარმომადგენლებმა და ალბათ დააყენებენდნენ საოლქოში ამ საკითხს. აღმოიფხვრება ეს პრობლემები, თუ კი სადმე არსებობს.
ოზურგეთის #60 საოლქო საარჩევნო ოლქის თავმჯდომარე. ზვიად თენიეშვილი:
“კონკურსი ჰქონდა საოლქო საარჩევნო კომისიას გამოცხადებული, შესაბამისად 372 კაცი იყო ასარჩევი, შემოვიდა სულ 816 განცხადება. საოქლო საარჩევნო კომისიამ 6 წევრი კვალიფიციური ნიშნით შეარჩია და საოლქო საარჩევნო კომისიაში დანიშნა. რაც შეეხება პარტიებს, 6 პარტია ჰყავს კოალიციას, 6-მა პარტიამ წარმოადგინა თავისი კომისიის წევრები და ასევე წარმოადგინა მისი წევრები “ნაციონალურმა მოძრაობამ”. ნინო ბურჯანაძე არ არის კვალიფიცური სუბიექტი, ბურჯანაძეს არ ჰყავს ამ არჩევნებისთვის საარჩევნო ადმინისტრაციისთვის წარმომადგენელი, ამიტომ შესაბამისად ვერ დაინიშნა მისი პარტიის წარმომადგენელი”.
